محمد السديري

[معلومات العضو شافي القويسي المخاريم]

بسم الله الرحمن الرحيم






ديوان الشاعر الامير محمد الاحمد السديري يرحمه الله

 

 

 

 

[معلومات العضو شافي القويسي المخاريم]

ملحمة عكاظ

غنت الورقا على خضر الغصون"="وأسهرتني والزواهر ساريات
ولعت قلبي وأنا قلبي حزين"="هاج فكري والحمام مغردات
من سببهن عفت لذّات المنام"="ساهرٍ وعيون غيري نايمات
جددن اجروح قلب المستهام"="أتعذب والقميري ساجعات
سارحاتٍ لاعباتٍ بالفنون"="هازجاتٍ في طربهن دالهات
بالترنم بينهن ورق الحمام"="حركن مني اشجونٍ خافيات
حركن قلبٍ سبح وسط الغرام"="هام ببحور الغرام الهايجات
هايمٍ مشتاق شوقه من قديم"="مستكنٍ بالضلوع المغلقات
أتذكر من له فؤادي خفق"="فر من بين الضلوع المهدفات
في كلام الحب جاوبت الحمام"="وأستلجن وأستمرن شاديات
ذكرني شاردٍ فاق الظباء"="أهيف الخصرين سيد الراتعات
قالو انه ساكنٍ وادي ثقيف"="أدعج العينين بسفوح السرات
هزني الشوق على شوف الحبيب"="مني الآفكار يمه شاردات
حلقن بأفاق ميدان الهوى"="يم من يهواه قلبي سابحات
جيت أدور من سبا عقلي هواه"="بالشفايا والعيون الناعسات
يوسفي الحسن ممشوق القوام"="جادلٍ في وصفها مثل المهات
جادلٍ جدد اجروح بالفؤاد "="صايباتٍ جارحاتٍ داميات
خافياتٍ مزمناتٍ موجعات"="مستقراتٍ بقلبي ساكنات
يوم أشوف الزول والعنق الطويل"="الله اكبر والقرون مجدلات
مثل شرطان الذهب شقر الجعود"="خلقة الله فوق جسمه ضافيات
فاتن وأغواه ريعان الشباب"="والرموش بحاجبيه مركزات
خصرها ضامر ومهضومٍ حشاه"="بين أشافيها نظيم أمجوهرات
أن تبسم في شفاياه وضحك"="صفقن ليحان صدري هاتفات
من فيافي نجد جيت أرض الحجاز"="من ديارٍ نبتها زين النبات
عانين من نجد ميدان المهار"="غابت أليوث الحرب الكاسرات
من اديار نبتها شيح وعرار"="والشقارا والزهور اليانعات
والبختري والنفل هو والجعد"="والخزاما والزهور المنورات
زاهر الحنوه وزهر القيحوان"="مثل نظم أعقود خودن حافلات
به أطيور الروض غنن بالفنون"="بالترنم غارقاتٍ آمنات
البراعم كل ماهب النسيم"="مايلاتٍ بالتهزع راقصات
اليهق والربل يطرب كل عين"="والشقارا والسليح بناظرات
ريحهن وان هب ذعذاع النسيم"="ينعش أرواحٍ لريحه عاشقات
كن نظم ازهورها وسط الرياض"="الجواهر في رقاب الغانيلت
عللتهن في ربا نجد المزون"="ناشياتٍ مرعداتٍ ممطرات
غادياتٍ رايحاتٍ مرضيات"="مسبلاتٍ في مطرهن مغدقات
حافلاتٍ مثقلاتٍ هاملات"="منوراتٍ بالبروق الضاحكات
لاقحاتٍ مغنياتٍ حاردات"="شامخاتٍ شاحناتٍ حافلات
شارباتٍ من بحور ومن شطوط"="والصبا هبت لهن بالملقحات
ساقهن ربٍ على عرشه عظيم"="من بحر جوده برفقٍ دافقات
كن ودق المزن من فوق الحزوم"="المكاين بالصحايف كاتبات
كن طفاح الطها بيض الخيام"="بالمشاعر يوم تسع مشاهدات
أرعفن بالكوثر العذب الطهور"="من مزونٍ في سماهن مسبلات
ناشياتٍ من دخل فصل الخريف"="تسعة أشهر فوق نجد مخيلات
أتسلا بالسراب وبالفجوج"="ريحة العشب فيها منعشات
عانين من نجد ملجا المستريب"="من زبنها ما تجيه النايبات
عانين من شامخٍ مجده قديم"="من طويق العز شرقٍ من مرات
مشمخراتٍ اخشومه للسحاب"="مثل سلات السيوف المصلتات
عانين من نجد ساحات الندى"="جيت من ميدان خيلٍ مكرمات
عانين من نجد مدهال الاسود"="في ذرا وادي حنيفه مرعبات
مرعبينٍ العدو يوم الحروب"="وللصديق وجارهم عز وغنات
شيدو للمجد بين العالمين"="يوم بعض الناس في نومٍ سبات
ديرةٍ في ربعها عنتر سكن"="وبن كلثوم مروِ المرهفات
مع كليب وحاتم بحر الكرم"="من سكن للجود فوق النايفات
ديرةٍ أحيا بها عبد العزيز"="ذكرياتٍ للفخار أمدونات
جدد افعول الاسود اللي مضت"="ثمن احياها وهي كانت رفات
عبقري ماعلى البيدى مشى"="مثله الا من نطق بالمرسلات
هزبر الغابات ليث من ليوث"="صارمٍ حطم أحدود الصارمات
تغلبين من نسل شسيبان جال"="والكتايب بالسلاح امدججات
يافعن هام المعالى من نشا"="خاض غبات البحور الطاميات
بدر كل الشرق من شرقه طلع"="ضاح وانور بالليالي الحالكات
وانجلت عنه الكواكب كلها"="والبدور من المهابه آفلات
لم شمل الجزيرة منتشر"="وحد الحضر المقيمه والبدات
النساء ما خلفن مثله عديم"="بالسنين الحاضره والفايتات
من بحر جده الى شط الخليج"="البنود بمجد عزه لايحات
والنظا والخيل من ربع الجنوب"="في ربا هضبة عنازه مشرفات
جال بأجوى الكون صقرٍ من صقور"="وأخلدت كل الطيور الجارحات
فرخ شامٍ صاقرٍ كل الطيور"="الصقور الاوله والتاليات
بالفعايل لو يقوسون الحرار"="طولهن عن طول شبره قاصرات
ضف ريشه من مقره بالكويت"="وأصطفق وأرعب جميع الطايرات
خاف من سطوات فعله كل طير"="نزلن بالقاع عنه موقعات
مطلبه للعز والمجد التليد"="يوم غيره لاهين بالمخردات
وأدرك العليا بعد ضرب السيوف"="كم روس في لحاهن طايحات
عقب خوضه للمعارك بالحروب"="شرب صافي الماء بعد شرب الصرات
في نهارٍ فيه ضهره مثل ليل"="به عجاج الخيل غطا الشاهقات
كن رجد الخيل مع غط الصهيل"="الزلازل والرعود الصاعقات
فوقهن كل أبلجٍ عين عديم"="ملجماتٍ جاهزاتٍ واثبات
حاجبن الشمس نقع العاديات"="والمدافع هازجاتٍ مرزمات
زادها ضرب الهواتر والرماح"="والبنادق شاحناتٍ مفرغات
وين قطاع الفيافي والفجوج"="النضا والخيل عقبه مهملات
جيت للمبعوث وأقفت المسير"="شرقي العرفا ذكرت الماضيات
ماشيٍ بأطلال أجيالٍ خلت"="دارساتٍ موحشاتٍ خاويات
أسأل الأطلال وين أهل البيان"="وين من سنوا طريق المكرمات
ياعكاظ العرب ميدان الادب"="يامزار أهل المهار الصافنات
يامزار أهل الرجوله والحسب"="ياعرين الليوث الضاريات
يامواطن نخبة المجد الرفيع"="يامقر أهل البنود الخافيات
يامنابر مصدر الشعر البديع"="مفردات الشعر منهم خالدات
يامناخ الهجن عجلات الفديد"="يامداجٍ للمهار المرهمات
فوقهن صيد يضدون الحريب"="بالرماح وبالسيوف القاطعات
فوق قبٍ يعربياتٍ اعجال"="عادياتٍ بالمعارك ضابحات
في ظهور العيس جوها من بعيد"="يقطعون افجوج نجد الموحشات
ما يهابون الفيافي والخروم"="والمخاطر والديار الناحيات
من ديار الشام وديار اليمن"="وأهل هجر ومن سكن شط الفرات
وين بكر هو وتغلب مع تميم"="وين ذبيان وعبس أهل القنات
وين حاتم مع بن سلمى زهير"="وين رايات الفخار الشامخات
وين أمرئ القيس مع فارس زبيد"="انشدو عنهم أقبورٍ مظلمات
وين غطفان وهوزان مع قريش"="وين قيس أهل السيوف الماضيات
وين قيس وين من صاغ البيان"="من نطق بالبينات الباقيات
وين عنتر وين طرفه مع لبيد"="وين بن كلثوم عز الناخيات
وين الاعشى وين نابغة العرب"="وأخت صخر اللي تقول المعجزات
وين حفل الازد أهل سمر الرماح"="أصلهم في شامخ العربا ثبات
وين الاقرع مع بن عبد المدان"="حكموهم بالامور المعضلات
من فحول الشعر سادات الادب"="علقو بالبيت عشر معلقات
بالتفاق بين سادات عظام"="سنو الاشهر عليهم حارمات
أشهرٍ حرم أكيدٍ سجلت"="بالعهود المحكمات البينات
أشهرٍ بأيامهن حقن الدماء"="لاحروب ولا مهارٍ مسرجات
ثبتوا فيها طراف وشيدوا"="قبة حمرا محط الظامرات
كل ما مريت رسم أديارهم"="عاودتني عبرةٍ عقب الثبات
عاودتني عبرةٍ بأقصى الحشا"="والدموع من المدامع سايحات
هيضت لواعجٍ وسط الفواد"="المنازل والرسوم الدارسات
ياحماة العرب يانسل الكرام"="ياشبابٍ قد تحلوا بالصفات
يارجانا في ملمات الكروب"="أنتم أفلاذ الكبود الغاليات
أنتم الآمال يانور العرين"="ياحمات أوطانكم والمحصنات
ياشباب العرب وان حمي الوطيس"="ياسيوفاً للشدايد مغمدات
قولةٍ بلكى عسى هذا يصير"="ما يخلص للديون المرسمات
ما يخلص دينكم كود الفعال"="في نهارٍ فيه ضرب القاذفات
أبعثوا ذكرى هل الفعل الجميل"="راكبين العيس هي والعاديات
أبعثوا بالله ذكرى جدودكم"="أبعثو بالله بيناتٍ واضحات
أبعثوا ذكرى صناديد مضت"="أسمعوهم والمسامع مصغيات
أسمعوهم صيحةٍ وسط الهضاب"="اللهضاب بالأقـــصى مطرقات
مطرقاتٍ شاهدن ذل وهوان"="شاهدن قهرٍ تذوب اله الصفات
صخرةٍ بالقدس تنخى الفاتحين"="هلت العبرات منها جاريات
صخرة المعراج تنخى الطيبين"="وين جيش الزحف قاسين القناة
اليتاما دمعهم فوق الصدور"="فاقدين ابوانهم والأمهات
يصرخون بصرخة الحر الحزين"="صرخةٍ منها الجبال مجلجلات
صرخةٍ ادما صداها للقلوب"="عن نماهن أذهلت للمرضعات
صرخةٍ من هولها جظ الحطيم"="والمشاعر كلهن امزمجرات
يندبن العرب لاولى القبلتين"="لطخةٍ بالعار بيدين الجنات
فاقدين كل شىء بالوجود"="والثكالا وسط يافا عاريات
العدو يسومهن سوم العذاب"="من سبب ماصار والله باكيات
مالهن في وسط موطنهن قرار"="بالنياحة والتهضم سامرات
عذبوهن بالسياط وبالحديد"="بالسجون مكبلاتٍ غاضبات
عند صلفين اليهود الضالين"="خافضاتٍ روسهن وحاسرات
هاضمين حقهن بين الآنام"="حسروهن عقب ماهن مترفات
لاحلال ولابيوت ولاذرى"="لاصديق ولاعوين تايهات
لاحليم ولاقريب ولاشفيق"="هالكاتٍ بالفيافي معدمات
شردوهن عقب ماهن في نعيم"="ياحمات اديارهن مستضعفات
ساكناتٍ بالجبال وبالكهوف"="مبعداتٍ بايساتٍ نايحات
يطلبن الثأر يانسل الكرام"="من نطق بالضاد يمه صارخات
من تجبر ضدهن بأوطانهن"="نازحاتٍ نادباتٍ ناحلات
ياولي العرش يالرب الكريم"="يا إله شاهدن المنكرات
أبعدوهن عن مواطن حيهن"="نازحاتٍ عن وطنهن مرغمات
مستغيثاتٍ بزفرات العبار"="كاشفاتٍ للوجيه الشاحبات
حرقن أدموعهن ورد الخدود"="من شراب الذل والله شاربات
هدموا لبيوتهن عقب العذاب"="يمسحن ادموعهن الذارفات
ذللوهن عذبوهن بالسياط"="بالتوجد والتهظم زافرات
شاهدن لبيوتهن عقب العمار"="صارت انقاض هدامٍ جاثيات
يصفقن بكفوفهن سمر الخدود"="من أدمي أخوانهن مخضبات
عرضن لصدورهن زرق الحراب"="هن وطلقات الرصاص القاتلات
القهر والغبن يبكي كل عين"="والهضايم شيبت بالجاهلات
في رحاب القدس أيضاً والخليل"="في رباهن شيدوا مستعمرات
كم شبابٍ بالسجون مصفدين"="دونهم أبواب ظلم مقفلات
اطلبو للثار ياشبال الأسود"="كان ما أخذتوه فضلو الممات
الكرامه ما يعادلها عديل"="كان خدشت حرموا باقي الحيات
بالقبور أبوانكم تنخا الشباب"="أنتم أحفاد الصناديد الكمات
خيلهم بالعز بأيام الحروب"="في ميادين المعارك جايلات
أن نشدت وقلت وأبديت الصحيح"="فلتة الدنيا جنوب مغرزات
ياشباب العرب بأيام الكروب"="ياذرانا بلامور المعضلات
شمروا للمجد بأيام الخطوب"="أبعثوا سوقٍ مضى له ذكريات
جددوا ذكرى عكاظ بما مضى"="واعلنوها للوفود السامعات
سجلوا فيها الفخار وطهروا"="الشرف يوم الاسنه شارعات
معركة ذي قار خاضوا حربها"="بالعوالي والسيوف المشهرات
وأبعدو عارٍ على النعمان صار"="أبعدوه وبعدوا للعيبات
به تساموا للفخر يوم النزال"="حلقوا للمجد فوق الحايمات
بالجزيرة مايهابون المنون"="ثابتين كالجبال الراسيات
خيل قحطان وعدنان جميع"="معركة ذى قار فيها سابحات
سبلوا للمعركه صف اعجال"="ممتطين للمهار السابقات
لين رب الخلق علام الغيوب"="خالق الارواح رب الكائنات
أنزل آياته على سيد البشر"="أنبأه بأقراء على رغم العدات
ثم شع النور في شرق العرب"="وأشرقت شمس الفضيله بالصلات
هبوا الانصار للخطب العظيم"="مع رسول الحق للعالم هدات
أحدقوا بالمصطفى سيد الآنام"="كالاسود الكاسرات الفاتكات
وانتشر دين العداله للورا"="شاع واهتزت عروشٍ للطغات
وأنذهل كسرى وجيش الروم خار"="من كتايب من سعوا للصالحات
عصبة محمد هل الفعل الجميل"="يطلبون المد فوق الجامحات
خيلهم بالشرق والغرب البعيد"="للجحافل بالمعارك خايضات
خيلهم بالشرق والغرب البعيد"="مرهماتٍ هاجماتٍ جايلات
في سبيل الحق ما تخشى الملام"="كم هدو من عروشٍ هايلات
الصحابه بالعوالي والسيوف"="أخمدوا نيران قومٍ مشعلات
أبن ابي وقاص هو وبن الوليد"="كم تحدو للصناديد العصات
قادوا جيوش الصحابه بالحروب"="طاعةٍ لله رب الصافنات
طاعةٍ للي بعث طه رسول"="مكنوا بالضد روس الباترات
رسخوا بسيوفهم دين الحنيف"="في كلامي يشهدن القارات
من رقاب الروم بالحرب العوان"="ينثرن الدم بحدود الظبات
وأحمد الله لابتي يوم النزال"="ما يهابون المنايا الواردات
للفخر والجود في وادي العقيق"="نازلين والجفان مشرعات
ضيفهم والجار يلقى ما يريد"="في رحاب المجد ماجاهم شنات
هم بني زايد و هود جدهم"="بينٍ تاريخهم بالمعجمات
من جدار الجار أدو جارهم"="والفضايل بالفعايل شاهدات
كل فعلٍ صار يظهر له دليل"="ما جرى بالكون تبديه الروات
قلتها في ديرةٍ قفر فياح"="شرق من صاره شمال مجفلات
أتجلد كل ما غنا الحمام"="وأتذكر للأمور الفايتات
أتذكر كل شىء قد مضى"="وأتوجد والتوجد به شمات
وأزعج الآهات من فرط الأسى"="ساهرٍ يوم الزواهر ساريات

 

 

 

 

[معلومات العضو شافي القويسي المخاريم]

يقـول من عـدا علـى راس عالـي

يقـول من عـدا علـى راس عالـي=رجـم طويـل يدهلـه كـل قرنـاس
في راس مرجـومٍ عسيـر المنالـي=تلعـب به الأريـاح مع كل نسنـاس
في مهمـةٍ قفـر من النـاس خالـي=يشتاق له من حس بالقلـب هوجـاس
قعـدت فـي راسـه وحيـدٍ لحالـي =براس الطويل ملابقـه تقـل حـراس
متذكـر فـي مرقبـي وش غدالـي=وصفقت بالكفيـن يـاسٍ على يـاس
أخـذت اعـد أيـامهـا والليـالـي=دنيـا تقلـب ما عرفنـا لهـا قيـاس
كـم فرقـت ما بين غالـي وغالـي=لوشفـت منها ربح ترجـع للافـلاس
يقطعـك دنيـا ما لهـا أول وتالـي=لو اضحكت للغبن تقـرع بالأجـراس
المستـريح اللـي من العقـل خالـي=ما هو بلجـات الهواجيـس عطـاس
ماهـوب مثلـي مشكلاتـه جلالـي=أزريت أسجلهـن بحبـر وقرطـاس
حملـي ثقيـل وشايلـة باحتمـالـي=واصبر على مر الليـالي والاتعـاس
وارسي كما ترسـي رواس الجبالـي=ولا يشتكـي ضلـعٍ عليه القـدم داس
يابجـاد شـب النـار وادن الدلالـي=واحمس لنا يابجاد ما يقعـد الـراس
ودقـه بنجـرٍ يـاظريـف العيالـي=يجذب لنا ربعٍ على اكـوار جـلاس
وزلـه إلـى منه رقـد كـل سالـي=وخله يفـوح وقنـن الهيـل بقيـاس
وصبـه ومـده يـا كريـم السبالـي=يبعد همومي يـوم أشمـه بالانفـاس
فنجـال يغـدي مـا تصـور ببالـي=وروابع تضرب بها اخماس واسـداس
لاخـاب ظنـي بالرفيـق الموالـي=مالي مشاريـهٍ علـى نايـد النـاس
لعـل قصـر مـا يجيلـه ظـلالـي=ينـهد مـن عـال مبانيـه للسـاس
لاصـار ما هـو مدهـل للرجالـي=وملجا لمن هو يشكي الضيم والبـاس
بحسنـاك يامنشـي حقـوق الخيالـي=ياخالـق أجنـاس ويامغنـي أجنـاس
تجعـل مقـره دارس العـهد بالـي=صحصـاح دوٍّ دارس مابـه اونـاس
البـوم فـي تالـي هدامـه يـلالـي=جزاك ياقصـر الخنـا وكر الادنـاس
متـى تـربــع دارنـا والمغـالـي=وتخضر فياض عقب ما هيب يبـاس
نشـوف فيـها الديدحـان متـوالـي=مثل الرعاف بخصر مدقوق الالعـاس
ونثير على البيـدا سـوات الزوالـي=يشرق حماره شرقة الصبـغ بالكـاس
وتكبر دفـوف معبسـات الشمارلـي=ويبني عليهن الشحم مثـل الاطعـاس

 

 

 

 

[معلومات العضو شافي القويسي المخاريم]

قالوا وحيد وقلت ماعندي اونـاس

قالوا وحيد وقلت ماعندي اونـاس=وقالوا غريب وقلت بـأرض بعيـدة
ابعدت مابي شوف ناس من الناس=بعدت عن بعـض المـلا وتعديـده
مطاوع قلبي علـى كـل الأجنـاس=والبعد عن شوف المكـاره يفيـده
اخترت بعد الدار عن قرب الانجاس=عن دارهـم نلقـى ديـار جديـدة
في وسط نجد اتبع هوا كل نسنـاس=واطرب لشوف طيورهـا وتغريـده
اعشق ليالي نجد لو انهـا ادمـاس=وايامهـا عنـدي جنـان سعيـدة
شمى لعشب رياضها يقعد الـراس=ومافات من ساعات عمري بعيـدة
شوف الزهر يبعد عنا كل هوجـاس=ويريح عن قلـب الشقـا مايكيـده
وحس الرعد في رايح المزن رجاس=دقات عـود عنـد سمعـي فريـدة
وان قال لي بعض المخاليق لابـاس=قلت الهضايـم بالضمايـر مجيـدة
الله مـن هـم بالاضـلاع غطـاس=اقام وسط القلـب وابطـى شديـدة
فكرت بالدنيـا بتقديـر واحسـاس=ولا جات لي الدنيا علـى مانريـده
اللي نبى تقطعـت عنـه الارمـاس=وعنه اختفت كل العلـوم الوكيـدة
القلب يبغض كـل غـادر وبـلاس=اللـي يلطـخ دم الاجـواد بـيـده
واحب من يتعب على كل نومـاس=ومن فيض جوده مايمـد الزهيـده
اللي ليا كـادت والاريـاق يبـاس=يصبر على كود الامـور الشديـدة
وللنفس عن طرق المثاليم حبـاس=يتعب علـى كـل العلـوم الحميـدة
واحب نجد وكل حبي علـى سـاس=حب بقلبـي لـه قصـور مشيـدة
عندي وعرها مع سهلها والاطعاس=غابات ورد فـي زهـور نضيـدة
برياضها محلا هـدد كـل قرنـاس=ان شاف حفان الحبـارى يصيـده
عدل المناكب لابرق الريـش دواس=ماناش فـي مخـلاب كفـه يجيـده
ياحلو هداته على الجـول غـلاس=ينحـر كثيـره ويتعـدى الفريـدة
اجرد عديم لهايش الخـرب فـراس=والطايرة لـو ترتفـع مـا تكيـده
ايام عجات الهـدد كلهـا اونـاس=ياحلـو بالخـد البيـاح تهـديـده

 

 

 

 

[معلومات العضو شافي القويسي المخاريم]

إن صـار زود المال بيدين الانـذال

إن صـار زود المال بيدين الانـذال=حنـّا مـن المعـروف تندا يدينا
وان كانهم شرهوا على طيب الافعال=حنـّا وردنـا جـمامها وارتوينا
وان فكـّروا للجـود يمشون رحّال=حنـّا قبـل يمشون يـّمه خطينا
يـا مـا لبسنا للشرف كـل سربال=وعلـى البسيطة للفضيلـة مشينا
فـي دوحـة العربـا لنا مجد وظلال=وحنـّا علـى در المكـارم غـذينا
لـو نـجمع اللي فات منا مـن المال=إن كـان شيدنـا القصور وبنينا
نـعطي ولا نـتبع عطانـا بالاقـوال=ونبـذل ونسكت كنـنا ما عطينا
وان باعـوا الشيمـة بديـنار وريال=حنـا دخلنـا سوقهـا واشتـرينا
نطلـع لها لـو هي على روس الاقذال=لـو هـو عسيـر ٍ دربها ما انثنينا
بـافعالنـا نرسم دروب ٍ للاجيـال=إلـي نساهـا غيـرنا مـا نسينا
أسـود سـادات ٍ تسجل للاشبـال=فضايـل ٍ شـمنا لهـا واهتديـنا
بـيض ٍ نسجلهن جديدات وسـمال=حـفايـظ ٍ لاحفادنـا اللاحقيـنا
نصبـر على الشـّدات لـو شيلنا مال=لـو سـال دم دفوفـنا ما شكينا
نـخاف يلقـى سـدنا كـل ختـّال=ويـبني هـزيلات المعانـي عليـنا
الليـل يـا خالـد علـى والدك طال=وهنـّيـت ناس ٍ بالكـرا نـايمينا
يا عـز راسـي شفت مـا خبث البال=شـي ٍ يهـوّل شيـّب الـجاهلينا
شـي ٍ مـن اسبابـه يشيب بالاطفال=فطّـر خـشوم مهجـرعات الحنينا
أديـر قـالات ٍ عريضـات وطوال=قـالات خـلنّ المخفـىّ يـبـينا
منهـن رزيـن العقـل بالوقت يهتال=بـوقت ٍ عبـوس ٍ فطّـن الغافلينا
وقـت ٍ من اسبابـه شكى كل ريبال=نصبـر ونسكـت كنـنا غايـبينا
النـاس بـالأيـام راحـل ونـّزال=وتفجعهم الدنـيا وهـم دالـهيـنا
وحـيـات رب ٍ نزل آيات الانفال=عـالـم خفايـا نـية الحاقـدينا
ما اترك طريق العدل في كـل الاحوال=لـو يـرحـل المـريـخ للفرقدينا

 

 

 

 

[معلومات العضو شافي القويسي المخاريم]

ياالله انا من جود حسنـاك طالبـك

ياالله انا من جود حسناك طـالبك=عــــفوك ومدك حيث منت بخيلى
يالادمـي دنياك هـــــذي تـعذبك=لوطــفت فيها مالقيت الدليلى
كل على مذهــــب امامه يخاطبك=يبيك من زايــد ذنـوبه تشيلى
واليا عصيت اهل المذاهب تعاتبك=كـل يقـول ابيــك يمـي تجيلي
ولو انتحيت بعيد بالســـؤتطلبك=وكــل بصاعـه من ذنوبه يكيلي
احــد يصحـــح لك حديثه ويرهبك=واحــد يقول الحق عندي نزيلي
واحــد يخيفيك في كلامــه ويدبك=وابليس يضحك له وهـو مستشيلي
الناس عــوجــان المناطق تكذبك=وعن الصحيح الكذب معهم بديلي
ان مارضـــيت بقولهم نتف شاربك=وتكبر ذنـــوبك لوغناك تهليلي
ناس عــلى درب الفضيله تحـاربك=وعلى دروب الشــر تهذل هذيلى
ودروبهم عســـرات عــوج وتتعبك=ما تســـتوي لك لا ولا تستويلي
ينبيك عن دنياك ماضي تجـــاربك=وعــزي لحالك كان عرفك قليلى
اتبع نبيك واتـــرك اللي مجنبك=واقضب مماشـــى سنته لا تعيلى
اللــي بغار الثور للرشد يندبك=وابوبكر عــنده نديـم وخليلى
نصايحه للرشـــد حــذرا تغايبك=هــرجه صـحيح وكل فعله جميلي
ســـنة نبيـــك للفضيله تقـربك=المصطفى ماله شـــبيه وعديلي
واحــذرك عـن نقالة السو تقربك=ومن يتبع العايل لـزوم يعيلى
لوانت ما تغضب ترى الناس تغضبك=وعـقب المعزه يجعلوانك ذليلى
وتــرى ردي العرق للعيب يجـذبك=وتصير بدروب الـردا له عميلي
وبنت الردي حذراك حـذراك تعجبك=واحــذر تصير لمثل هذي حليلى
وعـن ما يعيب النسل عرب مناسبك=وعليك في بنت الحصـان الاصيلي
يجـي ولدهــا فارق عن قــرايبك=ويقف في وجـه الخصيم القبيلي
ان كبرت القالات بالفعل يعجــبك=ويبرد هـمومك كان قلبك غليلي
مثل القطامي في هـــداده يشببك=والــدم من مخــلاب كفه يسيلي
ليا صارما صلبين الارياء مكاسبك=تـراك بين الناس تبقى هـزيلي
وترى دروب الخبث يالعبد تذهـبك=ويفــوت عمـرك ما تحصل حصيلي
احــذر يابن حــوا تطمن لحاجبك=الا لــرب للخــلايــق يــزيلي
الي بعفوه عن عــذابه يرغـــبك=وعينه لكل الخلق دايـم تخيلى
في لوحه المحفوظ يا لعبد مذهبك=نــزل بحــق وكل ما به فضيلى
ومعاشر الخايب مع الناس يذربـك=وتصبح قليل الميز عقلك هبيلى
ومعاشـر الطيب على الطيب يجلبك=ويـرقـــيك للعليا بظل ظليلي
لا تقرب الأجــرب بالامراض يعطبك=يصـــير جسمك مثل جسمه عليلي
ممشا الخفامن صافي العقل يسلبك=ويصير لك يــم الرذيله سبيلي
وعـن مارد الانـذال نزه مشاربك=واشــرب نظـيف لوورادك طويلي
ولياك تنسى يابن الأ جواد واجبك=والي يـروم المجد حمله ثقيلي
يا لادمــي وان كان كبرت مصايبك=ازبن على محي ا لبلاد المحيلى
ازبن على رب بعرشــه يراقبك=وناجه وبعد العسـر يره جليلي
ناجــه ولاجـل ارضاه وجه ركايبك=وخــلك لعلام الســـرايردخيلي
هــو الذي ينجيك من كود صـايبك=ويذريك من كربات هــول مهيلي
يا لعــبد مكن عــند ربك مقضبك=وفــكر وقـــدر وانتبه لاتميلي
ولحـــد من الخلاق يالعبد حاجـبك=هــو الذي مـده وعـفوه جزيلى
وهــو الذي في ما فعلته يحاسبك=وهـو الذي بارزاق عبده كفيلي

 

 

 

 

[معلومات العضو شافي القويسي المخاريم]

طيرك غدا بالصيف شاف التناكير

طيرك غدا بالصيف شاف التناكير=حدنه العقبان لين اقلعنــــــــــه
والطير وقت القيض شربلاخيـــــر= تتعب وكل ايديك مايشبعنــــــه
عندي عوض طيرك ليال المخاظير= فرخ قرانيس الهوا علمنـــــــــه
تحير في وصفه جميع الصقاقيــــر=نضمن عيونه سود بحجورهنـــه
اشقر عديم ينثر الريش تنثيـــــــــر=وايديه شكاة الغلب ينثــرنـــــــه
وان صرة قدام السلف والمظاهيـر=بامخافق الاجوال يعجبــك فنـــه
طيريعوضك ياصبي المخاسيـــــــر=.وخل الصياح اونة الصدر كنـــــــه
قبلك بكينا الطير ويا الغناديـــــــــــر=قد عذبن القلب ثم اوجعنــــــــــه

 

 

 

 

[معلومات العضو شافي القويسي المخاريم]

غنيت ما قصدي طرب في حياتي

غنيت ما قصدي طرب في حياتي=لاشك في دورات الأيام غنيت
وجاوب ورق الراعبي عن سكاتي=غنا وانا غنيت مثله وونيت
نشدتني عن حالتي يا شفاتي=وأنا مريض القلب لو أني اخفيت
اضحك وونات الحشا موجعاتي=واشرب قراح وكن شربي من الزيت
وبالعين يا خالد نشوف الجناتي=يا عز راسي شفت الاجرام واغضيت
واغيب كني محرمن بالصلاتي=لو هو ندهني رافع الصوت ما اوحيت
محدن يعرف جروحي الخافياتي=واليا نشدني واحدن عنه صديت
اصد وابغض ناقلين الوشاتي=واناجي اللي ما لغيره ترجيت
ما اظن به حي يسوي سواتي=وحيد بالدنيا وأصارع عفاريت
واذكر دروب ايامنا الماضياتي=والحقت مع عبرات صدري تناهيت
ياكثر ما شفنا من العايباتي=واليا زعلت من الخطا قالوا اخطيت
وطاحت عن الكتفين مجة عباتي=وحلقت بالأفكار ثم استجليت
وفكرت في شىء جرا لي وفاتي=حيفٍ يفتت بسرة القلب تفتيت
من جور هوله زلزل الراسياتي=يميت حي وباللحد يزعل الميت
ويشيب طفل ويذهل المرضعاتي=ينسن رضيع الديد صرعا مباهيت
وانا برجوى مجري الكايناتي=وكبرت باسماه العزيزه ولبيت
اللي عصم يوسف عن الخايناتي=ورده على يعقوب عقب التفاخيت
كلن يقول انه بفعله زناتي=والفعل راحوبه هل المجد والصيت
ما ريد دار الذل دار العصاتي=دار الخنا والغدر منها استخليت
متى عليها نسمع النايحاتي=ودار الثنا والجود فيها زغاريت
يالله يللي تعلم الخافياتي=انك تمسيها على ما تمنيت

 

 

 

 

[معلومات العضو شافي القويسي المخاريم]

لولا الرجا و أعلل القلب بوعود

لولا الرجا و أعلل القلب بوعود=بوعود خل صار شوفه شفاقه
لولاه ماروضت نفسي على الكود=ومن كل خلق الله عشقته عشاقه
اختار قلبي بالهوا ناعم العود=ما غيره أحد بالمخاليق شاقه
طفل عليه من البها ستر و عقود=زين القوام اشباه وجهه دقاقة
ان كان شفته فتح القلب بورود=و ان غاب دايم دمعتي من فراقه
طفل سحرها روت بشفاه منضود=اللي نهب مكنون قلبي سراقه
مادام هو ماجود فالحب ماجود=وسط الضماير مبهمات حلاقه
يا ناس أنا أحبه ولا فيه منقود=وقلبي لغيره ما يعرف الصداقه
يا ناس حبي له بلا سلم و حدود=و فراق روحي من سبايب فراقه

 

 

 

 

[معلومات العضو شافي القويسي المخاريم]

وراك تورينا الجفا والقطيعه

وراك تورينا الجفا والقطيعه=وحنالك اطوع من بنان اليديني
نشري رضاك وكل شي نبيعه =وحياة ربٍ يبعث الميتيني
ونمشي بشف ارضاك وامرك نطيعه=اللي يصيبك عارف انه يجيني
لو ان نفسي للمعالي رفيعه=بالعين اجلك جاعلك لي ضنيني
ايامنا هي والليالي سريعه=ومازان بالدنيا لزوم يشيني
الله كفيل الناس وارضه وسيعه=عالم خفايا نية الجاحديني
لابد من يوم نشوف الشنيعه=ونتبع طريق اجدودنا الاوليني
الروح تبقا لين ياصل وديعه=والاجل مكتوبٍ بعالي الجبيني
نفسي لها عشرين عام وجيعه=ويشهد علي ماقلت عوج السنيني
الى تبها نجد واقبل ربيعه=نشوف شيٍ فطَن الغافليني
وبغضت شوف الناس جمعا جميعه=وقمت اتمنا منزل الفرقديني
من ربعنا الادنين شفت الهزيعه=وقد قالوا الناس المغطا يبيني
وشفنا الحقايق واكتشفنا الخديعه=لاشك ضاع الحق يالفاهميني
حقي غدوبه مبغضين الشريعه=غدوبه الانذال يالغانميني
وبنيت رجم وقلت هذا مضيعه=حتى يعرفون الخطا اللا حقيني
لو هو بالايدي كان اخذته قريعه=غصبٍ على الحساد والمبغضيني
وقمت اتذكر فعل راعي البديعه=وقتٍ زمانه شيب المصغريني

 

 

 

 

[معلومات العضو شافي القويسي المخاريم]

يالله يلّلي كل حي يراجيه

يالله يلّلي كل حي يراجيه =يللي بمايخفى علـى الناس علام
يامن دعاه ايوب من جورمافيه=ونجا الخليل وذل عباد الاصنام
تفرج لقلب كاثراتً طواريه =تارد همومه بالحشا فرد واتوام
لوصاح باعلى الصوت يمة مناديه=ماينتبه فكره بجو الفضا حام
ماينتبه من جايرٍ وسط خافيه =زود عناه وشتت افكاره اقسام
كن السعاير بالضماير تحاضيه =ومن العنا كنه على كير فحام
عزي لمن كثر الروابع تناجيه=ان هام شرق ادوى على نقرة الشام
وبالغرب كن معالج القلب يداويه=وعينه بنجم سهيل يوضى بالاظلام
العبديم الخير ربه يمشيه =ان جاد حظه بدل المشي درهام
ابوصي اللي مالقى من يقديه =وصيةٍ تبقى لناسٍ بالارحام
وصيةٍ بيضا تكاشف معانيه =فيها الدليل لنايمٍ مابعد قام
بيتك عن الانذال بعد مبانيه=وقبلك ذياب الخيل عن ديرته شام
وبالك رفيق السؤ حذرا تباريه=ونظف حلالك عن حلال الايتام
ولا تلحق المقفي عبار ومشاريه=انسه ولايلحقك لومه اليالام
ومن لاتحمل زلتك لاتصافيه =خله ولو انه لرفقتك عـزام
وراع الخيانه بالخلا لاتخاويه=ماينومن قلبه على الغدر مريام
وراع النمامه بيناتٍ مواريه =تلقاه عند مدور الحكي خدام
درب الردى ماشيه والحظ مهفيه=اسود ولو ثوبه جديدً من الخام
ياكل عروض الناس وابليس مغويه=عن السفر ممشاه بدروب الاظلام
ومن لايبش بوجه ضيفه وعانيه =ياطا دياره ماوطى ديرة أدهام
رافق عديمٍ جاذباته مجانيه =مجربٍ يضحك حجاجك اليا قام
زعلك يزعل منه ورضاك يرضيه=تلقاه ذخرٍ بالليالي والايام
اللى بعدوانك تكاشف مصاطيه=يجوزله يامدور العرف الاكرام
هذاك ملزومٍ تعزه وتغليه =جلك لحاجاته سريع ومولام
قولولزبن اني على البعد ناخيه=يشوف منيوبٍ على الكود كظام
يشوف من حرالسمايم تصاليه =تجددت شكواه عامٍ باثر عام
همه بصندوق الضماير مخفيه =ومعودٍ قلبه على الكود جزام
شاف الحصيني ماتناتٍ علابيه =وعلى رقاب الحصن ياطا بالاقدام
سبحان من بالكون مكن عراويه=ويقدر بغمضة عين لعراه صرام
بحسناك يامرجع ليعقوب غاليه = تكتب لنا حظٍ يذعذع بالانسام

 

 

 

 

[معلومات العضو شافي القويسي المخاريم]

شى بقلبى يا ملا حايرن فية

شى بقلبى يا ملا حايرن فية=شىء تحير ابة العقول الفهامى
مخفية بفوادى ولا ودى ابدية = وادور الخيرات شرقن وشامى
احترت بة ما شفت شى يحالية= واليوم ابنشد عنة مانى بكامى
سيل حدر مع وادى غير وادية= مدرى حلال ماة والا حرامى
كانة حلال جايزن شرب صافية = وش حللة يا مفسرين الحلامى
هاتوا تفاصيلة وهاتوا معانية = نبى الدليل اللى علية الكلامى
نبى دليلن يفهم الدرب ماشية = يمشى بة التاية بليل الظلامى
يمشى بة التاية ويقدى مواطية = ويشرب قراح الما لياصار ضامى
لا شك هجسى يوم خلا مماشية= انة حرام ومنة زود الاثامى
احرم من الزقوم مرة وحالية = وشربة على الضامىيزيد الهيامى
اللة من قلب همومة تقزية = تدك بة مثل الجراد التهامى
من ما جرى قامت تتلة مشاحية = تل الرشا من فوق هدف المقامى
روابع قامت تصيبة وتخطية = شاف الهوايل واختلاف الاسامى
ما يسمع الداعى اليا قام يدعية= يعوم فى بحر من الهم طامى
ما ينتبة للى بصوتة ينادية = يزيد همة يوم كلن ينامى
يشوف وقتن ما عرفنا توالية = وقت يشّيب منة ابن الفطامى
هذا زمانن كاثرات بلاوية = الغيم يقلب فية عج وكتامى
يا بعد شرب الما على كبد راجية = ما سيل الغبرا زعوج الجهامى
انبيك يا من كلمة الحق ترضية = اعطيكما ينفعك وافهم كلامى
قصرن يذلك لا تقابل مبانية = خلة عسى شامخ طويلة هدامى
خلة عسى ما صاب اغادير يفنية = يودع منازلة الطويلة رجامى
لوزان مدخالة وطالت حوامية = شيّد على الخيبة قليل الرحامى
وحى يوريك المذلة وتغلية = أنا أشهد أنك ميت القلب عامى
من لا يودك لا تودة وترجية = ارفع مقامك يا عزيز المقامى
ارفع مقامك عن عدوك وتوذية = ويلحقك من تركت رفيقك ملامى
حق الرفيق وواجبة لا تخلية = يلزمك مثل الوالدين الحشامى
اختر عزيز الجار والحق يعطية = شبل على هرجن يقولة يحامى
ما دك بة عرج المذلة وطارية = يسبق على فعل الفضيلة شمامى
ومن قارب الاجرب بالامراض يعدية = عدواة تسطى باللحم والعظامى
درب السلامة بيناتن مماشية = ودرب العطب يرث عليك اللكامى
ابعد وقلبك نازح البعد يشفية = وتلقى عن الدار البغيضة مقامى
دارن بدار وداعى الذل عاصية = ولا تقبل الذلة نفوس الكرامى
الذل موت حايمات ضوامية= ادخل على منزل فروض الصيامى
عن مقعد بالذل عينك تراعية = الموت عند الذل امان وسلامى
يرضى المذلة من تردت هقاوية = والذل يجفل منة قلب العصامى
والعبد لة رب عن الناس يغنية =ولولاة ما صاب الهدف كل رامى

 

 

 

 

[معلومات العضو شافي القويسي المخاريم]

الملحمة الزايديه

عفا الله عن قلب يزيد عناه= وداعي غرامه للغرام دعاه
ما طاع عذّال يعذله من الملا= وان سمع عذاله يزيد عناه
الى توسع خاطره ربع ساعه= على الضيق داكوك الهموم نحاه
قلب براه مجادل الظيم والعنا= الظيم من بين الضلوع براه
دع القلب يا عذال خله بغايته=هواك ما يتبع طريق هواه
دع القلب يا عذال عذلك يضره= يزيد يا عاذل عليه شقاه
كونّه الايام لين اوجعنه=وعزي لمن حر الزمن كواه
يكويه من هجر النيا حامي الطنا= يضيق به من ما دهاه حشاه
يحن حنات الخلوج لجنينها= والخلج مفهوم تحن ظناه
ما حزنها حزنه ولا ربع ما به= وحياة من نشّا السحاب بماه
على جادل ما شافت العين مثلها= أحيا بذكرى من هويت لقاه
عشير شرابي من مناظيم مبسمه= يجلا عن القلب الدريك ظماه
أداريه عن شئ يحسه ويغضبه= وإلى زعل يصعب عليّ رضاه
إن دك بي من حامي البين هاجس= وجرعت من حر الغرام طناه
تذكرت من طلاّبة الجود نادر= رفيع الذرا عسر الدروب مشاه
مشى بدرب المجد والنفس تدفعه= إلى شامخ عسر الدروب سماه
خالد سنام الطايلات بن فيصل= حجا من لجابه والزمان وطاه
ابشكي على فرز الوغى جاير الهوا=شطون الشفاوي والشفاوي تاه
قد تاه ببحور الغرام المظلمه=دليل الخطا عن من يريد نحاه
نحاه عن حي يوده من الملا=وما فات من يوم يزيد غلاه
غلاه في قلبي تجدد علايمه= وتكتب على القلب الدريك سماه
اسماه وان عرضت مع الناس صفقّت= محاني فؤادي والحبيب رماه
رماه بسهو المحاجر وجندله= قليل الفزع ظلم الحبيب دهاه
دهاه بالفرقا وقلبي له انتحا= تله ومن بين الضلوع لواه
لواه يوم أنه على الحب يلتوي= ومن دينه دين الجميل أوفاه
أوفيه بالروح العزيزه ولو غلت= روح تبي روح تحب جزاه
أجزاه لو أنه رماني وجادلي= يمحا خطا الغالي عظيم ارضاه
ارضاه يبهج خاطري عقب ضيقته= ويرتاح قلب بالفؤاد فراه
فراه في وسط المحاني وعذّبه= وإن عذّبه سهل عليه دواه
ادواه عنده هو سبايب مصايبه= واشفاه من كوثر نظيم شفاه
أرجيه لو دونه من الناس حاسد= رجاي بالله ما قطعت رجاه
أرجيه لو دونه جموع تصدني= وحبل الرجا يضفي على ارشاه
وقد قيل للعراف في ماضي مضى= = هذا لهذا من هذاك رواه
يمنا بلا يسرا قليل حصيلها= ورجل بلا ربع يخاف اعداه
مهبلك يا باغي من ال*** فزعه= رجواك من عند الجبان سفاه
رفيق الرخا ينسا مودة رفيقه= ليا ضاق به شين الزمان نساه
عوين الدهر ما يامن الجار جانبه= وليا عرضت للشامتين شناه
على داره السودا تبني خيامها= = عوين الدهر شين السواد غشاه
خذ يا لبيب القلب مني وصيه= حميدان في ماضي الزمان لقاه
اختر من الخلان حيّ توده= تسبق على فعل الجميل يداه
دليل على العليا بعيد من الخطا= الطيب في دنيا الحياة إمناه
ما جال في قلبه من الخوف جايل=وإن كاد مرقا الطايلات رقاه
ولا ضعّف النفس العزيزه لجارته= ولا هرولت للمحصنات خطاه
يفرح به العاني ليا حده القصى= وللضيف معسول الكلام نياه
وإن جاك من يمة معاديك ريبه= من قبل ما تاطا عليه وطاه
صديقك صديق له وضدك يضده= وعلى روس عدوانك تدير رحاه
هذاك حطه لك رفيق موالي= عونك ليا زاد الزمان بلاه
ما يفصل القالات الا رجالها= ولا كل من شيد بناه حماه
ولا كل من ركب الجواد عدا بها= على حامي الهيجا وحر لظاه
ولا كل من نوى لدار رحل لها= يموت ما لحق هواه مناه
ولا كل من رام المراجل ينولها= يا عسر مقضبها على يمناه
ولا كل من ركب المطايا غزا بها= ولا كل من رام الغريم قواه
ولا كل من يبرم عهود وفا بها= يطغى على فعل الجميل رداه
ولا كل من ودع لسر يصونه= وكم واحد سر الصديق أبداه
ولا كل من حصل حلال صخا به= يبين بالوقت الشديد صخاه
ولا كل من جالس هل العلم عالم= وكم عالم ضر العباد خطاه
ولا كل من ناله جميل يرده= ولا كل من شاف الحريب نصاه
ولا كل من سل السنان صطا به= يموت وسنانه جضيع إخباه
يا ناشد عني وأنا لي قبيله= لها المجد زايد بالرفاع بناه
وكمّل مقام المجد عامر وشيّده= طريق المعالي للدخيل مشاه
كون جرى يذكر على وضح النقا= الأشراف جضت من عظيم بلاه
مزن تزبر فوق سلى صواعقه= تشظّف من خشوم الجبال حصاه
نشا من ثنايا برك ترعد مخايله= من الشرق عيظ بالصدور حداه
وغرب مخيف يطحن الغيظ والغضب= وما طال من روس الخشوم طماه
أمطر على الأشراف وانهل وابله= عليهم تنثر بالغزير طهاه
قوز الشريف اكبر علايم دلايله= سيله تدفق هد كل نياه
سيله عجاج الخيل والبيض والقنا=وروس النشاما بالحزوم اغثاه
تشهد على ما قلته العامريه= جضت سبيع من عويل ابكاه
تبكي على فتخان الايمان غلمه= تعشوهم اللي بالحروب أعصاه
والضبعه العرجا تعشا بدربهم= وكم ضيفوا ذيب يجر عواه
والطير يلفى البر من ضرب شلفهم= مضاريبهن يعيي الطبيب دواه
وش حل بالاشراف غالب وراجح= اقفو كما صيد حدته إضراه
اقفوا على قب تخافق مع الوطا= تنازا بطوعات الرقاب حذاه
من ولب عطبين السهو إلى زايد= لهم صانع السيف الصقيل حناه
حناه وارهف شذرته يوم كمله= وعطاه لمن هم بالحروب عداه
حيث أنهم يروون حده من العدا= بايمانهم روس الفهود عشاه
إلى عدا فيهم حريب وزارهم= يعدلون بحدود السيوف صغاه
وجريس ما طاله من الظليم طايل= اسود الشرا عمن يبيه حجاه
اسود الشرا بالضيق تنجي دخيلهم= ويروون من دم الرقاب ضباه
فكوه ثم اغنوه يوم انه التجا= وجه بن بدران يزيد ضياه
تجمل مع جريس اليماني وعزه= الزايدي يوم الدخيل عداه
يشهد لعامر ما مضى من فعايله= يوم أن غالب بالجموع نصاه
يبي دخيل البيت ما خاف خالقه= دخيل عطبين السهوم إرماه
واقفا ذليل يتبع السير بالسرا= وحرب عناله بالفؤاد شكاه
اقفا مثل ما جا وهو يشكي العما= اقفا من الذلة يجر قفاه
عيب على مثله ليا هد ينثني= تبدل من عقب الهدير إرغاه
وابن صباح اذروه وبن خليفه= رمح آل زايد ظلهم بإفياه
اخذ ثارهم من ضدهم يوم كادهم= رمح من العز القديم عصاه
يشهد به الهدار واللي جرابه= دخيلهم ثاره عطوه قضاه
فكو حقوق للدخيل بن وايل= جميلية نالو حقوق وجاه
من ضرب من لا صدو عن حريبهم= يصكون بجباه الخصيم جباه
دخيلهم بأعلى السما كن منزله=له بين نجم الفرقدين متاه
كنه بجنات تظله غصونها= والنايف الطايل يحل رباه
تعلو لعرش المجد من قوم عزمهم= مصابيح ظلمات تزيح دجاه
مراجيم عدوان مرابيع ملتجي= ليا جف من وبل المزون ثراه
إلى قطبت عسر السنين وجدّبت= ولا عاد يذكر بالرياض كماه
يهوشون بوجيه تكاشف من النقا= والضيق ما يقصر عليه إقراه
يا ناشد عني وانا لي قبيله= قصر الندا زادوا عليه بناه
اشادو فعول بالفضايل وسلمهم= للجار كل باللسان حكاه
بني زايد أدو جارهم من جداره= ولحد من اسباب الآله وداه
لهم وادي سهل الدروب ودونه= نار ينزح عن احماه سناه
سناه مصقول الحديد الصافي= وعزم القلوب الصاطيات لظاه
عذروبهم للضيف ترخص نفوسهم= والجار مضمون السلام إغطاه
وجه الندا يندا كما ماطر الحيا= يبين عند الموجبات نداه
تعيّي على الشيمات حفاظة الشيم= وجه الندا لازم يبش حياه
قصيرهم يارد على العد قبلهم= ولا شكا يوم الورود ظماه
إن زادت سنينه تجدد معزته= وكل خطا جاره عليه رفاه
وإن ذبح منهم خير عند وجهه = وكسب الفضيله بالحياه إمناه
على الطيب شبان وشيب تزاحمو= والطيب يتعب للرجال مداه
دواسر كنيو على دوسر الفحل = واسم على فعل يبين إقداه
من الهضب إلى الافلاج مكدين ضدهم= وحريبهم مر المذاق عشاه
واد العقيق مطهرين جنابه= ولا ديس بين العالمين إحماه
من عصر بن بدران هاذي ديارهم= والدار محد للخصيم عطاه
من الفرعه العليا إلى الخرج حدهم= به الجار ما كدر عليه صفاه
راسين مثل جبال هضب آل زايد= وهم ليا شان الزمان حماه
حموه يوم أن القنا يقرع القنا= ولمثلهم رب العباد بناه
الدار ما تصلح لمن لا يصونها=الدار عوره والرجال إرداه
دار خذوها بالمراهيف عنوه= وهم نورها الساطع ينير إضياه
بني عقيل اخلو مغاني ديارهم= بعد دمهم بأرض العقيق سقاه
من غلمة ما باعو العز والشرف= يوم الردي فعل الجميل نساه
تشهد مشاريف اليمامه بفعلهم= فعل تعد العالمين ثناه
فعل على فعل تحاكا به العرب= مجد يكذب من يعد ثناه
هرج بفعل يشبه الماس بالذهب= وهرج بلا فعل يقال سفاه
نعد قول ما تكذب مثايله= روايه أصدق من طيور قطاه
نعد مجد الطيبين وفعلهم= وأذكار فعل الطيبين طراه
من رام فعل الغانمين وشانهم= السيف يروي من عداه شباه
من رام فعل الغانمين وسلمهم= الجار عن الخصم العظيم وقاه
من رام فعل الطيبين وقدرهم= يبذل ليا ضاق الزمان فضاه
إن كف همال الحيا وامحل الوطا= وشحشح عن الطفل الرضيع غذاه
يكرم ليا ضاقت على الناس وامحلو= ويصبر ليا من الزمان وطاه
ال*** ما يقدر على طيّب الثنا= والليل ما يشبه صدوق ضحاه
يجود الفتى بالجود من زايد الحيا= يخاف من بالعايبات قفاه
قولو لطلاّب الثنا يتبع النقا= ولا يلحق العرض النزيه شناه
ومن سار بدروب الردى زاره الخنا= ويلبس من اسلاب السواد كساه
ابعد عن الانذال واترك ديارهم= يفكك من الوجه الخبيث نياه
الاجواد ايات الندى في وجيهها= والانذال شري ما يذاق جناه
الاجواد ما تنوي بك البوق والردى= والانذال غيب ما يعد غياه
الاجواد فعل الخير لذة نفوسهم= والانذال ملزوم يشاف خناه
الاجواد جنات تعاقب نهورها= والانذال صلدا من صخور صفاه
الاجواد تاصف لك طريق يدلك= والأنذال لعسرات الدروب إقداه
الاجواد مثل الورد عطر روايحه= والأنذال زقوم يطير سفاه
الاجواد فيهم باب يسر ومعزه= والانذال عسر ما عليه شقاه
الاجواد زلة جارهم يدمحونها= والانذال تجزا الاقربين جناه
الاجواد مثل النهر حلو شرابه= والانذال صبخاة ملاح ماه
الاجواد تبذل فضلها دون عرضها= والانذال دنسين العروض عراه
الاجواد مثل الريف سعد سعوده=والانذال قحط الزمهرير شتاه
الاجواد تامن شرهم وانت عندهم= والانذال شر ما يطيب بلاه
الاجواد مثل الصبح تمشي بنوره= والانذال ليل مظلم ممساه
الاجواد حباة الندى يبذرونها=والانذال تبذر بالرخيص رياه
الاجواد فعول الخير ما يجحدونها= والانذال حزم ما يطيب حفاه
الاجواد ما تلحق عزيز مذمه= والانذال تنطق بالصديق زراه
الاجواد عز الجار والضيف سلمهم= والانذال بعيون العزيز قذاه
من طاوع النفس الذليله على الردى= يرخص ويظهر للرجال خفاه
من طاوع النفس الذليله على الردى= ينسى الجار والضيف العزيز جفاه
من طاوع النفس الذليله على الردى= يرخص ويظهر للرجال رداه
من طاوع النفس الذليله على الردى= تقصر عن العز الرفيع خطاه
يموت طلاب التماني على الشقا= سراب دوّ والظلال غطاه
يموت طلاب التماني ومكسبه= كما صايح صوته يرد صداه
يموت طلاب التماني ومثله= من يرجي الحنظل يزين نماه
يموت طلاب التماني بحسرته= وكثر التماني ما تعيد صباه
أبا التماني ولا تمنّى وخلها= ترى التماني والحلوم اشباه
يقولها لك من هوا القلب عذبه= وداعي غرامه للغرام دعاه