قصيدة ناصر الفراعنه في رثاء ابنه ..

[معلومات العضو وليد البدراني]

السلام عليكم ورحمة الله

قد يستغرب الناس كيف يرثي انسان ابنه وقد ولد ميتا ولم يره امامه وليس له ذكريات معه الا انني هنا رأيت ذكريات أغفلها الشعراء وليس هناك من لم تمر عليه وهذه القصيدة رثاء في مولودي وهدية مني إلى أمه ربط الله على قلبها وعوضها فيه وجعله شفيعا لأبويه .. القصيدة مرثية طويلة تعددت اغراضها من رثاء الى تبصر في الزمان الى حكم والفلسفة .. (( ناصر الفراعنه ))



ما أراني فاعلاً في الليـل إن أرخـى سدولـه
ما أراني فاعلاً والصبح قـد حـان احتضـاره

طفلي اللي مات في اول يوم مـا ذاق الطفولـه
عاجله سهم القـدر واختـاره الله فـي جـواره

طفلي اللي مات في غمضة طرف ما حال حوله
يوم عمر الآدمـي مـا كـان يومـاً باختيـاره

يا وجودي يوم لفّـوا شاحـب الأكفـان حولـه
مـا تقـول إلا شظيّـة لؤلـؤٍ داخـل محـاره

يا وجودي يوم أطالع فيه,في عرضـه وطولـه
تنتحر في العيـن منـي دمعـةٍ كنْهـا شـراره

نفس عين آبوي عينه بل ونفس الـزول زولـه
وبالأماره, فيه مـن عمه(شبيـبٍ) كـم أمـاره

جابه الله مثـل هتّـان المطـر ساعـة هطولـه
ديـمٍ احيـا بهجـة امـه تـارةٍ وآبـوه تـاره

ويوم شاف الشرّ من صوب آهلهْ يشعب ذلولـه
حطّ دون صدورهم صدره من الرحمـه ستـاره

ومات تـوّي مـا بعـد بإيـديّ لبّستـه نعولـه
مات توّي ما بعـد ساويـت فـي ثوبـه زراره

كنّ عينه يوم مات تقول:بابا, ويـش هـو لـه
يوم تبكي وانت تدري مين انـا ذلحيـن جـاره

كلنا راحل وخيـر النـاس مـن زوّد رحولـه
باغتنام الصالحـات وكـلّ كسـرٍ لـه جبـاره

طفلي اللي صوّبت كبده قبـل ساعـة وصولـه
بندقٍ من عين حاسد واودعـت قلبـي طشـاره

يا وجودي ما لقيت أنسـب لمولـودي مقولـه
من مقولة: يا وجه صبحٍ تحـرّر مـن خمـاره

أو ثغـر بـرقٍ تهامـيٍّ تبسّـم فـي ثعـولـه
ضوح مصباحه عليـه يـورّد النجـدي بكـاره

يوم اشيله ما تقول اشيـل شـيٍّ مـن نحولـه
آتشمّم ريحته - مـن فجعـة القلـب - بحـراره

يوم جيت العب معاه وغاب قلبي مـن ذهولـه
يوم ما شفته تبسّم لـي وانـا فـي اول زيـاره

قمت أحدث عنه نفسي والعرب حولي وحوله
ليت ما هو ميْتٍ إلا ميت ما تبغـى استشـاره

اتْخنقنـي عبرتـي يـوم آتذكّـر مـا تقـولـه
عنه أمّـه يـوم أنـا فـي ديـرةٍ ماهيـب داره

آتذكّر يوم هو فـي بطنهـا يحـرّك رجولـه
وانتعيرّ:ليت مـا هـو أقشـرٍ لبّـى القشـاره

كم سهرنا معه ليلـه كاملـه مـن كبـر هولـه
لين صرنا نعَرْف موعد قومتـه داخـل قـراره

وان تأخّر ما صحى في موعده قمنـا نصولـه
ننغزه يا مـن يميـن البطـن وإلا مـن يسـاره

ما نبي شيْ بسْ نبي نضحك علـى ردّة فعولـه
ننغزه ويفز خايـف مـا درى ويـش العبـاره

من يدي غيمة على أيـدي الملائكـة محمولـه
غيمةٍ من نـور مـا تشبـه نضارتهـا نضـاره

يا إلاهٍ كل ما فـي الأرض طـراً سبّحـوا لـه
شفّعـه فينـا غـداً واجعلـه لابوانـه بشـاره

فـي نهـارٍ فيـه أعنـاق الشياطيـن مغلولـه
يتلقّفنـا مثـل مـا يلقـف الحـاوي صـراره




- قصيدة حزينة ومبكيه ، لم اتحمل قراءة ابياتها وكذلكـ الوصف الذي اتى به الشاعر ،،
جعله الله شفيعاً لوالديه يوم القيامه وأسأله تعالى ان يربط على قلب امه وان يعوضهم خيراً مما فقدوا

 

 

 

 

[معلومات العضو محمد الولامين]

صح لسان الشاعر

ولا يهون من جاب القصيده


بيض الله وجهك يا وليد

تحياتي