شايب يشكي عقوق ابنائه - قصه وقصيدة

[معلومات العضو الشقرديه]

شايب يشكي عقوق ابنائه - قصه وقصيدة ------------------------------------------------------ شايب يشكي عقوق ابنائه -قصه وقصيده اخواني الكرام السلام عليكم ورحمة الله وبركاته اخواني فيه سالفة من قديم الزمن صارت لشايب عود يوم ان الله يمنعنا وياكم عقوه عياله وفسلوا فيه بعد ما ربى وكبر وتعذب وتصبر جاه مقصرين الاعمار عياله وسوا فيه شيء ما يرتضيه لا الله ولا خلقه . وهذي قصتهم , هذا الشايب كان له ثلاث عيال ماتت امهم وهم صغار وعيا الاب يتزوج من ثانيه خائف على عياله منها تعذبهم وتشقيهم و تضيقهم فالشايب ربى عياله وتعب عليهم وكان يطلع من الصبح ولا يرجع الى بالليل عشان يؤمن لهم ما ياكلونه واكثر المرات يتاخر على شأن يوفر لهم الزاد وكان كل ماطلع خلاهم عند جاره يلعبون مع عياله واذا جاء من المقناص سوالهم العشى وعشاهم وكان ما يتعشى الا اذا شبعوا عياله وياكل من تالي الزاد. ودار الزمن وكبروا العيال وزوجهم ابوهم وشاب الاب الشهم ودار الزمن عليه ولا عاده يقدر على القومه والطلعه الا بمساعدت احد عياله المهم قامو زوجات عياله يشكون منه ويتذمرون من خدمته لا زواجهم الين اجتمعوا العيال وكل يقول للثاني خله عندك حتى اجتمعوا الله لا يبارك فيهم على راي واحد انهم يطردون ابيهم يوم طردوه فمالقا غير جاره وعيال جاره الاولين هل الطيب والعلوم الجيدة ورعوه واكرموه وطيبوا مكانه كأنهم عياله وقال الاب القصيده هذي ودعوته المشهوره فيها فالله سبحانه انتقم من عياله اللي فسلوا في والدهم فماتوا كلهم بعد ما دعى عليهم ولا واحد منهم خلف له ولد وانقطع ذكرهم ونسلهم فحسبي الله ونعم الوكيل فيهم ناكرين الجميل وعاقين والدهم (الله يحفظ لنا هلنا والدينا ويعينا على طاعتهم وارضاهم) وهذه القصيده قالها في عياله العاقين :

قــال الــذي يـقـرا بـلـيـا مكـاتـيـب =ياللي تقرون العمى مـن عناكـم
يـا عيـالـي الـلـي تشـرفـون المراقـيـب =تريضوا لي واقصروا من خطاكم
خــذو كــلام الـصـدق مـابـه تكـاذيـب =مثل السند مضموم للـي وراكـم
يـا عيـال لا صرتـوا ضـيـوف ومعـازيـب =ترى الكلام الزين ملحـة قراكـم
وتـروا السبـابـه مــن كـبـار العـذاريـب =وهرج البلايس ما يطول لحاكـم
المذهـب الطـيـب فـهـو مـذهـب الطـيـب =والمذهب الخايب يبـور نساكـم
يــا عـيـال مــا سرحتـكـم باللواهـيـب =يا عيال ما عمر المعزب ولاكـم
يـامـا تولـيـت القبـايـل تـقــل ذيـــب=من خوف لا ينقص عليكم عشاكم
وياما شريت السمـن مـن عـرض مـا جيـب=يفزقلبـي يـوم يبكـي حـداكـم
ويامـا قطعـت مــن الفيـافـي العباعـيـب=ندور من صيد البراري غذاكـم
يـا عيـال دوكــم لحيـتـي كلـهـا شـيـب=هذا زمان قعودنـا فـي ذراكـم
قـمــت اتـوكــا عـــوج المصـالـيـب=قصرت خطانا يوم طالت خطاكم
عطـونـي القـرضـه علـيـكـم مطـالـيـب=عطوني القرضة جزى من جزاكم
لابــد يــوم عــاوي دونـــي الـذيــب=بالقبر ما افرق طيبكم من رداكـم
مـانـي بفاضحـكـم بـوســط الاجـانـيـب=با عمالكم يدرون كـل اقرباكـم
لـو كــان تــدرون الــردي والمعايـيـب=صرتوا مع المخلوق مثل خوياكم
خوالـكـم بالطـيـب تـــروي المغـالـيـب=ولو تتبعون الجـد محـد شناكـم
وش علمـكـم يــا تاركـيـن المـواجـيـب=حسبي عليكم هالردى وين جاكـم
يالله عـسـى اعمـاركـم شمسـهـا تـغـيـب=يعتم قمركم ثـم تظلـم سماكـم
يــا علـكـم فــي حامـيـات اللـواهـيـب=ياللي على الوالد خبيـث لغاكـم
شفـت الجفـا والحيـف والغـلـب والـريـب=بضلوعكم لا بيض الله قراكـم
اطلـب عسـى نساكـم مـا تحمـل ولا تجيـب=ولا احد من الوغدان يمشي وراكم
اخـسـوا خسيـتـوا يــا كـبـار اللغابـيـب=اهبوا هبيتـوا يقطـع الله نماكـم

منــــــــــــــــــــــــــــقول




الشقــــــــــرديه

 

 

 

 

[معلومات العضو ابوهاجر الدوسري]

أحســنتي أختي الشقــرديه. علــى هــذا المــوضوع الـذي أنزل مــن عينــي العــبرات والحــزن الشــديد,,,,

فألله المستعان ,,, الله المستعان ,,, جزاكي الله خير الجزاء,,,

 

 

 

 

[معلومات العضو الشقرديه]

يعطيك العافيه ابوبندرالحطيم على المرورلاهنت

 

 

 

 

[معلومات العضو ابن حنيش الودعاني]

يالله ترضى علينا وتجعلنا بارين بوالدينا
اشكرك يالشقرديه

 

 

 

 

[معلومات العضو الشقرديه]

الف شكر ابن حنيش الودعاني لاهنت

 

 

 

 

[معلومات العضو بنت صقور]

الله يحفظ لنا أهلنا ووالدينا ويعينا على طاعتهم وارضاهم ..حسبي الله ونعم الوكيل..يعطيك العافيه اختي .. اختك: بنت صقور..

 

 

 

 

[معلومات العضو أبو عبد السلام]

اشكرك يالشقرديه

 

 

 

 

[معلومات العضو غازي المسعري]

الشقردية

يالله ترضى علينا وتجعلنا بارين بوالدينا

تقبلي خالص تحياتي

 

 

 

 

[معلومات العضو فهدالمحيسن]

جزاك الله خير

 

 

 

 

[معلومات العضو الشقرديه]

اشكرالجميع على مرورهم تسلمون..

 

 

 

 

[معلومات العضو دوسري خطيير]

لا حول ولا قوة إلا بالله

بس القصيده والله حلوه

 

 

 

 

[معلومات العضو الشقرديه]

دوسري خطير لاهنت على مرورك

 

 

 

 

[معلومات العضو دغش محمد الصخابرة]

لا حول ولا قوة إلا بالله,,,

اللهم اجعلنا من البارين في الوالدين والله يعينا على طاعتهم ورضائهم,,

ويطول بعمارهم .....

جزاك الله خير ,,,,وجعله الله في موازين حسناتك........


ودمتم بحفظ الرحمن........

 

 

 

 

[معلومات العضو ابومبخوت الدوسري]

لا حول ولا قوة إلا بالله,,, جزاك الله خير ,,,,وجعله الله في موازين حسناتك........ تحيـــــاتي وتقديــــري

 

 

 

 

[معلومات العضو الشقرديه]

لاهنت اخوي دغش على المرور