الشاعر عبد الرحمن الصخرة ( حزين الحرف)

[معلومات العضو يحيى الودعاني]

	قرأت في هذا المنتدى قصيدة للمهندس مبارك بن سالم الخميس وسمعتها منه مبارشرة وقد قالها قبل حوالي خمسة عشر سنة حينما كان يدرس في قصم الهندسة الكيميائية بجامعة الملك سعود وبما أني امر بهذه المرحلة الجامعية احببت أن اجاريه اتمنى أن يعجبكم الصوت والصدى القصيدة الأولى لأخوي مبارك ياطير ياللي في السما رافع الريـش=وقف على هونـك وشفنـي وسلـم هنيكـم يـاذا الطيـور المطاريـش=تطير فـي جـو سمـردح بـلا هـم تقبل وتقفي فيه مـن غيـر تفتيـش=من وين ما تبغي يقول الهـوى سـم فيا طير لك سبق وانا كـود ماليـش=فارجوك تاخـذ ذا الرسالـة وترحـم وبلغ سلامـي للربـوع المداغيـش=ربعي هل الوادي ترى الحـال مغتـم وارحم ترى ياطيـر ماعـاد منيـش=فمنه مثل حالـي فـلا شـك يرحـم فالقلب يرقـل كـن رقلـه دناديـش=والدمع من حسي الجفن قل ثـم جـم والشوك ما يطلـع ولـو بالمناقيـش=شوك البعد في خاطري كنـه السـم وجدي عليهم وجد زيـن النقاريـش=علـى وليـف عقبـه الحـال مغتـم وشوقي لهم شوق السيوف المعاطيش=لامن ظمت ما ترتـوي غيـر بالـدم فيا واسعد منه على الـوادي يعيـش=فمن راح له وهـو مريـض بيسلـم دار نبتها الورد ما هـوب بالحيـش=ورد اليـا شفتـه لشوفـك تبـسـم وشجر غصونه لاتحرك كما الريـش=ونخل ظلالـه يبعـد الحـزن والهـم أما ردي المتواضع فهو سلام يا شاعر رفيعٍ عن الطيش = حبيت أجاري بالقصيدة وأسلم شعره رزينٍ ينعش القلب تنعيش = أنشهد أنه بالشعر يغرف بيم أقولها صادق ولا فيه تغشيش = وماهو على شانه قريب وولد عم بالذْهب أبي أنقش قصايده تنقيش = ثمٍٍ أعلقهاعلى شان تعلم هيضت قلبٍ في الهوى ما بعد نيش = وخليت خفاقي متيم ومغرم وياليت للعشاق مخفر وشاويش = وقاضي دعاوي بشرع الأسلام يحكم وياوين طيرٍ شغلته كالدراويش = اللي قضى ملزمك أبي منه ملزم طيرٍ سنافي ما يماشي الخفافيش = عساه سالم ما عمل فيه مؤتم بأعطيه حقه وإن بغى زود بخشيش=يبشر ويامرني وأنا اقول له تم ميل على الوادي ولا تقول لي ليش = أنهج علي يا طيري لا لا توثم رجلي على مجمار وإيدي وسط فيش = ونار الوله في داخل القلب تظرم والحزن أرسل لي سرايا مع جيش = قاومتناها مير سيفي تثلم والنفس مسدودة تعاف المعاويش = مذاقها في داخل الفم علقم والقلب كنه دق وسطه شواكيش = والهم في أقصى المعاليق خيم وكن الأفاعي تعرش القلب تعريش = وتظغط على صدرٍ كسيرٍ مهشم يا حيةٍ رقطا عليها قراقيش = قولي حزين الحرف وش لون يسلم ذكراه عشش داخل القلب تعشيش= وادي الدواسر لا لفيته جلى الهم ربعٍ معاهم ذقتنا الملح والعيش = وأدعي أنا ربي عسى الشمل يلتم لبسوا ثياب العز لبس الدشاديش = عيال زايد محزم اللي تحزم يا جعل نبته فوق أرضه مفاريش = من عقب وسميٍ علينا يغيم وهواءٍ طبيعي ما تكزه كناديش = والبدر نورة يجلي الليل الأظلم والجو هادي ما يجي فيه تشويش = والطير من وسع الصدر به ترنم أتمنى أن تنال هاتين القصيدتين اعجابكم وتقبلوا تحياتي أخوكم حزين الحرف عبد الرحمن سعد الصخرة منقول

 

 

 

 

[معلومات العضو الشكري]

يحيى الودعاني صح لسانك

ولسان الشاعر المهندس مبارك بن سالم


ولا هنت طال عمرك على نقل الصوت والصدى

وعز الله انه وافي طالت اعماركم



ابو عبد الله الشكري

 

 

 

 

[معلومات العضو العاصف 15]

صح لسان المهندس مبارك

وصح لسانك أخي يحيى الودعاني

ولاهنت على النقل والعرض والمحاولة الرائعة وإلى الأمام

تقبل تحياتي

 

 

 

 

[معلومات العضو أبوفهيد الودعاني]

المشاركة الأصلية كتبت بواسطة الشكري

يحيى الودعاني صح لسانك

ولسان الشاعر المهندس مبارك بن سالم


ولا هنت طال عمرك على نقل الصوت والصدى

وعز الله انه وافي طالت اعماركم



ابو عبد الله الشكري

بيض الله وجهك يايحيى

ولاتبطي بجديدك ،،،،

 

 

 

 

[معلومات العضو يحيى الودعاني]

مرحبا بخوي الشكري
واخوي العاصف
واخوي البراق

حياكم الله وماقصرتوا .