قصيده للشاعر عيدان ومجاراتي لها

[معلومات العضو محمد بن محسن بن حشفل]

من ما قال الشاعر عيدان بن راجس الهوامله في 1/7/1417هـ وقد جريتها بقصيده اخرى تبين وجهة نظري في ما قال وهو يقول

يا زين سجات الربيع وشينها=واللي لهم ثار ٍمضى عارفينها
تزين لا زان الزمان وتناشعوا=وتشين لامنه تفرق ضعينها
شدوا عقب جمعا الربيع وتفرقوا=بدو ٍ بعيدٍ ديرةٍ منتوينها
الله يعين االلي غدوا له بذاهبه=بعد ما مسك حبل العهد من يمينها
يتعبك طرد الذاهبه ما لقيتها=ولا تعطي اسرارك حدٍ يستعينها
مثل ما جرالي عام الاول وجدده=هنوفٍ هواها الصلف يذبح خدينها
على مستوى ٍشيخان اهلها عمامها=تقاليد اهلها بالمكارم تدينها
اليا جيتها فزت وهلت وسلمت=تعرف السلوم وهي قليل ٍ سنينها
واليا قابلت يشفيك لذة حديثها=تلطف كما الام الحنون لجنينها
وزين تماري به فتايات حيها=حوريه المنشا شقي ٍ قرينها
فيها من الريمي عيونه وعاتقه=وفيها من المهرة هوسها وزينها
عمهوجةٍ تغني عن المال والملا=ينساق فيها من غوالي ثمينها
الا وهني من ظافها في هويته=مواري علامات السعد في جبينها
مير البلا من دونها وقف الرجا=بني عمها الادنين متحاسدينها
ولا لي جدى الا ونة لا ذكرتها=كما ونة المصغر بتالي حنينها
على الكبد منها جاير ٍ ما تحمله=الا انه تمكن حبها في متينها
وانا عارفٍ اللي بها مثل مابنا=جاب الخبر عند الموادع ونينها
وراحت وخلتني تطارد روابعي=ما بين هزلات الامور وسمينها
قولوا لها تكفون ياللي تجونها=ترد البرى ولا تزاور سجينها
لولا محنتها من الراس جيتها=واخاف من كلمة عدو ٍ تهينها
وهي بعد تستاهل اللي يحنها=تحما كرامتها مع اركان دينها
سلامي عليها كل ما جاء مجالها=تزفها لها ارياح الصبا من خدينها

وهاذي مجاراتي لها في 15/7/1417هـ

يا بو فهد نفسك عسى الله يعينها=على اللي سقاها الوجد واظهر زكينها
تبيّن علوم ٍ ذكرها يبحث الخفا=ومن كان جربها فلا يستهينها
بطرد الذهيب اللي صدف لك ظياعها=واهلها عن عيون العرب حافظينها
مدامك تقول انه بها وقف الرجا=بني عمها الادنين متحاسدينها
فنا اقول ياعيدان يا راعي الوفا=هذي والله اللي لاتدوّر عوينها
عوينك بها ربٍ مجيبٍ لسائله=اليا من طلبته طلبةٍ هو ظمينها
ومن ذي مزاياها وهذي وصوفها=مع جيلنا التالي قليلٍ وزينها
لا هيب لا تشرى ولا هيب تنعطى=ولا همب مع مع جاه العرب مرخصينها
تلوى بقوم ٍ كل منهم يبيها=واسود الحمى ماحدٍ بيقرب عرينها
ولا ينطمع يكون فيها ومثلها=مناةٍ على عسر اليالي ولينها
مع ان الهوى ذا الوقت كثرت مشاكله=كبود العوارف به تبيّح كنينها
كثير العرب خرب مجاله وسمعته=سمعوا عن علومه وجو مطلبينها
ناس ٍ تلجلج به كما لجة العجم=يصعب على العارف يميّز رطينها
ينعاف واللي ما يعيفه ويتركه=تبع له سلوم ٍ مثلهم جاهلينها
سلوم ٍ عزيز ٍ النفس يترك مجالها=ما ينكشف لاهل المعزه دفينها
تشوم النفوس اللي تبي منزل الشرف=هل السمعة اللي دايم ٍ محتمينها
وانا ابنصحك كانك بتسمع نصيحتي=نصيحة وفاً ماغتر فيها فطينها
اليا شفت لك خاطي هنوف منعته=اهلها بزين دلولها ناتبينها
ولانتب تشوف انك بتقدر وصولها=لو تزين في حال ٍ ترى البعد شينها
غض النظر عنها وجنب طريقها=ولا تحط عهدٍ بين نفسك وبينها
تراها فواتٍ لاتعلق بها الرجا=لابد ما تقفي لونك ضنينها
واليوم ذا راييي وهذي نصيحتي=ونفسك على ماصابها الله يعينها

وسلامتكم جميعاً

 

 

 

 

[معلومات العضو مسفر المصارير]

الشاعر المبدع : محمد بن محسن بن حشفل

صح الله ألسانك يا القرم

و ألسان الشاعر : عيدان الهوامله

لا هنت على ايراد القصايد لنا يا بو محمد

تقبل تحياتي

 

 

 

 

[معلومات العضو العماني]

صح الله لسانك يابومحسن وصح لسان الشاعر الكبير ابوفهد وقصايدكم والله كلها جزله وكل وحده ازين من الثانيه

وبيض الله وجهك يابومحسن والله لايهينك على ايراد هذه القصائد الطيبه

تقبل تحياتي،،

 

 

 

 

[معلومات العضو محمد بن محسن بن حشفل]

اشكر جميع من اطلعوا وعقبوا على هذه القصيده الله يبيض وجيهكم جميعا

 

 

 

 

[معلومات العضو مطلق الحصان آل عمار]

صح لسان الشاعر/ عيدان

وصح لسان يابوحشفل

قصيدتين رائعتين

ابديت وجهه نظرك

واوضحت مافعل هذى الجيل بمعنى الحب

تحيااااااتي لك وتقديري

اخوك/ مطلق الحصان

 

 

 

 

[معلومات العضو شافي القويسي المخاريم]

 

 

 

 

[معلومات العضو سالم بن صمهود]

صح الله اللسنت الشاعرين المبدعين مع الني ما اعلق على الغزليات الا ان الطيب يفرض نفسه

 

 

 

 

[معلومات العضو الشـيخه]

ابدعتو الله يعطيكم العافيه مجاراة جزله صح لسانكم ولاهنتو

 

 

 

 

[معلومات العضو نادر الناهشي]

ابومحسن

مجاراه جميله وقصيدتين وافيه صح لسانك والشاعر

عيدان

 

 

 

 

[معلومات العضو ابن الّمنع]

مجاره جميله