حسن في رثاء اخوه فهد ال ناهش

[معلومات العضو القناص 502]

اقدم لكم مرثية كتبها الرائد طبيب:حسن ماجد حسن الناهش
في شقيقه الشاعر النقيب:فهد ماجد حسن ال ناهش رحمه الله


يا جز قلبي ويا ونيني مـن اقصـاه
ويا حر كبدي ويـا تفطّـر حشايـا
آهٍ عـــلــــى آهٍ وآهٍ ورى آه
وآهٍ بقلبـي تشتعـل بـي صـلايـا
لا والله اللـي راح فهـدٍ واويــلاه
لا والله اللـي راح سهـم المنـايـا
ياكسر ظهري ياعرب عقـب فرقـاه
ذا محزمـي ذا مسنـدي ذا رجايـا
يا وجد وجدي وجد رجلٍ على مـاه
تحاوطـوه القـوم باقصـى النحايـا
عابوا رجوله واقطعوا كـف يمنـاه
واخـذوا بناتـه مـن يدينـه سبايـا
ويا وجد وجدي وجد حسنٍ على أخاه
وجـد يتوجّـد بـه كبيـر البلايـا
يا حافرين القبـر وسعّـوا زوايـاه
تراه أبـو ماجـد جزيـل العطايـا
ويا للي تشيلونه على الرفق ممشـاه
تراه يا مـا شـال حمـل المطايـا
وحطوه عاليمّه عسى الخيـر ملفـاه
واحموه م التربان راعـي الحمايـا
وعليكـم بستـره ولا يقصـر رداه
تراه غاض الطرف ستـر الصبايـا
ولا من كشفتوا راسه أعلوا محيّـاه
تـراه قبـل اليـوم راسـه علايـا
وصبوا على قبره من الماء ما يرواه
تـراه مـروي يابسـيـن الشفـايـا
وادعوا عسى ربي يبيحه ويرضـاه
ويجعل صحافه مـن ذنوبـه نقايـا
والحين... خلوني أنا شـوي ويـاه
عندي مع أخويـه عتـاب وحكايـا
يا خوي رحت وخاطري جاه ماجـاه
وانـا الكبيـر ودايـم أنـت ورايـا
ودايـم تقدمّنـي وذا الليـل عـزّاه
خليتنـي عقبـك أشيـل الـرزايـا
ودايم وانـا ويـاك شـورٍ وملـواه
وذا الليل ما ردّيـت شـورٍ و رايـا
واليـا ناديتـك مـن يـرد المنـاداه
وإنْ جيت أبشكي من يجاوب شكايـا
ويا كيف أسج بخاطري مانتب هنـاه
ولميـن ابيّّـح يـا بوماجـد خفايـا
وإليا كتبت القـاف وشلـون تقـراه
وإنْ جيت أوصّي من يحفظ الوصايا
وإنْ شفتنا عيالك يا كبـدي واحـراه
شفت اللي من زولك غدوا لي بقايـا
يا خوي قللي أخوك وش له بدنيـاه
دنيـا دنيّـه مـا بهـا إلا الدنـايـا
جريّت قلبي يـا فهـد مـن ركايـاه
وأدميـت مابيـن الضلـوع الحنايـا
أبكيـك وليتـه ينفـع الحـر مبكـاه
مير البلا مـا يـرد زولـك بكايـا
تبكيك عيني وخافقـي يقطـر دمـاه
ويبكي معي يا خـوك كـل البرايـا
ويبكي معي يا خـوك دلال مزهّـاه
عودّتهـا للضيـف تأتـي مـلايـا
ويبكي معي يا خـوك حيـلٍ منقّـاه
ضرّيتها كـل يـوم فيهـا ضحايـا
وتبكي معي اعيون ويديـن وشفـاه
جنّـك ضمايـا وصدرنّـك روايـا
يا من ملكت قلوب نـاسٍٍ لهـا جـاه
يا مـن حبـاك الله بزيـن السجايـا
فزعوا الدواسر سمعوا الذيب وعواه
من طيب فعلك حوّلـوا لـك حفايـا
كـل العـرب يـا خـوك والله والله
كله لأجل عينـك تصافّـوا سرايـا
حملك ثقيـلٍ يـا بوماجـد وشلنـاه
والله يصبّرنـي ويجـبـر عـزايـا
هـذا الفتـى مثلـه قليـلٍ بالاشبـاه
ياليت عيـال الـلاش دونـه فدايـا
حاز الفخر والعز من كسـب يمنـاه
وكسـب الثنايـا مايجـي بالنـوايـا
يا لله عسى الفردوس بيتـه ومثـواه
يـا لله يـا ربّـي تقـبّـل دعـايـا


حسن بن ماجد ال ناهش الدوسري

 

 

 

 

[معلومات العضو ناصر فياض الودعاني]

لله ما أعطى وله ما أخذ يا أخي القناص

فلنصبر ولنحتسب

اللهم اغفر له وارحمه, وعافه واعف عنه . اللهم اغسله بالماء والثلج والبرد . اللهم أبدله داراً خيراً من داره وأهلاً . خيراً من أهله . اللهم اجعل قبره روضة من رياض الجنة . ولا تجعله حفرة من حفر النار . اللهم افسح له في قبره مد البصر, وآنسه بعمله الصالح . وتقبله عندك في الصالحين . وارزق أهله الصبر على موته
آمين

عزالله ان ابو ماجد فقيدة على الجميع الله يبيح منه ويتجاوز عنه

صح الله لسانك اخوي حسن على هالمرثية في فقيدنا كلنا البطل المرحوم فهد

ولاهنت يالقناص على النقل

تقبل مروري بكل ود..