((ياتل قلبي تلة الجمس مع خط ))

[معلومات العضو عبدالرحمن الشرافي]

السلام عليكم ورحمة الله وبركاته ,,,

هذه قصة أرجو أن تنال على إعجاب الجميع.

يقولك : هذا رجل حب له مره وبغى يتزوجها ، المهم راح يم ديرة المره ولقاها متزوجه ، وضاق صدره ، ورجع الرجال يم ديرته وقال هالقصيدة ، حيثه شبه نفسه برجال مهرب ومسك المهرب وتبهذل والباقي فالقصيده ::


القلب كنه بالسكاكين يشعط
******والروح مفجوجـه كما فج الاصباح

ياتل قلبي تلة الجمس مع خط
******وياحن قلبي صيحة السير لاصاح

مع نقرتن قدمه تغاريس واهبط
******شرار شكمانه تقل ضوح قداح

عليه حملن بالشناكير يربط
******ومهربن حمله هراوين واسلاح

خايف على عمره وحمله ومشتط
******ان مسك راح الجمس واللي معه راح

ناظر وشاف الجمس مع ايسره نط
******خفر السواحل عندهم شرطة كفاح

قالوا توقف مار ماطاع غبط
******زاح الونيت وروح الجمس وانزاح

بثنين والثالث على الجمس يشحط
******وان عد طبلونه عطا الجمس وارتاح

خفر السواحل كلموا قدمه نقط
******مراكزن صكة على قدم الاجناح

الدرب قدمه يوم حيصر تورط
******ماعاد يمديها مع الدرب مصفاح

صكوبهن مع كل صوب وتلخبط
******واطلق عليه النار مع كل الاشباح

مع بابه الايسر ضرب عرض واغبط
******صوب وطاح وطاح عن همته طاح

كلبش وحط القيد في رجلها حط
******ودوه للتحقيق واسلوب الايضاح

عقب العصا والسجن والفرش والبط
******دانوه بالترويج وافساد الارواح

وحكم عليه اعدام بالسيف الاسلط
******وصدر قرار الحكم في بيض الالواح

تقسيم ميم ودال بالامر يضبط
******في ساحة المذبح تولاه ذباح

قدمه شرط وواقفن قبله شرط
******وجه نواح ومثلها وجدي نواح

عليك ياوجدي يابو عنقن انوط
******اول صبرة وكمل الصبر وانباح

لو ان مخلوق على الصبر يغبط
****** لكان صبري جاب لي كل الارباح

نصيت من قرنه على المتن يمشط
******نكست لاشفته ولا ضالمي لاح

ارضه بياح ويكشف الجمس لاقط
******والارض تفضح واكثر الناس فضاح

ولاعندهم منهو بوضعي توسط
******ومضرين نفسه على كسب الامداح

ضاقت بي الكورة كما خرق مخيط
******واضوق من السبحه على سلك مسباح

ماذوق حلو النوم والجفن ماغط
******سهران والله ماتهنيت بامراح

عدي عضيض السو من ناب الارقط
******لاكض بانيابن تقل مضرب رماح

اول سبحت مع الهوى شط مع شط
******واليوم غرقني عقب مان سباح



وسلامتكم...






تحياتي ,,,,









** الشرافي **

 

 

 

 

[معلومات العضو الواضح]

تسلم تسلم يالشرافي



وصح لسانك وبيض الله وحهك على هذا الأختيار


وصح لسان الشاعر / الشمري

 

 

 

 

[معلومات العضو سعد المقابله]

الله يعطيك العافيه

ولاهنت على القصيده

 

 

 

 

[معلومات العضو عبدالرحمن الشرافي]

لاهنتوا على المرور وماقصرتوا.




تحياتي,,,





** الشرافي **

 

 

 

 

[معلومات العضو ابن وتيد السباعي]

الجمس موتر اللي في راسه اعطاس
موترن يسوقك على التهاليك
مشكور الشرافي
على القصيده الجزله والمحزنه

 

 

 

 

[معلومات العضو عبدالرحمن الشرافي]

الله لايهينك يا / صعوط المجانين على المرور

وبيض الله وجهك ,,






** الشرافي **