قصيدة محمد خلف الخس في الملك فهد الله يرحمه

[معلومات العضو العماني]

مناسبة القصيدة

بنى الأمير سلطان بن عبدالعزيز ديوانا ً له في قصره بـ(الهدى) بمدينة الطائف ، وعزم خادم الحرمين الشريفين الملك فهد الله يرحمه فيه ، وطلب الأمير سلطان من الشاعر الكبير محمد بن خلف الخس المطيري ان يعد قصيده ترحيبه في الملك.

وقد القاها الشاعر بين يدي الملك فهد الله يرحمه في ديوان الأمير سلطان:

يامرحبا عداد ماهل وأمطر =مزن ٍ تعزّل من خياله ربابه
سل المشاعر بارقة يوم يظهر= تبرق مقاديمه وترعد عقابه
تحية مني كما ذوق سكر =أقولها عن سيدي بالنيابه
هذا واكرر ثانيه ما تهتدر= يامرحبا حييت في كل بابه
يالعاهل اللي فيك الاسلام تنظر=يومن شوفك فيه عيد وطرابه
مما تكن لك نفوسنا لك نعبر =نبدي لك الترحيب من خف نابه
في بيت اخوك النادر الحر الاشقر=سيفك عضيدك حزة الاقترابه
زعيم قوتك اللذي لو تفجر=على العدو خلت دياره خرابه
ولو تامره يمشي على الموت الأحمر=مشى على الموت الحمر مايهابه
(سلطان) عنه الحكي ياقف ويقصر=غييث مطر جوده مغطي ترابه
و(سلطان) في دبرتك في كل محور=وانت ظلاله لا تكدر شرابه
لاجيت ديوانه تحيّر وتفكر=تشوف ورد ٍ مثل ورد اللهابه
هذا يجي وارد وهذاك يصدر =جمع يروح وجمع تلفي اركابه
ومن راح منه الصبح يشكر ويذكر=يذكر جميل ٍمايحسب حسابه
عساه ديوان ٍ على العز يعمر=حيثه لاجاه الضعيف التجابه
هذا ويامولاي يالراس الأكبر =يا (ملك نجد) وملحقاته ومابه
ياقايد الاسلام في البحر والبر=فضلك على الاسلام ما ينحكى به
لولاك بعض شعوب راحت تدهور =وصارت لعطران الشوارب كسابه
وعظامهم تكسر ولا عاد تجبر=تخضع تحت راس العدو للرقابه
لاشك قلت امشوا على النور الاخضر=وارقيتهم روس العلى من هضابه
بحزمك وتدبيرك وما كنت تقدر=ومالك وطيبك يامهدي صعابه
وانت الذي دايم على الطيب تقدر=ماقفك ميقاف الشرف والذرابه
يا ابو الجميع وياملكنا المظفر =ياعز نجد ومن وطى في ترابه
لعل من جابك له الذنب يغفر=دعوه عساها عند ربي مجابه
يامارثة (عبدالعزيز) اخو الأنور=محطم عروش العدى بالذوابه
اعفى جوانب نجد لينه اسفر=وخلى الغنم والذيب مثل القرابه
من سطوته شلف النشاما تكسّر=يشهد (قصر عجلان) مما جرابه
خاض الحروب المظلمه لينه أخطر=وصفى الوطن والسيف ماجاء جرابه
ويوم انه أخذ (نجد) بالسيف ما أغتر =الدين أعزه والعدو دق نابه
واغنى الفقارى اللي قبل تشرب المر =واكرم كريم الشعب وادب صعابه
ورحل وعقبه سد من كان يحضر= ما كن( ابو تركي) توفى جنابه
(العود) يومه بذر حبه اثمر = انجب عيال ٍ يخلصون الطلابه
سباع ٍ ليا من شافها الذيب يجحر=اسرع من الديبان في الانقلابه
والعمر لابده ولو طال يقصر =والغايب انته اليوم رافن غيابه
ياعزنا يا ظلنا قبل نسهر=يادرعنا الظافي عن أيات اصابه
عدلت ثم كملت ماكان يذكر=من عدل كسرى اللي مشت به اركابه
والشعب في عهدك مكيّف ومستر= كلن من الخيرات مالن البابه
ياحر لو ترقى الكواكب وتشهر = قالوا شهر من طيب ساس وصلابه
الساس من نار ٍ تلظى تدهمر = معرب الجدين عرب النسابه
اليا قلت فيك المدح ماهوب منكر = المدح سيف ٍ وانت قاضب انصابه
(يالفيصلي) ياللي مساعيك تشكر=يا ابو العرب درع العرب في المجابه
يالعاهل المعروف بالكر والفر = واللي مكذبني عليه الاجابه
انتوا ملوك الأرض في كل محضر =وانتم سباع الغاب ساس النجابه
أيمانكم فيها من الخير والشر=هل الشجاعه والكرم والمهابه
ولولا الشجاعه ماظهر صيت عنتر=ولولا الكرم ماجاء لحاتم حظابه
ولولا اكبود الحوت ما صار عنبر= ولو لا العدل في الارض راحت خرابه
ولولا الفعل بالسيف شامان الأبتر=كان أصبحت نجد العذيه انهابه
انتوا حميتوها من الشر والحر = ولا مثلكم بعد النبي والصحابه
تمت بذكر الله والله أكبر = وصلوا على المختار يا أهل اللبابه

 

 

 

 

[معلومات العضو راكان العجمي]

في بيت اخوك النادر الحـر الاشقـر ,,, سيفـك عضيـدك حـزة الاقترابـه

زعيـم قوتـك اللـذي لـو تفجـر ,,, على العـدو خلـت ديـاره خرابـه

ولو تامره يمشي على الموت الأحمر ,,, مشى على الموت الحمـر مايهابـه


كفــــــــــــــــــــــــــــووووووووووووو


الاخ الفاضل / هايف العماني ,,,

بيض الله وجهك على القصيد الجزل ,,,

وصح لسانك ولسان قايلها ,,,

تقبل تحياتي في شخصك الكريم ,,,

اخيك / راكان المحفوظي العجمي ,,,

 

 

 

 

[معلومات العضو مطلق الحصان آل عمار]

الاخ / هايف

لك الشكرعلى اختيارك الرائع لكل الجهات في هذه القصيده الرائعه جدا

رحم الله الملك فهد رحمه واسعه انه سميع الدعاء

ولله در الشاعر/ محمد خلف على صوغ القصيده الرائعه

وليست غريبه على شاعر مثله

فهو معروف جدا

اكرر شكري للاخ هايف على مايقدم

ولك بالغ التقدير

 

 

 

 

[معلومات العضو الواضح]

الأخ / هايف



مشكور على الأختيار الطيب


ويستاهلون أخوان نوره


فالمجد والسلطان عنوان لهم

 

 

 

 

[معلومات العضو خاطر محمد الخاطر]

لاهنت يابومبارك اختيار اكثر من رائع

 

 

 

 

[معلومات العضو فيصل الشكري]

	مشكور أخوي أبو مبارك على الموضوع الطيب ولاشلت يمناك والله يعطيك العافية والله يرحم الملك فهد ويسكنة فسيح جناتة وصح لسان الشاعر وتقبل من أخوك فيصل الشكري كل تقدير

 

 

 

 

[معلومات العضو سالم الغييثي]

السلام عليكم ورحمة الله وبركاته/

صح لسانك يابومبارك
ولا هنت يالقرم

 

 

 

 

[معلومات العضو العماني]

مرحبا بكم جميعا ً واشكركم على مروركم الكريم وردودكم الطيبه

تقبلوا تحياتي،،

 

 

 

 

[معلومات العضو عبدالرحمن الشرافي]

(( (عبدالعزيـز) اخـو الأنـور %% محطـم عـروش العـدى بالذوابـه ))


مشكور يا هايف


والله يعطيك العافية على هالذائقة الشعرية الراقية

وصح الله لسان " البستان" كما اطلق عليه الملك عبدالعزيز

واطال الله في عمره وحفظه للشعر فالشاعر محمد خلف الخس المطيري

من افضل الشعراء الموجودين من وجهة نظري وانا من اشد

المتابعين لقصائده


لا تحرمنا يا ابو مبارك من قصايد ابو خلف




تحياتي

 

 

 

 

[معلومات العضو عبدالرحمن الشرافي]

يقول محمد خلف الخس :

عبدالعزيز اللي يهد الأصاعيب = سماني البستان وانا الشرف لي