يا الشعار تكفون افيدوني

[معلومات العضو ابو زايـد البدراني]

السلام عليكم ورحمة الله وبركاته

تكفون هذي قصيدتي الثالثه وابغا اعرف هل هي موزونه وزن وقافيه وابغا اعرف وين الخلل فيه

يامدور الضيقة تراها هنيّا = شفني تراني أنا كلي متضايق
تبغا تخاشرني همومي سويّا = واصبر على همٍ قليلٍ وطايق
حسبي عليك الله يا راع العبيّا = حبيتني ونسيت كل العوايق
وفارقتني والقلب لا ما تهيّا = والعين أعماها دموع غرايق
ولا عاد لي صاحب ولا من خويّا = يا حسرتي يا شين فرقى الرفايق
حاولت ابنسى لكن الشوق عيّا = يذكر مجالسنا وذيك الدقايق
اشتاقلك شوقي يا شوق الشقيّا = شفني غريقٍ بين موج وعلايق
أبغى ذنوبي قلي وشي الخطيّا = خليتني ما بين حزن وشقايق
اقعد على حيلي وحالي رديّا = ولا ذقت طعم الزاد واكل الرقايق
والنوم من عيني ما جاله هنيّا = اقعد سهيرٍ بين كل الخلايق
اصبر وكن الصبر عيّا يتريّا = يقول ما يقوى ولاهوب طايق
خلاص لا ترجع وانه القضيّا = ما عاد بالي فيك يا زين رايق
صحيح احبك والمحبة بليّا =لكن شموخي فوق كل العوايق

وسلامتكم وعساها ان تنال اعجابكم

 

 

 

 

[معلومات العضو عبدالرحمن الجبابرة]

السلام عليكم ورحمة الله وبركاته

ما شاء الله تبارك الرحمن

أخوي الشاعر : أبو زايد البدراني

تغنيت بها ولم أجد فيها أي خلل في الوزن وقافيتها منضبطة ومعانيها وعاطفتها قوية ومتدفقة ولعل الطريقة في الكتابة توحي للبعض بوجود خلل لمن لا يستطيع القراءة كما أرادها الشاعر ويقيني لو أسمعتها الناقد صوتيا لزال اللبس إن كان هناك من انتقد وزنها ومن يقول فيها خلل بالوزن فيقوم ببيانه الله لايهينه
لنستفيد


صح لسانك وسلم فكرك وبيض الله وجهك واستمر في الصعود صوب القمة لاعدمناك

دمتم بود ووفاء

 

 

 

 

[معلومات العضو ابو زايـد البدراني]

ابقاك الله اخوي ابو داحم

الاروع هو حظورك ومرورك وذائقتك الشعريه طال عمرك لا هنت اخوي عبدالرحمن

وبيض الله وجهك ولا ابخل بحظور الشعراء لكي استفيد من الاخطاء التي يراها الشاعر

وجزاكم الله خير

 

 

 

 

[معلومات العضو نجــــــــــديه]

صح الله لسانك وجاد بيانك
ابياتك اخوي ابو زيد البدراني وافيه وجزله ومافيه قصور
ولاعليها كلام
اتمنى لك التوفيق ومن حسن الى احسن بإذن الله
دم دائما عالي

 

 

 

 

[معلومات العضو ابو زايـد البدراني]

مشكوره اختي نجديه على مرورك وانا الصراحه معجب في قصائدك واتمنا

اني اكون قدوه لشعرك واشكرك جزيل الشكر على مرورك وردك ورفعك لمعنوياتي

جزاك الله خير والله يستر عليك

 

 

 

 

[معلومات العضو بدر بن صقر العجالين]

شفني ترانـي أنـا كلـي متضايـق << كسر
حسبـي عليـك الله يـا راع العبـيّـا << كسر
حبيتنـي ونسـيـت كــل العـوايـق << كسر
أبغى ذنوبـي قلـي وشـي الخطيّـا << ثقل بالوزن

كما توجد مفردات مقحمه..

على العموم القصيده حلوه اخوي ( أبوزايد البدراني )

صح الله لسانك وعساك الله القوه والى الأمام ان شاء الله واتمنى لك التوفيق

واتمنى وانا حاضر ان تستشيرني قبل لا تنزل قصيدتك القادمه واتمنى منك عدم الاستعجال بالنشر ..

وتقبل تحيات اخوك

 

 

 

 

[معلومات العضو ابو زايـد البدراني]

يا هلا والله ومسهلا باخوي بدر

شرف وانور الموضوع وانورت ابياتي بنقدك البناء جزاك الله خير على النصيحه

بس يا ليت اخوي بدر تضيفني على ايميلك عشان اي قصيده اكتبها استشيرك فيها

al_badrany-590-@hotmail.com

 

 

 

 

[معلومات العضو ناوى]

فى مجملها جيده واتوقع انها تعتمد على النطق فى بعض الاابيات او اكثرها

 

 

 

 

[معلومات العضو ابو زايـد البدراني]

مشكور اخوي ناوي على مرورك شرفت بحظورك ولا هنت

على ردك وان شاء الله في المرات الجايه اكون افضل من اول

 

 

 

 

[معلومات العضو عبدالرحمن الجبابرة]

السلام عليكم ورحمة الله وبركاته

شفني ترانـي (أنـا ) كلـي متضايـق << كسر
حسبـي عليـك الله يـا راع العبـيّـا << كسر
حبيتنـي ونسـيـت كــل العـوايـق << كسر
أبغى ذنوبـي قلـي وشـي الخطيّـا << ثقل بالوزن

شكرا لشاعرنا القدير : بدر بن صقر العجالين على اجتهاده وشكرا للشاعر أبو زايد البدراني على منحنا فرصة الإبحار مع قصيدته



.
.
شفني ترانـي (أنـا ) كلـي متضايـق

الخطأ هنا من الكتابة وليس من الصياغة وتكتب وتنطق الألف مد ( آنا ) وليس ( أنا ) بهمز كما كتبها الشاعر خطأ وكلمة متضايق سكون على الميم او تقرأ ( امتضايق )


لنرى مقياس الوزن بتفعيلات البحر وليس باللحن فالعروض هو المرجع و الأساس وبحور النبطي مأخوذة من الشعر العربي والشعر يوزن بالعروض في النهاية عند الإختلاف في أمر الوزن وأعتقد بأن لجان التحكيم وأكاديمية شاعر المليون وكثير من المحكمين يأخذون به جنبا إلى جنب مع الهيجنة وغيرها من الألحان النبطية أو الوزن السماعي


شِفـْنِيتـَرَا - مستفعلن - نِيْ آَنـَكـِلْ - مستفعلن - لِمْتـِضَايـِقْ - فاعلاتن


شِفـْنِيتـَرَا نِيْ آَنـَكـِلْ لِمْتـِضَايـِقْ
مستفلعن مستفلعن فاعلاتن


عندما نقول كسر في البيت يعني وجود تفعيلة ناقصة أو من غير البحر وبيان الكسر يأتي إما عن طريق التقطيع العروضي لنتبين النقص أو الإختلاف في التفعيلات أو عن طريق السماع من الشاعر وليس كما نقرأها نحن أو يكتبها الشاعر فبعض الشعراء لا يحسن كتابة الإملاء

هنا تبين لنا أن لاكسر وتغنيت بها على النحو الذي تغنى به الشاعر وكتبته وقمت بتقطيعه

.
.

حسبـي عليـك الله يـا راع العبـيّـا

حَسْبـِي عَلـِيْ - مستفلعن- كالله يرا- مستفعلن- علعبييا - فاعلاتن

حَسْبـِيعَلـِيْ - كالله يرا - علعبييا
مستفعلن مستفعلن فاعلاتن
لا كسر هنا وأحيانا عندما ننطق لفظ الجلالة في العامية قد نمده وقد لانمده

إن قمنا بالمد هنا
على هذا النحو ( كاللاهي يا)انكسر البيت لانه يزيد عندنا الياء المجرورة بـ عليك والمتولدة من الكسرة

وإن قلنا (كالله يرا ) بدون مد اختفى الياء المتولد من الجر واستقام الأمر

إذن الكسر هنا من نطقنا وليس من الصياغة في البيت


.
.
.

حبيتنـي ونسـيـت كــل العـوايـق

حبيتني - مستفعلن - ونسيتكل- مستفلعن- للعوايق - فاعلاتن

حبيتني- ونسيتكل- للعوايق
مستفلعن- مستفلعن- فاعلاتن
الواو بعد حبيتني تنطق مخففة أثناء التغني أو تدمج مع الياء قبلها وغالبا واو العطف في النبطي لاتؤثر في بعض المواضع لانها تنطق في التغني مخففة او تهمل وان كتبت

وكما ذكرت باعتقادي أن الخطأ من كتابة القصيدة وليس من صياغتها ولعل شاعرها في ذات يوم يسمعنا إياها

.
.


أبغى ذنوبـي قلـي وشـي الخطيّـا
أبغى ذنو - مستفلعن - بـي قل لـوش - مستفعلن - شـل خطييا - فاعلاتن

هنا لاكسر وسبب الثقل أيضا واضح أنه من الكتابة وكان يفترض أن تشدد وشي فتصير ( وشـِّي ) وأصلها ( وش هي ) كما في لهجة الشاعر

.
.

هذا اجتهادا مني فإن أصبت فالحمد لله وإن أخطأت فقد بذلت الجهد ومنكم نستفيد

وشكرا لكم على منحي الفرصة للتحاور معكم

دمتم بود ووفاء

 

 

 

 

[معلومات العضو ابو زايـد البدراني]

بيض الله وجهك ما قصرت واللي فهمته من كلامك ان القصيده لا توجد بها اي كسر

وانت صدقت انا تغنيت فيها بأكثر من شيله وكلها على المسحوب ولا لاحظت فيها اي شي

بس قلت انا توني مبتدء يعني الشاعر المتمكن هو اعلم مني في الشعر

على العموم ما قصرت وبيض الله وجهك ووجه بدر وكلامكم كله فوق راسي

وافتخر فيه واحطه وسام على صدري

جزيت خير اخي الفاضل

 

 

 

 

[معلومات العضو محمد بن المنخس المري]

ابوزايد

صح لساانك

اول شي مهما كان فيها كسر او لا

يوجد معاني وبيوت جزله فيهاا دليل على القوه الشاعريه بداخل الشاعر

رغم وجود بعض الهنات في الابياات بس دربك خضر ونتظر جديدك وانت شاعر ولا عليك

 

 

 

 

[معلومات العضو محمد بن المنخس المري]

ابوزايد

صح لساانك

اول شي مهما كان فيها كسر او لا

يوجد معاني وبيوت جزله فيهاا دليل على القوه الشاعريه بداخل الشاعر

رغم وجود بعض الهنات في الابياات بس دربك خضر ونتظر جديدك وانت شاعر ولا عليك


اخوك : محمد المنخس المري

 

 

 

 

[معلومات العضو خلاّد الزايدي]

أبوزايد

أخذ الكلام اللي يجمد على الشارب :

القصيدة مافيها كسر وموزونة ومقفاة وهي على المسحوب

نعم هناك في بعض الأشطر مايسمونه النقاد ( جبر) و ( ثقل)وهذا يقلل من جودة السبك ولكن لايعني الكسر نهائياً

ونصيحة لاتستشير إلا شعراء متعمقين في الشعر ومعرفة الأوزان والبحور

فلاتأخذ بآراء شعراء مبتدئين بعضهم كان يكسر ولم يتعلم الوزن إلا قبل أشهر قليلة


ونصيحتي للنوع الأخير أن يهتموا بتطوير مواهبهم والتبحر أكثر في عالم الشعر ويتركوا
عنهم نقد الغير وتوجيههم لأنهم لم يصلوا بعد لهذه المرحلة والمستقبل قدامهم إن شاء
الله فلايستعجلون على رزقهم

ولا أقصد أحد بعينه بل كلامي عام لكل شاعر مبتديء وفق الله الجميع لكل خير

 

 

 

 

[معلومات العضو ابو زايـد البدراني]

المشاركة الأصلية كتبت بواسطة محمد بن المنخس المري

ابوزايد

صح لساانك

اول شي مهما كان فيها كسر او لا

يوجد معاني وبيوت جزله فيهاا دليل على القوه الشاعريه بداخل الشاعر

رغم وجود بعض الهنات في الابياات بس دربك خضر ونتظر جديدك وانت شاعر ولا عليك


اخوك : محمد المنخس المري

يا هلا ومسهلا عداد المطر اخوي محمد تو ما نور الوضوع

ما قصرت وبيض الله وجهك وان شاء الله انا ما جيت هنا الا ادرس منك ومن اخواني الشعار


لاهنت على صراحتك معي وبيض الله وجهك