سألني شخص وش أصلي ؟ ومن وين أنا ؟
طلبني اكتبها له في أبيات شعر .. ولبيت الطلب
جوابي أقول فيه :
بديت بسم اللي له الكل لبّاه=رب(ن) عظيم(ن) خالق الجن من نار
ومن بعدها باختار من قولي أصفاه=وانثر في شعري كل جزل(ن) ومختار
وما كل من يطلب مراد(ن) بيلقاه=وما كل من ينظم حروف(ن) بشعّار
بعض الشعر أردى من الدون معناه=وبعض الشعر يطرب كما يطرب الطار!
وبعض الشعر ما له وزون تقفّاه=ماهوب شعر.. إلا شعير(ن) وأمرار!
ويا ناشدن عني خذ العلم باتلاه=خذها جزيلة من جميلات الأشعار
يطرب بها سمعك وذوقك بيرضاه=يجري بوزن(ن) مثل جري الأنهار
أنا للعز حزت أصله وأعلاه=ولد الدواسر بالفخر أجهر إجهار
حنا الدواسر أصل فخر(ن) ومزهاه=حنا ودينا الجار من طيحة جدار
من نسل زايد صاحب الحكم والجاه=حرّ(ن) أصيل(ن) من ولد نسل الأحرار
أنا ولد زايد عزيز(ن) مناداه=شيخ(ن) تعزوى به دواسر الأخيار
الطيب طبعه والكرم أصل منشاه=من زود طيبه منه الطيب يحتار
كسّاب صيت(ن) والفخر دوم ويّاه=وفالحق صارم مثل سيف(ن) وبتّار
ما خاب من يزبنه يوم(ن) وينصاه=يغيث من هو من عنا الوقت منهار
من هو طلبه الجود عانه وهنّاه=يعطي وما له فالعطا منّ تذكار
صحيح مات لكن المجد أبقاه=ما مات في التاريخ قرم(ن) وجبّار
وعن ديرتي يا ناشدي خذ مسمّاه=إ(سدير) نبع الطيب والمجد والكار
سلام يا (سدير) الفخر والمباهاه=يا جنة(ن) تسلب عقول(ن) وأبصار
يا (سدير) مالك في مفاخرك أشباه=صيتك لنا يا ديرتي حصن وأسوار
ذخر(ن) لاهلها سعْد من هو بيغشاه=أرض الجمال اللي بها الخير مدرار
يفز قلبي كل ما مر طرياه=ويحنّ شوقي لجل حبي لهالدار
الدين فرجاله من أكبر مزاياه=وأهله من أشرف ناس عز(ن) ومقدار
ومن طاب أصله بان طيبه في منحاه=ينفع كما تنفع محيطات وأبحار
وإلا الردي يا كثر شرّه وبلواه=وما يصحبه يا كود جاهل وضرّار
وآخر كلامي أدعي الرب يالله=صلّي وسلم ع النبي سِيْد الأبرار
تقبلوا مني أطيب تحيه
اخوكم
ثامر البدراني