جعل السحاب الي قنوفه مزابير
ينشي على العارض ويسقي دياره
من مزنتن يسنى سنا برقها عصير
حقوق صيفن مدلهمن سماره
منزال ربعي محتمين المضاهير
الي حمو جار السعد من جداره
دواسرن تارد على جمه البير
سقم العدو الي براسه سطاره
افعالهم من وقت ابوزيد والزير
يوم الزمان الي تقادح شراره
صبيهم فارس وشايبهم امير
كلن خذاها غصب ورث اوجداره
كم عايلن جاهم حدته الاشاوير
يبغى الطمع والفيد تغري ثماره
من ضربهم ناحت عليه الغنادير
واصبح فقيد وللمقرد عباره
بسيوف هند تظرب الراس وتعير
كم واحدن قصت فصايل فقاره
ولضيف ربعي ماتحسب المخاسير
يوم ان ولد الاش بخله صقاره
يلقى الشحم عقب الدلال المباهير
والعود الازرق مايوقف غباره
ويلقى جنابن زين مع حسن تقدير
ويقضى لزومه مابدى بعتذاره
سلام ياربعي هل العز والخير
ياعزوتي تاج الفخر وافتخاره
سلامن احلى من حليب المصاغير
والذ من طعم الشهد في حظاره
واكبر من ابانات واثقل من النير
وانقى من الالماس وثقل عياره
سخرت مدحي في فعول المناعير
لاقيل غيري راح مدحه خساره