الحمد الله رب العالمين والصلاة والسلام على سيد الأنبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته إلى يوم الدين
إخواننا أعضاء وزوّار ومرتادي الموقع الرسمي لقبيلة الدواسر
هذه قصيدة رثاء للشاعر فراج بن فهد بن جديع آل بريك في جاره : حبيب بن محمد بن شداد آل بريك (رحمه الله رحمةً واسعة)
حيث عرف عن الفقيد محبة الجميع له وتواجدهم في خيمته منذ الصباح الباكر وكان من أكثر الناس تواضعاً وأطيبهم أخلاقاً بشهادة الجميع رحمه الله رحمة واسعة . |
مل عينً حاربت حلو المنامي =واستوى في موقها الصبح ومساها
لاصبحت هلت مثل وبل الغيامي= والمساء لا اقبل يزيد بها عناها
لا ذكرت اللي بقلبي له مقامي =وقيمته في النفس عالٍ مستواها
جاري اللي له معزة واحترامي =وسيرته عند العرب زينً نباها
ما اخبر له مبغضٍ يمشي حرامي =له من اسمه قسمةٍ ربي عطاها
عنك ما جاره شكى منه الحثامي=والخوي منه العزاري ما شكاها
ان دعيته ما توانى في المقامي =وان دعاني سلوة الروح وهناها
مجلسه تلقى به ربوعٍ حشامي=من صلاة الصبح لا تالي عشاها
لا تنفس بالسفر صبح الظلامي =شب ضوٍ يجذب السارح سناها
وقرب الكيف المبهر بالشوامي =ودر خلفاتٍ عسيرً مشتراها
وعقب ذا برٍ على جاله ودامي=للنشاما واعتزى باللي وراها
ياوجودي وجد مكسور العظامي =ما تذوق النوم عينه من شظاها
او وجود اللي غدى والقيض حامي=وجا له ارضٍ في حياته ما وطاها
وكمل البنزيم في عين المضامي =وشحشح الماء والحزابة ما احتساها
او وجود صغيرٍ قبل الفطامي =امه بسو القضاء المولى خذاها
لا توعي نقض جروحٍ كوامي =وإن رقد مايرقد إلا في رداها
طيفها لا من غفى زاره وحامي =ولا توقض من منامه ما لقاها
من قصيرٍ راح في الشهر الحرامي =وركزو فوقه من البيدا حصاها
لا ذكرته صارت ضلوعي حطامي =وهاضت العبرة وعيني هل ما ها
من فراقه طاويٍ حالي هيامي =وحزن يعقوب النبي حالي طواها
مل قلبٍ كنه يلذع به لحامي =واهجه في اقصى معاليقي شواها
ياجماعة صار حلم من الحلامي =وانتهت نفس العزيز لمنتهاها
ياجليل الملك جعله للرحامي =واصرفه من واهج النار ولظاها
واجعل الفردوس له دار ومقامي =مع نبي الله شفيع الخلق طاها