السلام عليكم ورحمة الله وبركاته
مع السلامه ياللي عن قلبي تشيل
ترى محل داخل القلب موسومي
القلب ينتظرك ومطولك يا ليل
والعين ماظني بعدك بتنومي
يا وجد حالي يوم انا احتري السيل
ابغي اشوف الغيم غطا النجومي
والجيب ماشي راكبينه رجاجيل
ابوي واخوي داحم زين العلومي
وخالد وموسى مكرمين المقابيل
نعم الرفاقه وخوة رجال قرومي
من لابة يوم الجفا تذبح الحيل
ويوم الشدايد شاهرين الحسومي
الاد زايد مزبنين الدواخيل
من نسل بدران الكرم والعزومي
وباقي القبايل ما بهم نقص تكييل
وكل على فعله يعد العلومي
يا زين لمتنا بحل وتراحيل
في خايع مابه سايير زحومي
والبرق لاح والسما به تهاليل
والغيث يسقينا من رب رحومي
والسيل يمشي غادي كنه النيل
وريح الغزاما والنفل شق الخشومي
والارض كاسيها خضار وتظليل
وبيت الشعر مركوز فوق الحزومي
وبن يحمسه واحد من الرجاجيل
ودق النجر يسمعه اللي يعومي
وصفة دلال مبهراة من الهيل
وبريق مخدر على الجال مختومي
ذي جنة الدنيا وناسه وتعليل
ولازينها الا مقتفيها همومي
يازين حالي يوم انا بالي طويل
واليوم انا غادي وكني مهزومي
والهاجس اللي يحتري طلة الليل
كنه على قلبي سهوم ترومي
اشتقت لك ابو عيون مكاحيل
اسمك ترى في كل حزه يحومي
اسهر طوال الليل اجر المواويل
واصبح على موال ثم اقومي
طعنتي طعنات ركابة الخيل
وتركتني في وسط حبك اعومي
القلب ينتظرك ومطوك يا ليل
ارجع وخل همومي ترحل وانومي
الله يحفظك ياللي عن قلبي تشيل
ترى محلك داخل القلب موسومي
وسلامتكم وعسى ان تنال اعجابكم