السلام عليكم ورحمة الله وبركاته
هذه قصيدة للشاعر محمد بن فهد الودعاني الدوسري ،، مادحا ً فيها أبناء عمه الحقبان عندما إشترى مزرعة بجانب حي الحقبان " الروضة " بالخرج" ،،
يا الله يا المطلوب خلاق الإنسان = يا فارج الضّيقات منْشي المخيله
أنّك تزيّن أزمة الوضع زيّان = وانك تهوّنها على أحسن وسيله
بيتي بإيجار وساكن ٍ بين جدران = مالي على شوف السموات حيله
في الشارع إزعاج ٍ وفي البيت بزران = ولا أهتني في جلستي و الحليله
يا زين شيّاد الشعر فوق عمدان = في خايع ٍ قفرٍ و ناسه قليله
ريح الخزامى خالطه ريح مكنان = والجرّ توّه دارج ٍ فيه سيله
لا فيه مشروع ٍ ولا فيه دخان = فيه الهوا يشفي النفوس العليله
مير الظروف اليوم حكم ٍ وسلطان = مقيدين ٍ بالقيود الثقيله
عزمتنا أطلع لو في وسط بستان = لو أتحمل بالقسوط الطويله
لو قال بعض الناس خسران خسران = ثقّل على نفسه وحـمّل كفيله
لو قال بعض الناس غلطان غلطان = ما عاد في نكث المزارع نفيله
قلنا توكلنا على عالي الشان = سبحان من يعطي العطايا الجزيله
و الدّين كل الناس داين وديّان = واللي نوى التسديد ربي وكيله
ويزيّنه في جنب ربع ٍ و ظفران = الجار قبل الدار ينزل نزيله
في جانب الروضه هل العز حقبان = أولاد تغلب في الليالي المحيله
ألنا الفخر في جيرة طوال الأيمان = أهل الشهامه والعلوم الجميله
وأهل السخا وأهل الحميّة وشجعان = لا طاب جارك لاتدور بديله
من غير ذمّ ٍ للقبايل وحقران = اللي على فعله يحضر دليله
وما كان حولي من حديدٍ وجيران = مكرمين من الردى والرذيله
وصلاة ربي عدّ ما هل ودان = على نبي ما يوصَّف مثيله
،،،،،،،
ورد عليه الشاعر ماجد بن جفيران الحقباني الدوسري بهذه القصيدة
بديت باسم اللي فرض خمس الاركان = جزل العطا ما خاب من يستسيله
من بعد ذكر الله بابدا بقيفان = أبيات شعر ٍ بالمعاني جليله
رد ٍ على اللي عادته يذبح الضان = راعي الوفا راعي العلوم النبيله
قدّاك ربي يا سلايل كحيلان = ستر الهنوف اللي تقض الجديله
نزلت عقب الضيق يا طير حوران = في منزل ٍ فيه الغروس الظليله
في وسط بستان ٍ وفيه الثمر زان = ويطيب وسطه جلسة ٍ واتعليله
تدلّت عذوقه على كل الألوان = يستانس اللي تحت ظله يخيله
وبداخله تين ٍ وخوخ ٍ ورمان = كم واحد ٍ يابو فهد يمتنيله
يابو فهد قصرتْك ما هي بالأثمان = والرابح اللي حط مثلك خليله
من قاصر أهل الدين يزداد بايمان = يحيي الليال بسجدة ٍ واتهليله
يا مرحبا بقصرتْك يابن ودعان = أهلاً هلا بك يا عزيز القبيله
من لابةٍ يردون لا ثار عكنان = لا جا نهار ٍ فيه قدح الفتيله
يردون حوض الموت ماهم بذلان = يروون حد المرهفات الصقيله
ركبوا على اللي جوّدوها بالأرسان = من كان قدم نحورهم عزتيله
وردوا على العدوان مع ولد بدران = ميرادهم يشفي القلوب الغليله
ناصر فزع وبكفه السيف شامان = ما همه الخطه ولا من اللي هي له
يوم ارتكز عج الرمك كنه بركان = وأهل العشر بين الجموع المهيله
مشى على دربه فهود ٍ وفرسان = ركبوا على قبّ الخيول الأصيله
مركاضهم يشبع به الذيب سرحان = كم واحدٍ لا طاح محدٍ يشيله
تالي نهار تختلف فيه الأذهان = راحت على جمع الأعادي سحيله
وختامها صلوا على نسل عدنان = على نبي ٍوضّح الله دليله
،،،،،،،،،،،
مع التحية ،،
أخوكم / العياضي