إخواني أعضاء المنتدى والزوّار الأكارم هذه مساجله بين الشاعرين الكبيرين
حسن بن عبدالله بن حسن بن بطحيّه الجماعين الوداعين و عبدالله بن نايف بن عون العتيبي آمل أن تنول على إعجابكم
ابن بطحيه
يحداني الهاجوس والهم والضيق=على المثل وأوناس الأيام عجله
وأظرم لفنجال اليماني ليا سيق=في مجلسن ما فيه نمّه ودجله
هذي عوايدهم عموم المطاليق=واختص شخصن بانظم القاف لاجله
عد الروا في اللين وان نشّف الريق=له سمعتن من سودة أبها لدجله
ركن المراجل دون شرحن وتعليق=وممشا بيوتي يم ابن عون خجله
فكره ينسق خاطر القاف تنسيق=وأصعب حروفه كلها تنتهج له
بشعرن يعالج ما لجا بالمعاليق=وبحر المحيط يعوض عن كل هجله
جلبت تمري للحسا بالصناديق=وأنا لأبو نايف مثل قدر نجله
وأخذت درس وتالي الدرس تطبيق=والمجتهد يتعب على الدرب رجله
ابن عون
يا من نهل من منهلن ما بعد ذيق=أحلا من النبّاع في هضبة أجله
هجسك لحلوات الغداريق عشّيق=حاور صعيب القاف لين اندرج له
واخذ من أزهار الغصون المواريق=وتوّج بها منهاجه اللي نهج له
هاجس حسن بادر بحلو الغداريق=وجتني مراسيله بعد ما فرج له
يمشي بخطن ما تجيه المطافيق=والمخرج اللي هو يبيه يخرج له
ويشكر على تقديم بيض الطواريق=ومن قدّم السمحه ما أرد العوج له
خلاّني آخذ في سما الشعر تحليق=وخلّى الجوارح كلها ترتهج له
الموجب أنه من رجال المواثيق=ومسجّلن مع سجل الأخيار سجله
وسلامن أحلا من لذيذ المذاويق=ما سولف الهرّاج للي هرج له
وتقبلوا تحيات أخوكم
متحري الصدق