يابنت مانرضى المهونة والاضعاف=لنا على روس (المشاميخ) صيحة
لاتنشدين اعن المنازل والاسلاف=يوم أذكر الماضي تهيج القريحـة
فينا صفات الطيب يابنت واوصاف=ماتنطبـق فـي غيرنـا يامليحـة
ادخيلنا يرقد ورا الوجـه ماخـاف=يامن وتحماه السلـوم الصريحـة
ناسم عصاه ولو يبا حق وانصاف=تحت الحما ماواحـدن يستبيحـه
هذي مقدمة أبيات لقصيدة ( شاعر الوطن ) خلف بن هذال العتيبي والذي ذكر في عرض قصيدته التي قالها مؤخراً بأن سلم ( وسم العصا ) يختص بقبيلته وأنه لا ينطبق في غيرها من القبائل ( كما في الأبيات 3-4-5 ) ، مع أن الصحيح أن هذا السلم سلم للدواسر من وقت الجهل ولم يسبق الدواسر عليه أحد من القبائل ( أول من سنّه الدواسر ).
وقد قام الشاعر/ ماجد بن عيسى بن خفران المسعري بمجاراة هذه القصيدة والرد عليها ووضع النقاط على الحروف إحقاقاً للحق ودفاعاً عن ( سلوم القبيلة ) التي يحق لأبناء هذه القبيلة العظيمة أن يفخروا بها إلى الأبد. وجميع القبائل بها حقها من الطيب والصفات التي تفخر بها، وأترككم مع القصيدة:-
يقول من يارد بقوله وينشاف = قدم الرجال أهل الوجيه الفليحه
أبني على ساساً من الحيد مرصاف = وارفع صروحاً فالعلال المشيحه
واليا صرفت أرهي على كل صرّاف = فكري ورى سبح الكواكب سبيحه
طوفان جاشي لا اصطفق واعصف اعصاف = تهتز منه الراسيات الرزيحه
عديت من شرع المعرْفة والانصاف = رداً يخط بكل بيضاء صفيحه
خذ يا(خلف هذال) رداً على القاف = اللي تمثلته بنفساً بجيحه
وزنك طفح كيله على ميل واجحاف = وزليت لك زلة لساناً جويحه
نحسبك كان من العواريف عرّاف = لين إن منك العلم باين نضيحه
عليك مشروهاً كبر عوف وأكتاف = عمد الخطايا إمن الصفات القبيحه
لو اختصرت بمدح مجمول الاوصاف = وتفصيل زين ام الخدود المضيحه
ما لحقتك شرهة ولا منطقاً حاف = ولا طحت في موج الخطايا القديحة
لكن في مدحك لربعك تزلاّف = على السلوم الواضحات الصحيحه
وربعك (عتيبة) مروية حد الأسلاف = أهل الوزان اللي كففهم رجيحه
واهل الفخر والمدح في كل الاوقاف = واهل السلوم الوافيات الوضيحه
لطامة العايل بضربات الاعناف = وذباحة الحايل بيمناً سميحه
ما يكتسون إمن العواري والأسلاف = وأمجادهم من قبل مدحك مديحه
وش وصلّك حد الطمع والتزّهاف ؟! = تنقش على ( وسم العصا ) لك نقيحه !
( وسم العصا ) سلم لمن مجدهم ناف! = روس الجبال الراسيات المصيحه
(سلم الدواسر) من قديمات الأسلاف = ولا يقدر أحدن غيرنا يستبيحه
لو ياخلف تنشد تواريخ الأعراف = تشهد بنطق العامّي والفصيحه
بوسم العصا نفرق على سبع الأطواف = سلمٍ بطيب العز ينفح نفيحه
بأعلى المكارم نتسم سلم واهداف = والعز يقدح من سطرنا قديحه
(دواسراً) نسقي العداء سم الأتلاف = على العداء منّا هجاد وصبيحه
إليا تعلوينا على كل مزغاف = وعلى النقاء واجه نطيحن نطيحه
فنحورنا خيل المجاويخ تنلاّف = ولا تنتداوى من طعنّا الجريحه
(خطلان الأيدي) ممنة كل من خاف = في ظلنا عنه المعادي نزيحه
كم بيرقن جانا جموعه لها أرداف = ومن فعلنا راحت اجموعه طفيحه
سدنا وزدنا بالفخر عز واشراف = وراياتنا في كل عليا مليحه
خوينا والجار في في ظل واكناف = عز وفخر ما يشتكون الجنيحه
من سلمنا ما يازا الأجواد مزلاف = وقلب العدو ماله علينا فريحه
ولا مشينا بالخفا والتضعّاف = وراع الخطا ما نرقبه يستميحه
نضرب على العايل وراع التعجراف = ضرب النيازك بالشهاب المويحه
من مال عال وشال حملن بالاكتاف = ومن رزحته يكثر رغاه وفحيحه
ومن لا يحسّب للعواقب والاكلاف = يصبح وقا روس النياب الكليحه
والحق له سيفاً سطياً وقصّاف = يصطي على صم العظام المتيحه
هذا الكلام اللي له العقل يكتاف = عن طول ماروده يكفّي مليحه
علماً (يابن هذال) يسمع وينشاف = واذنك تسمّعله وعينك شبيحه