السلام عليكم ورحمة الله وبركاته
في الزمان السابق وأيام صولات وجولات القبائل ومغازيه على بعضها .
غزى الشيخ عبد الكريم الجرباء من شيوخ شمر غزى على الظفير واخذ ابلهم ومن
ضمنها أبل الشليمي الظفيري وكانت أبله عزيزة وهاذي عوايد البدو.
فقال سوف أذهب إلى عبدا لكريم الجرباء لعله يعطيني أبلي
فتسلل إلى موطن قبيلة شمر وقلط على مجلس عبد الكريم وأخذ عنده يومين وهو لا
يعرفه وفي اليوم الثالث قال الشليمي للجربا عندي قصيدة قال تفضل نسمعها
قال الشليمي ...
ياراكب من فوق حسكات الأوبار =عيرات الأنظاء وان نوا كل ناوي
لا روحن مع خالي الدو عبار= لا كن ينهش في قفاهن ضراوي
حتى قال
أدنى بـ الادنى كان بالربع تختار =عبد الكريم الى بلتك البلاوي
شواي صنع الهند في مجحم النار= من الزوم كنه مع شفا البير داوي
والقصيدة أطول من كذا ....
فقال عبد الكريم وش تقولون ياشمر هذا الشليمي يبي أبله
قال واحد منهم أما عطه أبله ولا أذبحه ونطلها له بالمراح
قال عبد الكريم الا نذبحه هذا قوماني ولا بيننا وبينه عواني
فتباينت أم عبد الكريم مع الر واق وقالت :
ياولدي ياعبد الكريم ان ذبحته عار على عار إلا رد عليه أبله
قال : أمرك مطاع يا أم عبد الكريم
قال تعرف أبلك يالشليمي
قال بكره مع طلعت الشمس أجي براس الحزم ذاك وأناديهن بأسمهن اللي تجيني لي
واللي ماتجيني لشمر ..
طبعن شمر لما كسبوا البل وتوازعوا الغنايم صار كل مراح فيه ناقه ناقتين من أبل
الشليمي
فخاف عبد الكريم انهم يربطون أبل الشليمي أو
يعقلونها علشان ماتجاوب لصوت راعيها
فقال عبد الكريم :
اسمعوا ياشمر والله ياللي يعقل يدها أني لقطع يده ووالله ياللي يعقل رجلها
أني لقطع رجله
وفي الصباح صوت الشليمي لـ أبله فـ أتن إليه كلهن لم تنقص واحدة
فأخذ أبله وأنصرف الى ربعه الظفير .....
((سمعتها من شريط الراويه المرشدي.))
اخوكم / فــــهــــد الــغـــريري,,,,,