إليكُم هذهِ القصّة ولها قصيدة .. وقد جرت على شخص من الشوايق مِن قبيلة الدواسَر الكريمه :
المذكور كان نازل مع قبيلة سْـبيع الكريمه ، ووجَد منهم كل الإكرام والتقدير وهذه عادات القبائل
ومناسبة القصيدة أنه في يوم من الأيام كانوا جيرانه السبعان عازمين على حفر بئر ماء عندهم ،
ولمّا عرَف الدوسري - وكان ينوي أن يزور جماعته في ديارهم - .. عزم على أن يعمل لجيرانه
السبعان وليمة قبل مايسافر .. فأخذ له (( حْـوار )) من إبله علشان يذبحه لجيرانه السبعان ويعزمهم
عليه قبل أن يودعهم .. وعند المساء أخذت الناقة أم الحوار تحن لفقدان حْوارْها .. وعندما سمع
الدوسري حنينها .. تهيض بهذه الأبيات وهو يخاطب الناقة بأن عليها الصبر مثل ما صبر جاره (( مثيب ))
حيث أن جاره مثيب له قصة .. وهو أنه تزوج فتاة وأخذت عنده مدة .. ولاحظ أنها تنفر منه حيث
أنها طامح لغيره .. وما كان من مثيب إلا أن طلقها .. وتزوجت بمن تريده .. وهذه من شيم العرب ..
يقول الدوسري في قصيدته :
يا فاطري يااللـي تجـر الحنينـي =قامت تجر الصـوت تبغـي نماهـا
خلـي ولدهـا طايـح ٍ للقطيـنـي =وبتجعلـه حفـارة المـاء غداهـا
تصبر بصبر( مثيب ) مروي السنيني =والنفس تصبر مـرة مـن هواهـا
وترددت قصيدة الدوسري على ألسنة الناس وسمعها جاره (( مثيب )) الذي ورد ذكره في القصيدة ..
فأجابه (( مثيب )) بهذه الأبيات وهو يوضح للدوسري بأن اللي مايبيني أنا بعَد ما أبيه ..
فقال (( مثيب )) جوابا على قصيدة الدوسري وعلى نفس القافية :
يا راكـب حمـرا تصـك القرينـي =ما ذيّرَت صيد الخـلا مـن رغاهـا
تسرح صلاة الصبح من خشم( تيني ) =والقايلة مـن مـاء كثيـرٍ سقاهـا
تجعـل جبـال( جريـدل ) باليمينـي =وتخلي( أم جنيب ) بأيسَـر خْطاهـا
حـزّة صـلاة الصبـح والمذنينـي =واللـي بـدا فالبـرح وكّـد غياهـا
تنصـا الشوايـق لابــه بينيـنـي =ربـعٍ تسـرع للنشـامـا قـراهـا
قصيـري اللـي بالحكـا مقتفينـي =والناس من قبلـي تطامـح نساهـا
خذيتهـا يـوم أنهـا اللـي تبينـي =وخلّيتهـا يـوم أن غيـري بغاهـا
خليتـهـا للـقـرم ذرب اليميـنـي =عطيِّـةٍ مـا حـن بنبغـي جزاهـا
وســلامتكُـم