http://www.alduwasser.org/Bsmllah.gif
الحمد لله رب العالمين والصلاة والسلام على سيد الأنبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته إلى يوم الدين
إخواننا أعضاء وزوّار ومرتادي الموقع الرسمي لقبيلة الدواسر
يسرنا في هذا اليوم أن نقدم لكم هذا اللقاء الخاص والحصري للموقع الرسمي لقبيلة الدواسر مع أحد شعراء قبيلة الدواسر المتميزين ، شاعرنا الذي نسلّط عليه الضوء اليوم هو شاعرٌ ظلم إعلامياً من قبل القنوات الفضائية الذي غلب في برامجها الشعريّة الغث على السمين ، وهو شاعر ومن أسرة شعرية معروفة ، حيث شهد له القاصي قبل الداني بالجزالة وبأصالة القصيد .
وعلى الرغم من مشاغله الكثيرة فقد فتح أبواب مجلسه مرحباً بالمنبر الإعلامي لقبيلة الدواسر على شبكة الإنترنت وخصّ هذا الموقع بالحديث عنه وعن تجربته الشعريّة وطرح الأسئلة المتلهفين الكثير من متابعيه بمعرفتها .
إخواني لا نطيل عليكم ، لقاءنا مع الشاعر :
مشيع بن فهيد بن حشفل بن زريجين الغييثات الدوسري
http://www.alduwaser.org/meeting1/alghaithe6.jpg
ضيف اللقاء الشاعر مشيع بن فهيد بن حشفل بن زريجين الغييثات الدوسري وبجابنبه مجري اللقاء الأستاذ خميّس بن مطر الغييثي .
أجرى اللقاء وطرح الأسئلة :
مراقب الموقع الرسمي لقبيلة الدواسر الأستاذ خميس بن مطر الغييثي
وكما حضر اللقاء أيضاً :
والد ضيف اللقاء الشاعر فهيد بن حشفل الغييثي والأخ فهد بن مبارك فهيد الغييثات
س : بالبداية نرحبك عبر الموقع الرسمي لقبيلة الدواسر العريقة ونشكر لك تلبيتك الدعوة بأن تكون ضيفنا عبر المنبر الإعلامي للقبيلة ، نتمنى أن تعرّف أعضاء وزوّار الموقع الرسمي للقبيلة على بطاقتك الشخصية ؟
ج : الإسم مشيع بن فهيد بن حشفل بن زريجين الغييثي ، العمر 30 سنة ، أعزب ، العمل : متسبب .
س : نستمع للقب أطلق عليك وهو "المتعلي" .. فبودنا لو تحدثنا عمن أطلقه عليك وما هو سبب إطلاقه أيضاً ؟
ج : أطلقه علي الربع إللي شجعوني في بداياتي وأعطوني الثقة بعد الله وبعد تشجيع والدي لي الله يطول بعمره .
س : بودنا لو تخبر عن متى كانت بدايتك الشعرية ؟
ج : كانت بدايتي عام 1412هــ .
س : هل الشعر عندك موهبة أم وراثة ؟
ج : موهبة ووراثة فوالدي شاعر .
س : نمى إلى علمنا أنك شاركت هذا العام في شاعر المليون .. هل تؤكد هذا الخبر أم تنفيه وإن كان مؤكد فماذا حدث لك بالمشاركة وهل أجزت ؟
ج : نعم ، شاركت وقابلت اللجنة وأجازوني ولله الحمد وإنتقلت إلى ما قبل 48 .
س : هل سبق وإن شاركت في أي مسابقة شعرية ؟
ج : لا ، لم يسبق لي المشاركة في برنامج قبل شاعر المليون .
س : هل هناك شعراء تأثرت بهم في بداياتك ؟
ج : نعم ، فقد تأثر بشكل كبير بوالدي ولكن لي نهجي وله نهجة .
س : لماذا لا نرى مشيع بن فهيد في البرامج التلفزيونية الشعرية والمجلات الشعبية ؟
ج : والله مدري ، أنا بدوي ودايم عند الذود .
س : هل نفهم من هذه الإجابة أن التقصير لديك وليس لدى الإعلام ؟
ج : لا والله يابومطر أنا سعيت لهم لكن ما حصلت تجاوب منهم .. لا والأعظم إن فيه قناة طلبت مني مبلغ مالي مقابل أن يجري معي لقاء .
http://www.alduwaser.org/meeting1/alghaithe2.jpg
مجري اللقاء يتحاور مع ضيف اللقاء الشاعر مشيع بن فهيد الغييثات .
http://www.alduwaser.org/meeting1/alghaithe3.jpg
س : بودنا لو تخصّ الموقع الرسمي للقبيلة عن أخر قصائدك ؟
ج : هذي قصيدتي في سيدي الأمير سلطان بن عبدالعزيز حفظه الله ، وأقول فيها :
المملكه يعني وطن شرع وإيمان=فيها ضياء مكه ونور المدينه
أرض السعوديه وطن صون وأمان=في عين عبدالله غشتها السكينه
حكامنا حكمه وهيبه وميزان=تقتص للمظلوم من ظالمينه
ماخان فيها غير مفسد وخوان=مثل الوليد العاق في والدينه
يقبل عدو الله عميل المريكان=بينه وبين أمة محمد قرينه
الله يخلي للوطن ذخر الاوطان=صقر العروبه درع شعبه ودينه
والعين ترقب فالضحى والمسيان=تمسي وتصبح للمغرب حزينه
تبكي وتنثر دمعها شوق وأحزان=عليك ياراع الكفوف الأمينه
ولي عهد المملكه بنك الاحسان=من يوم غاب وخطّر الشعب شينه
نعم نعم سلطان للمجد عنوان=لوتنشد المحروم من هوعوينه؟
صاحوا جميع الناس سلطان سلطان=بحرالكرم يصفق براحة يمينه
قائد مفتش عام حربي طيران=أمضا مع التطوير زهرة سنينه
صوت العرب يدعيه من قلب ولسان=ويقول بأعلى الصوت سلطان وينه
كل الوطن يصرخ من أقصاه شفقان=والدين تهتف حنجرة مسلمينه
يالله ماغيرك روؤف بالانسان=من زار بيتك قام يرفع يدينه
س : أبوفهيد بودي لو تطلعنا على مشاركتك في شاعر المليون ؟
ج : أقول فيها :
اجيب القوافي منك يالخاطر المكسور=بعد مامشينا واسود الليل ضاوينا
مشينا وحنا نلتفت للعيون الحور=مع الشارع اللي مر بيته تلاقينا
الا ياظلام الليل منها غشاك النور=بعد ملتقى الاحباب رحنا ولا جينا
وحنا قطعنا من بحور الغرام بحور=اندور طمعنا لين طاح الشقا فينا
لقينا الزهادي والعنا والشقا والجور=وهذا الزهاب اللي تجيبه ليالينا
واشوفك تبسم داله" خاطرك مسرور=تفّوح قراطيع العقايب وتسقينا
تبختر تحت ظل الترف طايشا" مغرور=وحنا على جلمود صخرا تراكينا
اراعيك ياجو الطبيعه وانا مقهور=ليا شفت مقطوع الرجا مايراعينا
لو ان الدهر لو كان مره يطيع الشور=يفك القيود اللي تقصر خطاوينا
علشان ازور اللي على شوفته مسحور=بعد غيبته سود الليالي تبكينا
نبوج الفيافي غرب والا جنوب حدور=متون الفيافي ماتعرقل مسارينا
تدور الكواكب فالفلك والزمان يدور=وحنا نقول لشغلة الصبح يمدينا
على بيت ملهوف الحشا ردوا المظهور=لنا مدة من دلته ماتقهوينا
اشوفه على حد الدرج عند باب السور=واذا شفت عين ابليس تبراه صدينا
لمحت الشعاع اللي خده المستور=تقل نجمة مضرابها في نحر سينا
قال الذي صلفات الأيام تطويه=يصرخ ولا حوله من الناس والي
هذا بيت من قصيدة لك .. ما هي مناسبتها وياليت تطلعنا على هذه القصيدة ؟
ج : أبشر طال عمرك مناسبتها غزلية والغزلية لازم لها موقف يجيبها والموقف ماني بمعلمك به هههههههه، وأقول فيها :
قال الذي صلفات الأيام تطويه=يصرخ ولا حوله من الناس والي
والناس ماخلوه ياصل مشاهيه=قلوا هل الفزعه زحول الرجالي
بين الطلايب والعتب والمشاريه=ماعاد أحصل للوناسه مجالي
وأغلى بشر قفا وعيني تراعيه=يمكن طراله طارين ماطرالي
لوشاف وضعي كان وضعي يبكيه=يبكي على شاني ويصخف لحالي
الله يلعن ساعة الفقر والتيه=يوم أحرمت عيني وضحت بغالي
والله مدري ياعيون الرجا ليه =بس الوكاد أنه دبورن جرالي
أن كان ذكري عن منامه يصحيه=فأنا معلق صورته في خيالي
نذرن علي مادمت حين مخليه=لوطالت الفرقا وقل أحتمالي
لوادري أن الدمع لاسال يرضيه =بكيت طول أيامها والليالي
س : أبوفهيد لك قصيدة تشخص الحب الصادق بوجهة نظرك فيودنا لو تزودنا بها عبر هذا اللقاء ؟
تدري وش اصدق حب يطلع من الجوف =حب الفقير اللي عشق له فقيرة
ملهوف ويمزق ثيابه لملهوف=لانال مطلوبه ولابه ستيره
لايقبل العجفا ولايامن الخوف=عليه همه حلقتن مستديره
أحوه ياحالن من الغبن منحوف=ماشال غبنن فيه مخلوق غيره
الناس فالافراح ببشوت وسيوف=وأحبابهم يلفون من كل ديره
كلن يجر أمن الغطاريف غطروف=وأنا على صفح المريقب خفيره
كني مع العربان لاأسمع ولاأشوف=تقول مالي فالجزيره عشيره
نصغر بعين الناس ونمر ونطوف=هذي علينا يابن عمي كبيره
س : سمعنا لك قصيدة في الجيب ؟ ماهي مناسبتها ونتمنى أن تزودنا بها ؟
ج : الإنسان تمر به ظروف أحياناً ويضطر إلى أصدقاء له يحسبهم أصدقاء وأنا يوم من الأيام كانت سيارتي متعطلة وكان عندي مشوار لازم أنهج له وطلبت أحد الأصدقاء سيارته ولكن قال إنه عنده مشوار أهم من مشوار ، فجات هذه الأبيات إللي أقول فيها :
الا يالله أني في ذراك ابتهج وأحل=قبل حل حل" فيه الارواح منزوعه
ابجلس على صم الصفا لو بليا زل=واجنب محل" فيه الانذال مجموعه
كفاية كفاية يانجوم علي اطل=وانا منعزل في ظلمة الليل وهجوعه
سهير واجاذب ونتي فالدجا الاكحل=وهي ونة زادت على لوعتي لوعه
تبين شهر سته واشوف الهليل هل=مقوس من القبله مباديه وطلوعه
بغيت اجمع أغراضي وأودع هلي وأرحل=مثل رحلة اللي شاف ضيم من ربوعه
هجوسي تقول ارحل وقلبي يقول اعقل=وانا دمعتي في محجر العين مردوعه
تمنيت فكسار بكل المزايا فل=جميع القطع بافخم قطاعات مصنوعه
شرابه من النفط السعودي وسوبر شل=خذا من فيافي نجد شربه وقرطوعه
تفنن به اللي عن ديانة محمد ضل=قبل يصنعه له رسمه ابداع مطبوعه
مادامه مدلع بالفخامه وكل الكل=فلا احد يلومه لو مشى مشي دلوعه
تبي تكشفه والا تبي تتركه مقفل=وانا يوم افكر فيه مستغرب نوعه
ليا جيت خلن خالي خل صيد الخل=ماعاد يتحرك من ضياء الليت جربوعه
شبك ليزره واقوى شعاعه ثلاث افصل=وهي دقمة في بعض الاحيان ممنوعه
مثل بارق نوه دفعه الهواء واقبل=برقه سرا ساريه والدار مرجوعه
ليا نشع فوق القزاز سوات الطل=ونافورة المساح ماجف ينبوعه
تشغل له المساح لو تتركه ما مل=تحت دبرة السواق يامر وهو طوعه
احلي على مساحته فالمطر لا هل =حزين مسح بيديه عن خده ادموعه
هذا اللي يعجبك لاذكرة الخل=وداره بعيد وعنه الاخبار مقطوعه
الا واهني من دق سلفه وتله تل=ليا انتل قلبي من محانيه وضلوعه
يشق الخرايم لاشلعته ويرقا التل=واسجل على قزازته منتهى الروعه
هو الحل للي من همومه يدور حل=لو ان في همومه بذرة الهم مزروعه
انا كيف ادله خاطر" مابرد له غل=يفوت الشهر بأغلى لياليه واسبوعه
الايانسيم الغرب نسنس بمسك وفل=على اطراف بنيان زواياه مرفوعه
واذا شفت خلي بلغه سلام وقل=جريح الزمن نفسه من البعد مفجوعه
الا يازمان المهزله والغبينه ول=سهر فيك مجروح تعانز على كوعه
س : الشاعر مشيع بن فهيد ما هي مرئياتك حول الموقع الرسمي لقبيلة الدواسر العريقة ؟ وهل خدم القبيلة ؟
ج : موقع الدواسر هو الشي الوحيد الذي إتفق عليه 99% من الدواسر ، ومهما قلت عن هذا الصرح لا أوفيه حقه وأشكر القائمين عليه جميعهم وأشكرك أنت بالذات ونعم خدم القبيله وخدمني أنا أيضاً .
س : هل لديك مقتراحات للموقع الرسمي لقبيلة الدواسر العريقة .. تضمن تقدم وإزدهار الموقع ؟
ج : والله الموقع كامل وإدارته راقية وواعية وتحملت أشياء كبيرة لخدمة الدواسر كافة
ولكن إللي ينقصه هو الدعم المادي والمعنوي من الجميع .
س : في ختام هذا اللقاء الممتع والقصير جداً بقدر ما تملكه من قدرة شعرية ، هل من كلمةٍ أخيرة توجها للقائمين وأعضاء وزوّار الموقع ؟
ج : بيض الله وجهك يابومطر على تحملك عناء الزيارة وقبل ذلك على شعورك الكريم تجاهي , ولا شك أن لقاءك هذا معي يشرفني وحسن ظنك بي يدل على طيب أصلك وذاتك , وأشكر القائمين على المنتدى من مشرفين وأعضاء على جهودهم سائلاً الله لهم التوفيق والسداد .
صور من اللقاء :
http://www.alduwaser.org/meeting1/alghaithe1.jpg
صورة تجمع والد ضيف اللقاء الشاعر فهيد بن حشفل الغييثي ومراقب الموقع الأستاذ خميّس بن مطر الغييثي .
http://www.alduwaser.org/meeting1/alghaithe4.jpg
صورة تجمع كلاً من : فهد بن مبارك فهيد الغييثات و ضيف اللقاء الشاعر مشيع بن فهيد بن حشفل بن زريجين الغييثات .
في ختام هذا اللقاء الممتع لايسعنا إلا أن نتقدم بخالص الشكر والتقدير للشاعر مشيع بن فهيد بن حشفل آل زريجين الغييثات الدوسري على إتاحه هذه الفرصة لنا وعلى أريحته وعلى سعة صدرة وإجابته على جميع الأسئلة ، سائلين المولى عز وجل أن يوفقه ويسدد على طريق الحق خطاه .
(
صوت قبيلة الدواسر)
منتدى قبيلة الدواسر الرسمي
www.alduwaser.org/vb 
