::: مـنتدى قبيلـة الـدواسـر الـرسمي :::

يالله ياللي تعلم الجهر والغيب
ياجاعل مع كل ضيق انفراجه
ياغافر الزله و ياساتر العيب
يا واحد ماله مع الناس حاجه
لكن كل الناس عنده مطاليب
وكل واحد يدعيك تقضي احتياجه
تفرج هموم اللي غزا راسه الشيب
وظروف وقته مثل عنق الزجاجه
يارب مالي عن معونتك تجنيب
لا صار في بعض الدروب انعواجه
سدد خطاي واهدني درب مصيب
درب بعد ممشاه نلقى نتاجه
وانك تثبتني على منهج الطيب
وحسن النبا وقت اللقاء والمواجه
وتعيذني من هقوة ما تخيب
وتعيذني كثر الحكي والسماجه
ما للرجل في دنيته من مكاسيب
ياكود علم طيب به يواجه
عند الرجال اللي تعرف المواجيب
والطيب منهاج وسيع انفراجه
وكلن بها الدنيا مضى له تجاريب
والمستفيد اللي يدور خراجه
هذي هي الدنيا صدوف ومتاعيب
ويا سعد من هو طاعة الله سراجه