::: مـنتدى قبيلـة الـدواسـر الـرسمي ::: - باقولهـا لـو زعّلـت زيـد وعبيـد..!!

- :: قسم الـشعر العــام :: (http://alduwaser.org/vb/forumdisplay.php?f=16)

- - باقولهـا لـو زعّلـت زيـد وعبيـد..!! (http://alduwaser.org/vb/showthread.php?t=25827)

باقولهـا لـو زعّلـت زيـد وعبيـد..!!

اقدم هالقصيدة واتمني انها تجوز لكم لشاعرها ...خوي المطاليق

اليوم كالعاده حسب وضع البشر قلـت القصيـد=قصيدةٍ مـدري وش اكتـب ياعـرب عنوانهـا
وادري قصيدي مرّ لو قلته محـد بيقـول عيـد=وبه نـاس واجـد ودّهـا منّـه تسـدّ آذانهـا
لنّي أسلّ السيف واضرب به على راس البليـد=واكشـف علـوم العالميـن هزالهـا وسمانهـا
أتبع مقولة : ما يفلّ اقـوى الحديـد الاّ الحديـد=وما يستوي سيـر الجمـال الاّ بمـسّ بطانهـا
ماجامل المخطـي ولا آداري ولا قبّلـت إيـد=ولا امدح سفاسيف القبايـل طامـعٍ باحسانهـا
أصرف ذهب يفرح به العاقل ومفتوح الرصيـد=جزل البيوت وطلبـة العـرّاف خيـر اثمانهـا
موضوعها شـيٍ تشوفونـه ولا رحنـا بعيـد=شفتـه وشافتـه الرجـال العاقلـه باعيانـهـا
أمور في بعض المجالس منّها ضغطـي يزيـد=واحاول اضبط نفسي اليا جيـت قـدر امكانهـا
لكن تعدّت واستضاق الدمّ فـي وسـط الوريـد=ماعاد فينا خيـر لـو نصبـر علـى كتمانهـا
باقولهـا باقولهـا لـو زعّلـت زيـد وعبيـد=جا وقتهـا ويـا سعـد عيـنٍ قابلـت ديّانهـا
بعض المجالس وضعها يودع على كبدي وقيـد=وضعٍ يخالـف للمجالـس راسهـا بكرعانهـا
شيبان وشيوخ و وجيه لطارف المجلس تحيـد=وفي مقدمه صفّت حثـالات البشـر ورعانهـا
صدر المجالس للشيوخ اللي تخلّص كـل قيـد=روس الجموع اللي على الدنيـا رفيـعٍ شانهـا
والاّ لعـرّافٍ تفـك الهـوش بالـراي السديـد=وتشـرّع حقـوق القبايـل كلـمـةٍ بلسانـهـا
والاّ لقـوم الحـرب شيّـال البيـارق والعقيـد=حوض المنايـا لاشتبـك فـي هيّـةٍ دخانهـا
والاّ لشيبـانٍ حباهـا الله بالعـمـر المـديـد=شابـت لحاهـا واقبلـت متعنّـزه عصيانهـا
صارت تربّع بع خلايف كـلّ هيّـن مـا يفيـد=اللـي تناسـت ويـن مقعـد جدهـا وابوانهـا
اللي زمان الخوف تشرد لا بدا الضـدّ العنيـد=واللي زمان الجوع تنخـشّ ان دعـا ضيفانهـا
وقام يتسابق له شبـابٍ غـرّه الثـوب الجديـد=ولبس البشوت اللي تبـارق زريهـا بامتانهـا
ناسٍ تحس بنقص . تتقدّم لها ركـض وطريـد=فـي ظنهـا قيمـة مكانتهـا حسـب مكانهـا
وان جا كبير السـن تبـدا بالتلفّـت والصديـد=بلفيـت مشغولـه تحاكـي الجالسيـن وزانهـا
ياقف عسا واحد يقدّر شيبته ، ، لكـن جحيـد=وينحدّ لاطراف المجالـس فـي ذرى بيبانهـا
وين المضيّف عن ضيوفه راعي القصر المشيد=عزّ القصور بعز مـن فيهـا مهـو باركانهـا
وطبع العزيز يعزّ ضيفانه قبـل صـبّ الثريـد=يضرب حساب اعمارها واحجامهـا واوزانهـا
كم جاهلٍ قد شاخ في المجلس على الكرسي وتيد=روس القبايل ما يفـارق مقعـده مـن شانهـا
ماهوب زودٍ لا حضر وان غاب ما يحسب فقيد=يسرّحه مدح الضعوف اللـي عطتـه ارسانهـا
ردّه لمنزالـه وشـدّه لـو تجيـه ام العبـيـد=وفي جبهته بصّـم يمينـك لا انتفـخ شريانهـا
حتّاه يصحا . وان صحا قل له خذ العلم الوكيـد=ولا تنخدع للـي تطبّـل لـك علـى طيرانهـا
ياحيف يا نسل الرجال اللي لهـم مجـدٍ تليـد=صرتو رمادٍ من عقـب نـارٍ وقـف دخانهـا
بيض اللحا جرتو عليها مالقـت منكـم عضيـد=والله يعقّـب عالـمٍ مـا تحـتـرم شيبانـهـا
أمحق مجالس صار فيها القدر ينقص ما يزيـد=اللـي بهـا الرعيـان تتقـدّم علـى عمّانهـا
وامحق رجالٍ ما تحصّل بينهـم رجـلٍ رشيـد=يصهل إليـن الغاويـه ترجـع علـى حدّانهـا
وباقي مزيد من العلوم ان قال احد هل من مزيد=دنيـاً عجايبهـا كثيـره شيّـبـت غربانـهـا
والوقت من بين النزول وبيـن ميعـاد الشديـد=لمحة بصر يـا دوب فيهـا ترتكـز عمدانهـا
قلت استغل الوقت وابدع للعـرب قـافٍ جديـد=إمـا اطلقـت حجّانهـا والاّ عقـدت حجّانهـا
اليا اطلقت حجّانهـا بتقـول تكفـا عيـد عيـد=واليـا عقـدت حجّانهـا عنّـي تسـدّ آذانهـا

وسلامتكــــــــــــــــــــــم