ياراكب ٍ اللي لامشت كنها الدانوق=أبوها نجيب ٍ وهي نجيب ٍ عمانيه
وينحر زبون الجاذي لغدن معسوق=لا حدى الظفران ضرب اليمانيه
(أبوعلي) عيد من حفاها ارفوق=تلقون عندهم الشحم فوق صينيه
وخبر اللي فالج قلبه الجالوق= ترانا طردنا اللي يبون الرويعيه
لعيون وضحى كنها الغرنوق=رعيناها بعشب ٍ اركّا وسط حربيه
وانا احمد الله لابتي تروي المفتوق=سقم الحريب مطفخت كل نشميه
ويامل قلب ٍ للمحادير قام يتوق= تهايق يبيله نية ٍ في طرف نيه
يخيل على بركٍ ذكر عليه ابروق=يذكر عليه من أول الحيا وسميه

الله يجيرك من الساموح ياطيري=طير ٍ هوى القلب وانّا مانبي غيره
طير ٍ خبيثٍ في راسه سعى طيري=يضربنا به وسوى الموت أظافيره
يالله عسى مايهد به حد ٍ غيري=في وادي ٍ سايل ٍ خضر ٍ محاييره
لا طاح نو ٍ من المنشا مزابيري=امّا على (الخرج) والا من محاديره
انهدبه قدام ذيدان ٍ مغاتيري=لا راح راعي الغنم متحردٍ عيره

حنا في رجا ليلة ٍ تنثر لنا ماها = يمطر من (الدحي ) لا هدب الجنوبية
يسي لنا ديرة ٍ ما عاد جيناها =دار ٍ لنا مامشى فيها رحيليه
لعيون (وضحى) قليل ٍ وصف حلياها= كنها طموح ٍ تعرض للعواجيه
لازاف نورها قفر ٍ رعيناها = مناب حضر ٍ ولا برقان شاويه

شدينا تسعين شدة =شدينا لقصير بلال
وذيداننا يامارعت من جِده= وياما ذيرت من غزال
يانفدا اللي جدي من جده = ومعرب ٍ مابين جد وخال

الله يجيرك من الساموح ياعيده=هجيبنا جعلك الله ماتوانيني
فسناع عد ٍ لنا بانت مواريده=طوله من الرصة العليا ثلايني
يازينها لا اقبل الظواي لو عيده=مهيب جمالة بين البلاديني
ياحامي الغوج لا قلت مسانيده=لا نبزوهن هل الزلبات مقفيني

لا من تشالت ضحيه طاب مامني=يالله انك تقود لنا الرجا فيها
تشدي الربدا مع برد الصبحي تستني=ولا كما جبلة ٍ والولم قافيها
لا قال راعي الرديه لا تهملني=ذي ديرة ٍ لا اعرف اهلها ولا ابغيها

يا ذيب ياللي عوى في فنتق ٍ خالي=عطنا علومك ترى قدنا شفاويه

يالله ياعالم الغيب =مظفي على الناس مدّه
اني دخيلك من العيب=والموت مامنه صدّه
شيلوا على شمخ النيب=حوفوا عليها إلشده
يازين ركب المصاليب=مادام في العمر شدّه
أما نجيب الحنازيب=ولا نجي عقب هدّه
قطعاتن فرجة الذيب=لامن غدى السعن قدّه

يا بوك ماعاد فيني جهد =شيبتنا وانتخت يدي
غريت أنا يومني ولد=عساك ماتبور ياولدي
من يسي الذود لاورد=والعد عد ٍ على عدي
لابد من كيفة ٍ بعد=والذود يشرب على مدي
يسروبنا على ظهر سعد =حطوا على الظلفة الجدي
ياحامي الغوج لاقعد= في الضيق لا جا الصعب هدي