يامير يازحزوح يازحل ياراس=يامعطي ٍ للطيب والطالة دروس
جاني تلفونك وانا في بني ياس=وأشعلت في صدري للافراح فانوس
أبعدت في راسي من أيامي إعماس=وجاني إتصالك وانجلى كنه كابوس
فرحت به فرحة أبو دباس بدباس=ونزعت به هم ٍ ورى العوج مدسوس
هم ٍ كتمته داخل الصدر نسّاس=لين إنغرس في ثومة القلب دبوس
يوم اغدرت بكليب طعنات جساس=وتحلّقت بعض الاشانيب بالموس
يوم الوفا من بين الاقدام ينداس=ولا لقى له بعض الاصحاب قاموس
وفيت يافيحان ياطيب الساس=وألبستني من خامة الجود ملبوس
طيبك غدا لمدوّر الطيب نبراس=ولا هو غريب الطيب لاصار من روس
إي والله إنك راس من راس من راس=روس ٍ عمايمها مفاخر وناموس
فيحان بن شجاع والجد محماس=تاريخ ٍ أبلج في ثرى المجد مغروس
من يومها بالسيف والرمح والطاس=مقدم مداغيش ٍ تدوس الخطر دوس
تثبت كتايبهم والارياق يباس=لاجا لعج الخيل في المعركة قوس
شيخة خذيتوها على قب الافراس=مهيب شيخة حي وختوم وفلوس
ياهامة آل بريك والفعل مقياس=مشاهد ٍ طيبك وواضح وملموس
حصلت في شوط المراجل على الكاس=وكمّلت تاريخ ٍ من المجد متروس
من طيب راسك هبّ للشعر نسناس=ورفعت صوتي به هجيني ومنكوس
أخذت لي مع سجة الفكر هوجاس=وذكرت قول ٍ لابن مشرف وأبا الروس
شهادة ٍ تلمع مثل لمع الالماس=من روس شيخان على طيبك جلوس
عمار ياقصر ٍ مشيد على ساس=غرب الرياض وشرق عن هضبة سدوس
ينصاه من حسّه من الوقت حساس=وإللي قضى ليله بضيقات وحسوس
ماحط دونه للخطاطير حراس=ولازينه راعيه باشجار وغروس
مزينه فعل ٍ تسولف به الناس=فعل إلى منه ذكر يرفع الروس
ومزينه شيخ ٍ معه فرخ قرناس=على الهدد للصيد في عينه رموس
يامقدم آل بريك والوضع حساس=الضرس ماينفع إلى دقه السوس
وأنا بذرت الطيب في حقل الافلاس=وأثر الوفا عن تربة الهون محبوس
ناس ٍ تحسب المشيخة مال ولباس=وعطيتهم ياشيخ للشيخة دروس
علمتهم معنى النعم يا اصوك الراس=لامن قصر من روس وازدان به روس
يامن ورثت العز ساس ٍ على ساس=بشت الامارة لايق ٍ لك ومقيوس
فيحان بن شجاع والجد محماس=والعز مبطيٍ في ثرى المجد مغروس

المشاركة الأصلية كتبت بواسطة محمد بن فهد الرجباني (المشاركة 660955) حية وحي ماجاب ارحب يا ابو محسن وبيض الله وجهك يستاهل الشيخ فيحان بن شجاع وبيض الله وجهه علمة غانم وينومس وصح الله السان الشاعر الكبير ابو عبدالعزيز معلقة من المعلقات وجزالة ونعم ما مدح وبيض الله وجهه تحياتي وتقديري~ْ،