|
قصيدة زوجة وديد بن عروج
هذه قصيدة زوجة وديد بن عروج شيخ بني لام كانوا يسكنون بين العارض والاحساء وقام الشيخ وديد وجماعته بغزو حائل فى ذلك الوقت ثم قتل الشيخ وديد على يد سناعيس حائل وبعد ذلك تزوجت زوجة وديد من أخيه عزام ولكن الزول زوله والافعال تختلف وبعد مده لاحظت الزوجه الفرق بين وديد واخيه عزام ( اعتقد شخصيا انه اعقل من اخيه ) قالت هذه الابيات :
يالله يــاعـايـد عـلـى كـل مـضـمـاه=يـامـخـضر الأرض الهشيم المحايل انـت الـكـريـم ورحـــمـتك ما نسيناه=تـروف بالـلي دوم عيـنـه تـخـايـل وان تـرحــــم الـلـي تقل عينه مداواه=اللي بـقلـبـه حـامـيـات الـمـلايـل ألـوج مـثـل أيـوب مـن عـظـم بلواه=وأسـهـر إلـى مـا يصبح الـنجم زايل عـلـى حـبـيـبٍ كــل ما قلت أبنساه=لــذكـره تـفـطـنني من الهجن حايل إلــى نـسـيـته ذكـرتـني بـطريـاه=شـيـبـا ظـهـر مـن عاصيات الجلايل يـلـتـاع قـلـبـي كـل ماأذكر سواياه=كـمـا يـلـوع الـطـيـر شـبـك الحبايل ولا واحـبـيـبـي أربـع سـنـين فرقاه=عليه انـا قـصّـيـت كـــل الـجـدايـل ولاواحـبـيـبـي يتلف الهجن ممــشاه=إلــى بــغــى لـه نـيـةٍ مـا يـسـايـل ولاواحـبـيـبـي أرعـب الـهـجن بغناه=مـن كـثـر مـا يـوحـــيـه لـيـل وقوايل ولا واحبيبي كـل قـومٍ تـنــــصّـاه=تـلـقـى ربـوعـه طــيـبـيـن الـقـبـايل ولا واحـبـيـبـي تذرف الســمن يمناه=يـامـا ذبـح مـا بـيـن كـبـشٍ وحـايـل ولا واحـبـيـبـي وافـيـاتـن سـجاياه=عليه غـضّـات الـصـبـايـا غــــلايـل ولا واحـبـيـبـي دوم لـلـعـفـن متقاه=يــامـا تـلـنّـه مـدمـجـات الـفـتـايـل ولا واحــبيبي بــــيـن ذولا وذولاه=خــلّـي بـوجـه مـعـدلـيـن الـدبـايـل ولا واحـبـييبـي طـاح يـوم الـملاقاه=بـنـحـور غـلـبـا فـوق قـب الأصـايـل ولا واحـبـيـبـي طـير شلوى تعشاه=قـطّـاعـة الـمـهجة سناعيس حـــــايل يـاعـارفـيـن وديد يـاطـول هجراه=يـا لـيـتـنـي بـوديـد مـا أبـغى بــدايل أخذت أخوه أبي عوض ذاك مــن ذاه=والـبـيـت واحــد مـن كـبـار الـحمايل عندي مثيله واحـــــدٍ كـنّـه إيّـاه=عـلـيـه مـن تـــوصـيـف خـلّـي مثايل الـزول زولــه والـحـلايـا حـلاياه=والـفـعـل مـاهو فــــعل واف الخصايل |
لاهنت اخوي مطنوخ على القصة والقصيدة الرائعتين
تقبل تحياتي،، |
سلمت يمينك اخوي المطنوخ على القصه والقصيدة لاتبطي بجديدك ،،، |
المطنوخ لاهنت يالسنافي على نقل هذه القصه والقصيده والحقيقه عندي تكمله لها وهي قصيده أخرى من الزوجه تقول فيها
يافاطري يا ما جرالك من العنـا=مع دربك العيران نشت لحومهـا غدا عنك نواس العدا مرذي النضا=يجرها مع ما نبا مـن حزومهـا غدا عنك وارث في مكانه زلابـة=تروعه الظلمـا تليلـي نجومهـا يا ما حويتي جل ذود من العـدا=أضحا عليه الغزو يفرق سهومها ويا ما يثور عند عينك من الدخن=معارك تدنـي لـلأرواح يومهـا عليك مقـدم لابـة شـاع ذكـره=حامي تواليهـا امقـدي يمومهـا وبعد ماسمع القصيده أسرها في نفسه وأعلن المغزى ولقد طول في مغزاها مايقارب الأربعه أشهر وبعد مارجع من المغزى كانت الزوجة فرحه وقال لها جيبي الذلول وبحثت عنها ولم تجدها ورجعت له وقالت لم أجدها وجدت بكره صغيره قال لها هي البكره الصغيره وعندها فرحت فرحاً كثيراً وأسعدها فعل زوجها وقالت هذه القصيده الأخرى
يا بكرتي وش علـم حالـك ضعيفـي=أشوف حيلـك وانـيٍ عقـب الأردام عقب الفسـق ومهـادرك بالمصيفـي=ومصـاول القعـدان مرباعـك العـام عقـب الأباهـر والسنـام المنيـفـي=صرتي كما المفرود مـن فعـل لـزام قطـع عليـك ديـار قـومٍ تخيـفـي=تسعين ليلة راكـب الهجـن مـا نـام أقفـى عليـك مـن الحسـا للقطيفـي=لحوران والحـرة إلـى نقـرة الشـام وتدمـر وصلهـا وخمهـا مستخيفـي=وشبيـح والضـاح وقديـم الأقــدام وأخـذ عليـك أذواد جـو مريـفـي=وضح كما بـرق الحبـارى بالأكـوام يزفـهـا يـقـداه مشـيـه هريـفـي=وأقفا عليهـن متلـف الهجـن لا قـام ثور مـن العـارض بركـبٍ يهيفـي=يتلون ابـن عـروج مقـدم بنـي لام زهابهـم حـب القـرايـا النظيـفـي=وسلاحهم صنـع الفرنجـي والأروام يا ما انقطع مع ساقتـه مـن عسيفـي=ومن فاطرٍ مشيه عـن الجيـش قـدام عقـب الشحـم وملافخـه للرديـفـي=قامت تسندر مثـل مبخـوص الأقـدام تـوي هنيـت وطـاب بالـي وكيفـي=من عقب ضيمي صرت في خير وأنعام وبعد النكيف من المغزى ورؤيته لزوجته وهي راضيةٍ عنه قال هذه القصيده
أنا ابن عـروج وهـذا سواتـي=موصل سمان الهجن شي مايجنه خمسين يوم والنضـا مقفياتـي=مع مثلهن وهن علـى وجيههنـه نمشي النهـار وليلنـا مانباتـي=كم ذود مصلاح منيـس خذنـه من ظن فينا الطيب شافه ثباتـي=واللي هقى فينا الردا ضاع ظنه كم من صبـيٍ عشقـه للبناتـي=عقب التعجرف بدل الضحك ونه استاخذ المذهول عاف الحياتـي=هو مادرى إن الهجن بيوصلنـه من فوق هجن من فحلهن خواتي=غيب الصبايا الخافيـة يظهرنـه وسلامتكم جميعاً أخوكم ومحبكم دغش البطي |
لاهنت اخوي مطنوخ على القصة والقصيدة
وبيض الله وجهك.............................................. ............... |
لا هنت يا المطنوخ
على ذكر هذه القصة والقصيدة الرائعه وبيض الله وجهك يا دغش على الاضافه الجميلة وعلمك غانم تحياتي لكم |
لاهنت يالمطنوخ على القصه والقصيدة وسلمت يمينك اخوي دغش على الاضافات الطيبه لاتبطي بجديدك ،،، |
بيض الله وجهك يالمطنوخ على هذي السالفه والقصيده اختيار موافق يالنشمي جعلك المعـزه. والشكر موصول لشاعر الكبير دغش البطي على هذي الاضافه الممتعه وهذي عوايده جعله يحيى ويسلم. اخوكم / فهد الغريري |
لاهنت اخوي المطنوخ علي القصه والقصيد
ابي اسئل زوجته هي الي كانت تقصد في رجلهاااااا |
الساعة الآن 07:17 PM
 |
Powered by vBulletin® Copyright ©2000 - 2024, Jelsoft Enterprises Ltd.
---