السلام عليكم ورحمة الله وبركاته


هذه القصيده قالها الشاعر عبد الله بن محـمد الـرواشـده الوداعين
قـالها في محـفل قبيلة الدواسـر بعـد اعتـاق رقبـة ابـن عــواد الصخـابـره

حيـث قــام بتمثـيل قبيـلة الــدواسـر في التـرحيـب سمـو الاميـر عبـدالعـزيز بن تـركي (حفـظه الله)

وفـي شكـر سمـوه الكـريم علـى مواقفـه البـطوليـه تجـاه قبيلـة الــدواسـر
ومـواليـا ملـوكنـا الغـاليـن بـاسم قبيـلة الـدواسـر حفـظ لله ممـلكتنـا ومـلـوكنـا

هيه يا أمواج البحور العايماتي = أخذ فيني بين جال وبين جال
حلليني أمن الظروف المحكماتي = واسبحيبي وسط غبات طوال
لقطع ألساني وأذبه في الخلاتي = كان ما أجمل ليا جالي مجالي
مرحبا ترحيبة فيها لفاتي = تلفت الأنظار وتحير الخيال
ثامن السبع العجايب في الحياتي = وأعذب أنهار الغلا حب وصال
سببه الإرباك بين الكائناتي = كنها بدر تكمل بالكمال
حبكم يا أمير سوى المنكراتي = مابقى إلا إنه يوردنا الهبال
من حدود الوادي أهل الطايلاتي = للسليل لأهل الخرج وشمال
ومن عروق الرمله وكل الجهاتي = رحبت دوسر وأنا عنها امتثال
مرحبا ياسيدي جزل العطاتي = مرحبا بك عد همال الخيال
وعد مافي الكون من طير ونباتي = وعد زملوق رعت فيه الجمال
يامشرف حفلنا زاد بركاتي = جيتك بلحالها حفلٍ لحال
طاب كيفي والحفل حاله = تو مازان الحفل والاحتفال
أقلط أقلط فوق حيل مبركاتي = وأقلط أقلط من على صفر الدلال
والمداخن للدلال مبارياتي = عوداً أزرق فايحاً بين الرجال
أطيب أمن زهور شطين الفراتي = وأطيب أمن المسك في قرن الغزال
مايقدم كود لأهل المعجزاتي = وأشهد أنه حان تقديمه وحال
يا أبو تركي ويش نجزاك بجزاتي = الدواسر تشكرك شيب وعيال
عاش راسٍ لحقها قبل الفواتي = جعل ربي ما يبدلك ابدال
ياقوي العزم يابو الموجباتي = يا زبون اللي عليه الدهر مال
وقفتك ماجات في عصر الزناتي = ولا خبر به زيها بعصر الضلال
وقفتٍ تشهد لها اكرام اللحاتي = تسلم بها الروس وتخف الثقال
أكبر من البحر في عرض الفلاتي = وأوضح من الشمس من قبل الزوال
يا بو تركي أنته أسباب النجاتي = منك عونه طاب حض وطاب فال
مدتك ردت على الروح الحياتي = والجزيلة ماتجي إلا من جزال
شلت حمل أثقال من جبال السراتي = لايزحزح من محل ولا يشال
ومن سواتك يقدر يسوي السواتي = غير حكام الجزيره لامحال
مات أبوك وباقي ذكره ماماتي = ما يموت اللي مخلف له رجال
أشهد إن الحر من مجنى جناتي = كاسبٍ للطيب من عم وخال
العمام ملوك نجد أهل الغناتي = والخوال ألاد عواد والخوال
كل منكم له صفاتٍ نادراتي = وأنته اللي حزتها دق وجلال
طيبٍ من صلب روسٍ طيباتي = والمواقف للرجال أكبر دلال
أنت من رد البعير من العداتي = والرجال اللي معك فكوا العقال
بيض الله وجه من صلى الصلاتي= ما توخر يوم سمع أذان بلال
حي ربعٍ يوم جاها العلم جاتي = ما تونت جاتنا بجاهٍ ومال
كل منهم مشفق للكايداتي = دون ابن عمه فدى بمالٍ وحال
ذي عوايدنا من أيامٍ خلاتي = نكسب الجزله ونرقى للمعال
ما خذين أمن الرسول أحسن وصاتي = دون جار البيت ما نوحي مقال
سلمنا في جارنا وسم العصاتي = وامناً في قربنا مرتاح بال
قد ذبحنا عيالنا لأجله رضاتي = وقد كسرنا دون ذوده كم عيال
حن هل الوادي عمى عيون العداتي = صانعين الهول في يوم المهال
لاركبنا في ظهور المسرجاتي = قامت الدنيا على روس الرجال
نكسب الناموس في يوم اللقاتي = في نهار فيه للخيل أجتوال
خيلنا توطى على روس الطغاتي = وسط ساحات الوغى تصهل صهال
لا مكرٍ لا مفرٍ مقدماتي = كنها ما خلقت إلا للقتال
لابتي فرز الوغى حمي الحماتي = الدواسر مروية حدب السلال
و القبايل نعم ما فيهم حكاتي = طيبها وافي ولا منها جدال
من على عصر الجهل والتفرقاتي = يوم ما نعرف حرام ولا حلال
عقب ما كنا وسط نجد شتاتي = نحمد اللي عزنا بحكماً عدال
في ذرى آل سعود مزبان الجناتي = ملبسين الدار زينات الحلال
مملكتنا أحلى وأجل المملكاتي = ديرة في الأرض ماجاها احتلال
لو عتتنا بالرياح العاتياتي = حبها بنزول وهو لايزال
مثل منهو عاشقٍ بعض البناتي = عنده أن أعيوبها زين وجمال
يا ملوك العز حنا لك ولاتي = ما تغيرنا صواديف الليال
لاتشيلوا هم الأنذال العصاتي = لاطراكم بس سوقوها اقبال
والله أن نسوقها ترغي رغاتي = وأن نجفلها من المورد إجفال
والختام الصالحات الباقياتي = أسمعوا لجابتي قبل السؤال
كلمةٍ في المبتدى والخاتماتي = قلتها وأنا أتحملها حمال
لقطع ألساني وأذبه في الخلاتي = كان ما أجمل ليا جالي مجال

صح اللسانك ولسان الشاعر عبدالله

أبيات جزله تدل على شاعريه قويه

لاهنت أبو حجاب على جلب هذه الدره لنا

تقديري لكـ

اخـوك ودعـاني وافتخـر