بسم الله الرحمن الرحيم
اخواننا أعضاء وروّاد منتدى قبيلة الدواسر الرسمي
يسرنا اليوم ان نقدم لكم اللقاء التاريخي الشعري (الأوّل ) الامير محماس بن علي آل ربيّع المخاريم اطال الله عمره ،الذي كان لنا معه هذا اللقاء بعد زيارتنا له بمنزله بمحافظة وادي الدواسر ، وقد كان اللقاء قصيراً نوعاً ما (لضيق الوقت) ووعدنا ضيفنا الكريم بتكملة اللقاء معه في أقرب فرصة لـ (جزء ثاني) .
استفدنا منه كثيرا ً فهو أرشيف كامل لتاريخ وروايات الدواسر عموما ًوغيرها من القبائل ولاغرابة في إلمامه بالكثير من الأحداث والروايات فهو من أسرة سليلة المجد والأمارة وهو أحد أحفاد الشيخ ربيّع بن زيد ، الأمير الغني عن التعريف كما أن ضيفنا من المشاركين في توحيد البلاد في عهد الملك عبدالعزيز رحمهم الله جميعاً.
أجرى اللقاء :
الأستاذ راشد بن عبدالمحسن المسعري (إدارة الموقع)
الأستاذ حنيان بن مبارك المسعري (المراقب بالموقع)
http://www.alduwaser.org/meeting1/Ibnrubi3.jpg
في منتصف الصوره الامير محماس بن علي آل ربيّع ، ويظهر يميناً الأستاذ : حنيّان المسعري ويساراً الأستاذ : راشد المسعري
س: أبو علي نبيك تعلمنا بسالفة مراحكم من المدينة لجازان يوم كنت في الفوج وما القصائد في ذلك؟
أيام ثورة اليمن (البدر) قبل حوالي اربعين سنة جانا برقية وكنا في المدينة المنورة في فوج الأمير عبدالمحسن بن حشر من شيوخ عتيبة ، وجاءنا الأمر بالتحرك لجازان فقلت هذه الأبيات:-
جانا من الريّس لجازانـن رسالـة=سمعاً وطاعة ليـا جتنـا مناديبـه
لامن تعصا الطريق الكايد إنّـا لـه=وقدامنا بيـرق التوحيـد نمشيبـه
لاما اغتدوا الدرب مانبغيـه بدلالـه=وكم وادياً فوجنـا قـدّت محانيبـه
نمشي مع ساحـل تبرالـه جبالـه=ونصبر على القيظ لا شبت لواهيبه
فوجٍ على (بو حشر) قد بانت أفعاله=فوج السعد من قديـمٍ بينـن طيبـه
يـوم اليهـود ومصـر رحنـا لـه=وايام جازان جينـا فـي مجانيبـه
يومٍ علينا المدافع هدفها يشبك ظلاله=ومن الهوى سابقات الصوت ترميبه
الحرب لاجاء طرفنا نـدرع شعالـه=واللي بيكتبلـه الله شـي بيصيبـه
الما ليا من وردنـا نشـرب زلالـه=واللي بعـد قبلنـا فعلـه يماريبـه
وبعد انتهاء مهمتنا اللي جينا من شانها ، سمح لنا ومعنا فوجين بمغادرة جيزان فقال الأمير محمد السديري أنه يمكننا الذهاب نحن والفوجين اللي غيرنا ولكنه ماوده إنا نحن (فوج ابن حشر) بالمغادرة لحبه وتقديره لنا ولما عزمنا على الرحيل وشاهدنا الأمير محمد السديري فقال:-
وين الرجال ووين ركابة الخيل=وين الرجال اللي تفك الجهامة
راحت كما نوٍ مزونه زعاجيل = وانا على سيف البحر في تهامة
فرديت عليه وكنت رئيس في الفوج الرابع :
ياميرنا ياناطح وجيه المقابيـل=لاجاء نهارن فيه يشبك عسامه
يوم المدافع كنها بارق الليـلال=فوج في جنبك يبني خيامـه
إنا جميعاً حزة الحط والشيـل=واليا انقضا اللازم فلابه ملامه
عسى تخالفنا عليك المخاييـل=وتشوف نجد بالرخا والسلامة
حتى نزورك بين ذيك الأماثيل=في وادياً سدره يغني حمامـه
س : أخبرتنا في بداية حديثنا أن هناك قصص لموحد هذه البلاد الملك عبدالعزيز رحمه الله محفوظة لدى والدكم رحمه الله .. ممكن تحدثنا ببعضها يابو علي ؟؟
من سوالف الملك عبدالعزيز اللي حصلتها مع الشايب الله يرحمه أنه خطب له (عجمية) وتزوجها وبعد ما أخذت معه مدة كأن الملك عبدالعزيز نظر أنها غير مرتاحة فقال لها وش علمك يامرة ؟ قالت: ياعبدالعزيز بيني وبين ولد عمي عهد أنه مايعرف إلا انا وانا ماعرف إلا اهو لكن انت خطبتني من اهلي وانت عبدالعزيز واسمك يرفع العرب مايطمنها وجوزوني أياك اهلي ، قال: طيب العلم عندي ويقوم يخليها لين اكتملت عدتها واحتسبت ثلاث شهور ويوم ربعوا اهلها سيرو اهلها على الملك عبدالعزيز يسلمون عليه وخميتهم جنب خيمته وقام وسألهم وين فلان ؟ (يقصد ولد عمها) قالوا موجود : قال إنا نبيه يساعدنا بكرة عندنا شديد ومعنا سيارة مالها سواق قالوا: مايخالف ، ويوم جاء الرجال وتحدثوا وسروا كلهم إلا هو عشان الملك يبيه : قام الملك وسأله قال يافلان: أنت بينك وبين فلانة عهد !!! قال : ياطويل العمر ماعاد به شي حتى لو إنه كان ، عقب زواجها منك ماعاد لنا نظر وانت زواجك يرفع روسنا ويشرفنا ، قال عبدالعزيز: تراني طلقتها وهذا الشيخ فلان بيملكك إياها وتراها مستعدة وانا مادعيتك عشان تساعدنا ، انا دعيتك عشان تاخذ مرتك وترى الونيت اللي قدامنا لاشدينا لك ادخل على مرتك وخذها ، ويوم اصبحوا شد عبدالعزيز وقال قصيدة من ضمنها هذه الأبيات:
لو إن مابـي وزى بطويـق وهضابـه=كان أصبح طويق هو والروض متساوي
لـو إن ربعـه وزى بخشـوم حطابـه=كان أصبحت عثعث ٍ يرعابه الشـاوي
يامـل قلـبٍ غليـط الهـم يرعـابـه=غمـقٍ صوابـه ولابـه حـدن يـاوي
يامدرج الساق نعطـي الحـق طلابـه=وحنا ترانا على المقفيـن مـا نـاوي
http://www.alduwaser.org/meeting1/Ibnrubi3.2.jpg
الامير محماس بن علي في حوار مع الأستاذ حنيان بن مبارك المسعري
http://www.alduwaser.org/meeting1/Ibnrubi3.3.jpg
ضيف اللقاء في صوره مع الأستاذ : راشد ين عبدالمحسن المسعري
س : مادامك رويت هذه الأبيات للملك عبدالعزيز .. فهل تحفظ له شيئا من القصائد ؟
الله الله ... ومن السوالف اللي حصلتها عند ابوي ، للملك عبدالعزيز انه في طريق عودته من الكويت ، مرو على رجال من سبيع أو من الدواسر الأسفلين وقال: ياعبدالعزيز كونكم تبون زيادة زهاب ، قال: إن كان فيه شيء زيادة على قوت عيالك فلامانع ، وترانا نبي زاد مايشب له ضو قال: كل شي حاضر : قال: الكيس هذا اخذوه والقلتين هاذي اخذوها والظرف ذه اخذوه (هذي ماتشب لها ضو ) ويوم دبرو قال عبدالعزيز : يافلان تراك اليوم قد غزيت معنا ( ومن عاون غازي فقد غزى ) إن الله ملّكنا فتراك منا ومعنا لين نموت ، قال: ان شاء الله بينصركم الله ، والملك عبدالعزيز له ام مرضعته مملوكة لعبدالرحمن ويوم ملك ابن رشيد الرياض خذاها عجلان ، وقالت: إن نويتو تجون من الكويت فعلموني اعطيكم الأسرار ، وجاها مندوب وقالت الليل الفلاني عند معزبته (غيري) واللي عقبه (عندي) ولاجاء اليوم اللي مهوب عندي فمروني وازيدكم بالعلوم ، ويوم راح لمعزبته الثانية (مّروها ) وجوها وقالت: شوفو ترى العلامة لاقدهو جنب بيتي تراني بقول يا (عرينة) خدامة لها باقول لها : عطيني كذا وكذا ، ويوم جاء جنب البيت قالت ياعرينة عطيني اللي عندك ، فقاموا الرجاجيل عليه فشافهم ويوم قده بيدخل مع (الخناقة) لحقه حزام العجالين وابن جلوي واضربه ابن جلوي وذبحوه ومعه بعض اخوياه وسلط الله عليهم ، وعقبن قالو ياهل القصر تبون الأمان والسلامة فسلموا انفسكم ، واللي يبي الموت والله إن يحصله ، قالو: عطنا وجهك : وعاطهم عبدالعزيز وجهم ، وسلموا ا نفسهم وخذو سلاحهم وقال عبدالعزيز انتم احرار وكلا يروح لديرته اللي يبي.
وقد قال الملك عبدالعزيز قصيدة أثناء قدومه للقصر:-
طويق بانـت يالنشامـا قـوره=ياهل الركايب رفعـو تاليهـا
دارنا مـن عقبنـا مهجـوره=يذكر لنا إن العبد يامر فيهـا
حرّم علي النوم ليـن نـزوره=لين العمـار الغاليـة نهديهـا
لاكان يضـرب توّنـا طابـوره=إذن الولي ماعاد يقعـد فيهـا
من غاربه سيفي غدا باكـوره=سيوفنا يوم اللقـاء نرويهـا
أصبح تعلاّ الحر عالي وكـوره=اصبح منادي الحكم يدعي فيها
http://www.alduwaser.org/meeting1/Ibnrubi3.4.jpg
صوره تجمع الشيخ محماس بن علي الأستاذ سلطان بن جلعود يظهر يساره ، ويظهر يميناً الأستاذ حنيان بن مبارك
س : عطنا قصيدتك في " بندقك " يوم رحت من الوادي للهضب ؟
يوم عيد وبعد الصلاة قام فريق من الجماعه واطلقوا النار ، وقام ناسن من ربعنا القريب واطلقوا النار في السما (يلعبون) وفرحين يوم عيد ، وقام واحدن مبغض لنا ولهم وراح لبن ماضي امير الوادي في وقته وقال ترى به ناسن تذابحو عند المسجد وشبت حربن بينهم ، وأرسل الخدام للمحل اللي وصفه ويوم جاو ( الخدام) مالقوا شي من اللي قال البلاّس ، وقام الشايب سلطان بن علي (اخوي) وراح لبن ماضي وقال يابن ماضي ماعليك امن الحكي اللي جاك ، لابه لا ذبح ولابه شي ، هذولا ورعان مستانسين في العيد ويلعبون بالسلاح ولا به الا الزين ، قال ابن ماضي اللي رموا بالسلاح كلهم لازم يجيني سلاحهم واخذه ، حاول فيه (سلطان) ولكنه عيا يكون ياخذ السلاح ، وقال هاتو السلاح ولا تراني بارفع فيكم للحكام ، قال يارجال هذولا ورعان مستانسين بالعيد ولا بنادقهم بحاصلة ، ويوم شفت مافيه حيلة قمت أنا يا(محماس ) و وصيت على الربع يطلعون للهضب وخلونا نتخاوا ، وركبوا من عندهم وانا من عندي على ظهر بعيري وصلنا مياهنا وطربنا واستانسنا بالصيد والوعول ، وقلت:-
ياراكب اللي لا مشى ينفـض البـدان=خطرن عليه يفـك غلـق المصاليبـي
يسرح من الوادي مع الصبح لامن بان=وعند الضحا في نايفـات المهاضيبـي
ديرة ربـوع فاللقـا تلطـم العـدوان=تشري لجزل المدح غصب بلا طيبـي
يزبنهم الجاني من أيـات فـجٍ كـان=من العـرب الأدنيـن ولا الأجانيبـي
فنا أحمد الله في يدي شالية الأكـوان=آمـن بهـا لا جـودن المقاضيـبـي
فيا بندقـي منتـي باللظالـم الخـوان=يابندقي لو كـان يكثـر ماالمناديبـي
يفداك ابن ماضي مع خادمـه جمعـان=يفداك منهـو مايعـرف المواجيبـي
حرمت عليهم دام رجلي لهـا ميـدان=مادامهـا تحتـال روس المراقيبـي
س : عطنا قصيدتك يوم توصي ولدك (علي ) ؟
ياوالله اللي شفتنـا العجـز فالرجليـن=تى الهدف ماعاد نقطـع مضاريبـه
ياما مشينا في طرب كـل عـامٍ زيـن=يامـا بدينـا فـي نوايـف مراقيبـه
وياما رمينا فيه مـن جملـة الراميـن=ل الكتـوف اللـي جـدادٍ مقاضيبـه
ألا ياعلي بوصيك واحفظ وصاتي زين=عز الرفيق وحـق الاجنـاب تدريبـه
وترى الجرب يعديك لكان بعد سنيـن=الدين نوره وسط الاظلام تمشي بـه
واحذر ترى الدنيا ومن فوقهـا فانيـن=غاراتهـا بالخيـر والشـر ترميبـه
واصبر على ماجاك وقت العسر واللين=رى لا فعلت الطيب فالنـاس تدريبـه
لاجاك منهو ضايـق فالربـع الأدنيـن=صبر عليه إليـن تطفـي مشاهيبـه
ترى الصبر في كل المجالات غيبه زين=ترى لا فعلت الصبر تحمد عواقيبـه
واحفظ لسانك من جميع الكلام الشيـن=لا تهـادر فالمجـالـس وتوذيـبـه
مير صلاة ربي عد مايقـرو القاريـن=على النبي اعـداد مالنـود توميبـه
س : عطنا قصيدتك يابو علي في الأمير عايض بن هذلول الوداعين ؟
ابن هذلول الله يرحمه قلت فيه قصيدة وهو فقيدة على الدواسر عسى الله يرحمه ويوفق عياله لدرب الخير والطاعة:-
ياوالله اللي غاب قمر آل هذلول=ارب يظهر واحدن في غيابـه
ياوالله اللي راحوا رجال وفحول=عايض ولد هذلول كلن درابـه
البيت مفتوح لربعـه ومدهـول=يوم الردي بيته يسكـر أبوابـه
يفقده ربع دايمـاً لـه يـرودون= اللي مـن الأجنـاب ولا القرابـه
يلقون عنده كل ماكـان يبغـون=دنياً مع دينـن مريفـاً جنابـه
مايرقعك من راح بالمدح والقول=يكون من مثل القمـر يندرابـه
فتال ماينقض ونقـاض مفتـول=على الجماعة مثل مطر السحابة
مايرقعك كثرة عيـال ولا مـال=لاصار مامنهم حدن فيـه ثابـه
صلاة ربي عـد ماهـل همـال=على النبي عدة ذواري ترابـه
8 س : نبيك تعطينا يابو علي قصيدتك في خوالك الثلاثة اللي توفوا في شهر واحد ؟
الله الله ، خوالي ( آل قويد ) وبالتحديد لبنان ، ومسفر وخلف وكلهم توفوا في شهر واحد بمرض أصاب الناس في ذلك الوقت ماعدا خلف توفا ( مصدوم ) بسيارة ، وبعد وفاتهم بعشرة أيام جيت رايح لبيوتهم ولا لقيت من يرد الصوت (حشر وحويزي ) عند ابلهم في الشمال ولا لقيت احد فقلت هذه الأبيات:
أنا هاض مابي يوم وقفـت بالمكـان=لا شفتنا اللـي كـل ماجيتنـا فيهـا
أهل الصخا والطيب لا شحشح ا لزمان=كل المراجـل قسمهـم وافيـن فيهـا
أهل بيوتن مدهلٍ للجـار والضيفـان=ملفـا لهشـال الخـلا دايمـاً فيهـا
ياوالله اللي راحـوا وخلـو المكـان=ياشين دارن عقبهـم وقفـوا فيهـا
مير يالله تساعدهم إلا علّق الميـزان=فـي جنـة الفـردوس لعلهـم فيهـا
ولا ترى الدنيـا مقابيسهـا شيطـان=تسقيك مـرن عقـب لـذة حلاويهـا
فانا احمد الله يومهم خلفـو شيخـان=مجنـا حـرارن عاليـاتٍ مجانيهـا
خوالي هل الطالات لاصك شانٍ شـان=لطامـةٍ للشـره لاشـب صاليـهـا
فمن قبلهم قد راح خلفٍ مـع فيحـان=خيالـة القطعـان فالقفـر ترعيـهـا
ترعى بها الاطراف فايات فجـاً كـان=وغاراتهم تشبع طيور الهـوى فيهـا
نجدٍ يسجونـه بسيـفٍ وكـل عنـان=وكم ديرةٍ فـي خيفـةٍ ربعـوا فيهـا
اهل صخاف الشول لاضيّق الميـدان=ارماحهم في غـارة القـوم ترويهـا
وصلاة ربـي عـد ماهمـل الـودان=على النبـي عـدة هبايـب ذواريهـا
http://www.alduwasser.org/meeting1/Ibnrubi3.5.jpg
الشيخ محماس بن علي في حوار مع الأستاذ : راشد المسعري
س : نبي سالفة حرب الدواسر مع الدويش يوم خذوا الريشة ؟
الدواسر جاو حادرين ، والدويش لازم مثناة نجد كلها ويوم جاوه روّح شارع ابن قويد له مندوب يطلب منه القصر والجيرة ويوم جاه قال: تطلبونا بعد مانزلتوا في طرّافنا قال: يارجال بعيد ولا قرّيب عمل الرجال واحد قال: ارجعوا وراكم لين تعدّون حدود مطير ثم لا تعديتوها ارسلولي اطلبو القصير ، قالوا مالك لوا إنا نمشي على حربتنا وقوتنا يالدويش ، قال: اللي مجهز ذالزمان من فرسان مطير والدوشان بالتحديد 100فارس وبنجربهم وش مفعولهم ضدكم يالدواسر ، قال: شارع عندنا ل100الولد ، 100 جريدة في راس كل وحدة حديدة إن صادت مجيدة وان أخطت فجريدة ولانا براجعين ، قال: استعدو للحرب يادواسر ، قالوا: ماجينا وانا بننشد منك ومن غيرك.
قاموا المتفرجين يمشون بينهم ويعدون الأمراء ويعدون الفرسان ، والدوشان يلبسون دروع ضد الرماح وطاس يعدي من السيوف ، وقام مروان الخريم وقال لصانع عنده أبيك تصنع لي على حلقة ذالدرع حربة ، وقام الصانع ويسهر عليها ليله كله لين قامت تهوي مع حلقة الدرع وحطها في راس ذاك العمود الجليل وسمّرها ، والدويش قام يتوصف خيلهم وارسل مناديبه يستعلمون من خيل الدواسر ويسأل عن وصف فرس الأمراء ، واخبروه عن وصف فرس مروان الخريم أنها ( سوداء ، صمّاء ، قارح ، معارفها من تحت رقبتها ، وسبيبها يسحب في الأرض ) ووصل الخبر لمروان أنه يستخبر من وصوف فرسه ، فقام مروان على فرسه وجلمدها ويجبها لين غير صارت (صغيرة) وصغر شكلها ، وكذلك فعل شارع بن قويد وجلعود المخاريم.
جاك الدويش وساق عليهم المغاتير والريشة ، ويغدون بها صبيان آل زايد ويتقابلون الرجاجيل ويوم انتصف اليوم قامت خيل مطير بلاّ تمشي ، وخيل الدواسر تحوّل من ترابيع الجوّ ( بسبب اعتنائهم بطعام خيلهم ووفرته ) ويقوم جلعود المخاريم ويحوّل بواحد من الدوشان ويقوم وطبان الدويش وشاف مروان بلاّ يلعب بالفرسان يمين ويسار ويجندلهم فنصاه وقام مروان يوم انتبه له فدبّر يبغى يبعد به من المعركة ويوم ابعد به والتفت عليه ماعنده احد فارجع له ويوم جاء بوزانه فاضربه بالدبوس ويضربه من عند حلقة الأبهر من تحت الديد والدويش كان منبطح على الفرس من الهوايا ويضرب الفرس لينه مطيّر منها ليهي ثابتة ومثبتتة الدويش في ظهرها ، وقال ( ذقها يالدويش ، ضرّاك على الغزلان غزال منكسر ).
وقام شارع وحوّل في بيت الدويش وقال: يادواسر تراكم مقروعين عن بيت الدويش واللي فيه ، ويوم انتهت المعركة وجاء الدويش يبي عياله قال: وين فلان قالو: موجود قال: وين فرسه : قالو: عقرت ، قال وين سلطان: قال: موجود : قال : وين فرسك : قال عقرت ، إلى فيه ولد صغير له هاقين فيه قهوة: قال يافلان وين فرسك:قال عقرت قال:
ابوك ماخليتهـا تركـب العـان=وابعدتها عن زرق خطلان الايدي
قال:
رديتها يوم الوغى عند سلطـان=يوم إن شارع يحتمي حرد الأيدي
وهذا عذري يابوي ، قال: ماسمها ، خلها تروح
خذو الدواسر الريشة والمغاتير ، وقعد شارع حارس بيت الدويش لين اقفت الجموع ، ولين وسمنا حنا يالمخاريم (مطرقين على الفخذ ) وإلى الدويش عند جلعود ويشوف الوسم ، قال: ياجلعود قال: نعم : قال : وسمنا مثل وسمكم لاشك حنا نبعج القدامي بمطيرق ويقال له : (الرويكب) وشاهدنا (الحويفر) على الساق من تحت (الثفنة) وشاهدنا يقارب لشاهدكم واليوم ابعج المطرق القدامي ويصير وسمنا مثل وسمكم واحد ، وتجي خوة بيننا من اليوم ليوم الآية ، قال جلعود: مابه خلاف بس فيه شرط : قال: ويشهو : قال: إنك ماتغزي الدواسر بعد اليوم انت ومطير وتصير خوة صحيح ، قال: ابشر ، قاموا الرجاجيل وساعدوه لين وصل ربعه.
ويوم سلم الدويش من صوابه قال: راع الفرس اللي صوبني وصوف فرسه غريبة ولاهيب صغيرة علموني منهو ؟ قالوا له هذا : مروان الخريم ، قام روّح واحد من مناديبه لمروان الخريم وقال: تعزبه وخلك عنده واعرف(مذوقه) ، ويوم جاه وقام يراقب اكله ، لينه ذا يملا المحلب من لبن الناقة الحلو ، ولامن قدر من القهوة قال: عطونا الغداء (الحليب) وجاب الحليب وتودم منه بالتمر هو ويا ذاللي متعزبه ، وعلى ذالمنوال ، قال له الرجال: غير ذالعيشة شي يامروان ، قال: ابدن تمر النخلات وحليب الخلفات وهذا اغلى ماعندنا وبعد ايام ، رجع للدويش وعلمه بالعلم
س : اعطنا سالفة السبيعي اللي خواله المخاريم اللي يسولف بسالفة زيد الخوير اللي رد ابل قصيرته ( الفنيدة ) من القوم اللي غزوهم ؟
قصة زيد الخوير ال بوسباع يوم رد ابل قصيرته (الفنيدة) القحطانية من السبعان معروفة وعلى كلامك إنها مذكورة عندكم في الموقع ، وبالنسبة لسالفة السبيعي اللي ذكر هذه السالفة ويعلمني بها ابوي علي وهي حصلت في وقته وهي كالتالي:-
به واحد من المخاريم خواله (القريشات ) نزلوا عنده القريشات في طرّاف (الحمرة) وقامو وعدو السالفة حقت (الخريم) وقالوا إنا غدينا (كسبنا) طيّب البل ولا ذكرو للمخيريمي إلا كسبهم للبل في البداية ولاعلموه باللي ذبح منهم فوق (25) فارس ، وقام المخيريمي وجاء ابوي علي يسأله يقول هل حصل بين سبيع والدواسر شي من الوقعات ، فقلت له: دايم يتناوشون ، قال : إلا في (الحمرة) وعلى القريشات بالتحديد: قلت له نعم حصل مع ( آل بوسباع ) وعلمته إياها وبقصيدتها وتوضح رده لابل قصيرته وقتله وجماعته القوم الغازين ومقتل الل(25)فارس من قبيلة سبيع ، فقام المخيريمي فسيّر على خواله ولما واجه الرجال اللي علمه بالسالفة قبل أيام ، قام المخيريمي وعطاه باقي السالفة بأكملها كما وقعت يقول وكان هناك شايب موجود عند خواله (القريشات) وليس من خواله يستمع لسالفته وكان كبير سن ويعنزون له لكبر سنه ، لما سمع القصة وقصيدتها قال هذا الشايب له: من ذاللي علمك بذا لسالفة جعله مايعلم بخير والله إنه ماظلم حظه ذاللي ذكرها ثم والله إني مع اللي نجوا من يد زيد الخوير وجماعته وإني شريدتهم اللي انحاشوا وإن اللي فقدناه من غزوتنا ذيك إنهم (25) فارس. اللي ذبحوهم الدواسر عند ابلهم.
وهذه قصيدة الشيخ زيد الخوير بعد رده لابل قصيرته (الفنيدة) ومقتل القوم الغزاة :
قال الخويري والذي لـه سابـق=صفراً تسابق صكة المصراعـي
صفراً تريـد مجـربٍ ويريدهـا=ماهيب من تطمح وتبغي راعـي
صفراً تسـن عنانهـا بلحيهـا=تشدي لموسٍ في يـد الذراعـي
صفراً الا ركبت يشادي عجهـا=شختور وسمٍ بالشفق قد ظاعـي
كلّه لعينا الفنيدة يوم شفت دموعها =لانيب من حسي ولانـيب واعـي
لعيناك يانجـلا العيـون نردهـا=لوكان مع ضيقٍ ومـع متباعـي
تعوا لسربتنا وجتهـم عجلـه=مثل القطا الـي وارد شراعـي
وعرفتنا منهو يهـوش بشطـره=وبان الحديد الساطي القطاعـي
أما الجنيدي بانفل خطـه=ياشبه حراً لا دعاه الداعي
من خشم سقمانٍ الى ام عميـره=يومٍ حصل فيه العمـار تباعـي
عند الهضـاب الحمـر رديناهـا=وغنت بها الطرشان في لسناعي
قمنا نعدلهـم بضـرب سيوفنـا=وارماحنـا بظهورهـم شراعـي
خمسه وعشرينٍ بجفـرة غايـر=من كان هم من لابتـه يرتاعـي
يانعم يالسبعـان عنـد ركابهـم=فـأن الثنـا طراتـه الشواعـي
حنا خدمناكم بضرب اسيوفنا = لين الصعب غادياً مطواعي
http://www.alduwaser.org/meeting1/Ibnrubi3.6.jpg
الامير محماس بن علي يتحدث ويروّي الأحداث التاريخيّة
س : عطنا سالفة الأميلاح ؟
نزلو الدواسر الأميلاح ( من حدود الدواسر ) ما رد (الشفا) على (القمرا) ويوم نزلوه ، روح ابن هادي لهم مندوب وقال يشدون من الاميلاح لانه لنا ولا يعطون (القود) وكل عطا ابن هدي القود إلا إبن حميد والدواسر ، قال يحطون بيننا وبينهم موعد نتواجه فيه ، قالوا ماعندنا مانع حدد وانا نحضر قال: موعدنا واحد من واحد أول الشهر قاموا الدواسر يوم جاء الوعد ويجهزون خيولهم ويحددون رماحهم وسيوفهم ويحذون خيلوهم ويوم جاء الوعد ، توزعو الرياجيل ولا طلعت الشمس إلا ابن هاادي سايق المزين (ظلة رجاح ) بنته والمغاتير غدوبها صبيان آل زايد ويوم أضحوا ( الضحا) وهم في الطراد ليوم تعبت خيلهم واما خيل الدواسر فكنها تنزل من ترابيع الجو ، وثلاثمية من ضمنهم بنت ابن هادي ، ويوم انتهت المعركة أرسلوا بنت ابن هادي له معززة مكرمة مع الأسرى الثلاثمية. وقال الشاعر:-
شدو شديد كل ماعلقوا طاح=واللي شعانا مبعدين المراحي
فلا كواني كون هية الأميلاح=ولا كواني كون ظلة رجاحي
ويوم جاء السنة الثانية ويوصي على ( الحباب) ومعه عرب واجد ويغزي ومعه مسيفر بن سعيدان آل عاطف وكلهم مع ابن هادي والتف حول الدواسر على (خديره) ومثل ماحصل على الأميلاح لقاه على (خديرة) مهزوم ومذبوح ومكسور ، ويوم جاء دور السنة فيشدون وينزلون على (المشقوق) قبلي ( الطويعيات ) وشرقي (جاحد) ويصبحهم ابن هادي بقحطان وتجي دلوه على (العشوا) لابن غريب من آل بوسباع ويدبرون بها ويلحقونهم آل بوسباع قبل الفزاع الباقية من الدواسر على تسع من الخيل ويعقلون الخيل ويطاردون الرياجيل وتلحق فزاع الدواسر وترد العشوا واللي ذبحوا عشان العشوا (80) لحية من قحطان ، وقال الشاعر عيسى بن حصن الشرافي فرحاً بهذا الفعل:
قـال الصبـي الزايـدي مـن قبيـلـة= هل سربـة ٍ سـو البـلا فـي دلوقهـا
طوال القنـا كـم شيـخ قـوم ٍ مجـرب= لا من عـرض نفسـه علينـا نعوقهـا
فنـا هاضنـي نـو نـشـت مخايـلـه=يمطـر ومصبـوب الثميـدي حقوقـهـا
رعـده دوي الخيـل والـدرج وبـلـه=تنيغـاض مفتـوق الهنـادى بروقـهـا
شرق من الطويعيـات قبلـي (جاحـد )=شمالي خشم ( يحامـر) فـي اوسوقهـا
تصبـح سبـاع الجـو فيهـا دواهــل=يجي الحـول مايكمـل عليهـا علوقهـا
جانـا يسـوق المزيّـن مـع الضعـن= انــا نطحـنـا بعـفـر نسـوقـهـا
يضـدونـا بالكـثـر وانّــا نـضـدهم = بشلـف ٍ يـزود صانعـه فـي فتوقهـا
ويبون فـي هيـة الخديـرة تقاضـي=هاذيـك ماتبـرى مـكـاوي حروقـهـا
فيبـون فـي كسـرة الاميـلاح نصـره= وغنـت بهـا ورق الحمايـم طروقهـا
زدنـا بنـامـوس وعــز ٍ ورفـعـه= و غـل قحطـان ٍ ناشـب فـي حلوقـهـا
ذبحنا عند (العشـوى ) ثمانيـن لحـية =ونصفق على حـد الجمـا مـن عنوقهـا
كن ثج الثميدي من بينـا يـوم نلتقـي= صم الـروي لامـن تواهـت شقوقهـا
كم سابق مـن ضربنـا طـرح حبلهـا= ركابـهـا يعـتـاض فيـهـا غبوقـهـا
يانعم يـا (( آل بوسبـاع)) فـي اللقـا= هل تسعة أفراس ٍ عقرت فـي مروقهـا
مامنهـم اللـي حـاد شـح بسابـقـه= الأجـواد تدقـي حقـهـا دون نوقـهـا
ويانعم يـا ((لاد المنيعـي)) فـي اللقـاا= مـن حـل عنـد المزيـن حقوقـهـا
ويانعم ((يآل ابالحسن)) في ساحة الوغاء = تشري جديـد المـدح لا غـلا سوقهـا
ويانعم(زايـد) يـوم زعـزع (زايــد)= كثـرة وهايـا القـوم فــي لحوقـهـا
فلاجـيـت امــدح ذا الا ذا مـعـدي= مطـارق قنـا شبـت بعالـي عروقهـا
وعقبها ماعاد عاد ابن هادي الدواسر لين مات وافلح عقب ذالهيات الثلاث كل وحدة اطيب من الثانية
س : عطنا سالفة الدويش وسعود الهزاني راع الحريق يوم غزو صوب الدواسر ؟
هذا وطبان الدويش خال الهزاني راع الحريق وصى على سعود الهزاني راع الحريق وقال ياسعود وش تنفعني به ياخالك ؟ قال ابشر باللي تبي: قال : الدواسر خذو الريشة وسوو بنا وفعلوا اللي مايجهلك واليوم وش بتنفعني به ؟ قال: اللي تبيه ياخال بانفذه ، انت عطني القوة والرجال اللي تبي وازهل الدواسر عندي آخذ ثارك منهم ، بس عطني رجال وعتاد.
وجاك الدويش ساحب مطير معه لين وصل الحريق ، عند ولده سعود الهزاني وظهرو على الدواسر مع (برك) وإلى الدواسر من تحت العارض كلهم ، وقاموا الحناتيش من ال بلحسن المساعرة مدري من اللي راح منهم هم لاذي (العتلة) وربعو فيها وقالوا يالربع مانا برايحين من تحت العارض وقاموا الحناتيش أهل (10) ركايب ويوم جاو مع الهدار لينهم ظاهرين على الهزاني والدويش ، وغاروا عليهم وياخذون البل ويقفون بها ، وريسهم ابن خذيعان الحناتيش واجتمعوا وقالوا وش الرأي هذا الدويش ومعه الهزاني واللي معهم (40) مكعكعة من الحريق من الهزازنة ومن بني زيد وش رأيكم ياحناتيش حنا بلا (10) خيالة هل نخليهم ياخذون البل ولا نلحقهم ، وانا باشير عليكم نخليهم ياخذون البل وبنروح للدواسر وبيجمعون لنا وتسلم انفسنا (وكان يختبر ربعه) ، فقال واحدن منهم : يابن خذيعان لو إنك تحب الستيرة ماظهرت مع الهدار وزبنت العتلة قبل أهلها (باقي الدواسر ) والله لاما ترد إبلك ماعاد تعرس بناتكم من اليوم ليوم القيامة قال: تدرون عاد :
ياسعد عيني يوم شفت وجيهكم=تنازابكم صـم الرمـك جميـع
الا من يرد الشول من يمة العدا=جعـل لا ردو عليـه يطـيـع
تراها يالربع على وجيهها لين نرد البل ولا نموت من دونها ، قالوا: تم وهذا الراي الطيب قال: ابن خذيعان لربعه علموني من اللي بيتمزهل من الدويش ومن اللي بتمزهل من الهزاني ، قال واحد منهم: ازهلوا الدويش وقال الثاني : ازهلو الهزاني ، ويقومون الرياجيل ويعارضونهم وإلى الدويش مجوخ (لابس جوخة) والهزاني مثله ، ويقوم اللي تمزهل من الدويش ويضربه ذيك الضربة بين عيونه ليهو ظاهر مع صنقره ليهو طايح عند يدها ويقوم الثاني ويضرب الهزاني ويبتر رجليه مع غارب الفرس ليهو منسدح هو وفرسه ، وإلى اهل العشر (الحناتيش) ظاهرين من ورى البل ماجاهم شيء ، والربع طايحين خلافهم ، ويوم جاو الدويش لينه ميت واما الهزاني باقي حي قالوا وش جابك لنا يالهزاني ، جايبن مطير معك تبي إبلنا وانت قصيرنا وانتو عملانا ياهل الحريق ، قال والله هذا اللي حصل الحاصل قالو: هو ودك نخليك للطيور تاكلك ولا نلحقك إيااهم قال: إلا الحقوني اياهم (يقصد باقي ربعه اللي طقو) ويركبونه على ذيك الفرس ورجليه تلاوح عليها إلين وصل ربعه.
وتقوم مطير تنسحب ماعينو خير ، ويوم جاء الهزاني لابوه في الحريق قال له ابوه: وهو قد وصاه قبل يروح قال: ترى أبل الدواسر ماتوخذ والدواسر على خيل طيبة تشرب حليب فيه دبس ووالله إن تطارد من فجر لين تغيب الشمس ، وخيلك ماتاكل إلا حشيش وخيل خالك مثل الأمثال.والله ماينتصف اليوم وبعد معكم فرس. فيقول الهزاني لابوه:-
خذينا إبل علـى فخوذهـا النـون=والدال برقـاب البكـار الحسينـات
لحقت بمنهو يذعر الخيل مجنـون=ربعه على الساقة يجرون الأصوات
عز الله إن ذا علمكم اللي تقولـون=الحـي ماينطـح الربـع الأمـوات
الشيخ عنكص بين علبـاه مغبـون=والخيل من ضرب المزاريق عجلات
http://www.alduwaser.org/meeting1/Ibnrubi3.8.jpg
الامير محماس بن علي آل ربيّع يروي الأحداث التاريخيّة ، ويظهر بالصوره الأستاذ : راشد المسعري
http://www.alduwaser.org/meeting1/Ibnrubi3.7.jpg
الأستاذ : سلطان بن جلعود والأستاذ : حنيّان في متابعه للحوار مع ضيف اللقاء
وفي الختام لايسعنا الا نتقدم بخالص الشكر والتقدير للامير محماس بن علي آل ربيّع على تفضله بالموافقة على اجراء هذا اللقاء سائلين المولى عز وجل ان يديم عليه لباس الصحه والعافية ويطيل بعمره كما نتقدم بالشكر الجزيل لأسرة آل ربيّع الكريمة كافة على تعاونهم معنا ، ونلقاكم ان شاء الله في الجزء الثاني من المقابلة .
ملاحضة مهمة جداً : إنتقل إلى رحمة الله تعالى الشيخ الراوي محماس بن علي آل ربيّع المخاريم نسأل الله له المغفرة والرحمة بعد طرح هذا اللقاء بخمسة أشهر تقريباً ، وقد تمّ طرح الخبر عبر هذا الرابط :
قبيلة الدواسر تنعي:الامير الشيخ محماس بن علي آل ربيّع المخاريم
http://www.alduwaser.org/vb/showthread.php?t=32830
(
صوت قبيلة الدواسر)
منتدى قبيلة الدواسر الرسمي
www.alduwaser.org/vb
