شامت حروف تطلب الجزلات = طبع ٍ لها من ماضي الأوقات
تشوم للبيت الثقيل شمام = فوق الجبال وتترك الهزلات
والقاف في حله وذا حله = في لازم الي لازمه فزعات
بزهم بالابيات الكريم الله = الي يفرج كايد الكربات
الي بسط سبع وثبتها = والي رفع سبع بلا ميلات
الي له كفوف الثنا ترفع = تشكر وتطلب راعي المدات
عساه يرحم من وساده قيد = لا والله الا ساهر ٍ ما بات
لا والله الا ما اهتنى فالزاد = مقابله ويسامر النجمات
من عقب رب ٍ نبدي بذكره = بنخى هل الفزعة هل الطالات
دواسر يوم اللقا تعرف = تسقي العدا من صافي الحسرات
يوم القنا قدم القنا يقرع = ما حسبوا فالمعركة الأموات
ابن المطرف يوم ضاقت به = دنياه واصطكت به الصكات
وقام يتلفت يمنه ويسره = وين الحرار الي لهم سطوات
حمله ثقيل وماحد ٍ شله = كل يهاب الي لهم هيبات
حتى زبن ربع ٍ لهم شيمة = دواسر ٍ ماهابت العسرات
فل الحجاج وشافت عيونه = كيف النشاما تكسب الهيات
وسم العصا سلم ٍ جرى فعله = وسم العصا للدوسري بالذات
فياراكب من فوق مسروجة = تنصى (بني تغلب) هل الغلبات
ترثة كليب وترثة مهلهل = تاريخهم فاضت به الصفحات
اهل السخا واهل الكرم والجود = يفرح بهم من صابته علات
سيف ٍ وضربه في رقاب عداه = ما يضرب الا عالي الهامات
وانص (آل زايد) هم هل الفزعة = العزوة الي ترهب القامات
ترثة (صهيب) ومارثة (سالم) = يوم الوغى كم خاضوا الصعبات
اهل الفعول الي تنومسنا = وقت الشدايد هم هل الجزلات
واليوم كل يتبع جدوده = ولا نقول ان الزمن قد فات
تبقى عروق الجود لاهل الجود = وان مات جد ٍ فالولد ما مات
يمشي على دربه يواصل به = المجد الاول والمواقف جات
والحكم لله ثم عبدالله = امن وامان والجفون اتبات
الذيب يرعى فالفلا والشاه = والعدل واضح ما يريد اثبات
والله يرحم صقرها الاول = (عبدالعزيز) معدل الميلات
الي حكمها واحتكم بالسيف = ماجات له بالهون والسهلات
فالوقت وقت المال يا اهل المال = لا تتركون الي سهر ما بات
تكفون يالظفران في فزعه = للي تحرى منكم الفزعات
خمسة عشر عام وهو في قيد = حتى تجرع صافي الويلات
يمضي عليه اليوم تلو اليوم = يعد لحظاته مع الساعات
ينخى وينخى يا بني عمي = تكفون قد ضاقت بي الحيلات