دقت هواجيسي على المعنا ويالله يامعين=على البيوت اللي تنومسني ليا عديتها
رصيتها وصفيتها لين اصبحت عقد ثمين= يلمع بجيد اللي تجي عندي ليا ناديتها
بنت من افكاري ليا جت حزة اللازم تبين=رهن الاشارة ماتشوف الساعة وتوقيتها
لها شهر وشوي ترتع من ورى حصن حصين= واليوم زاعت تبغي الصيدة وانا هديتها
تطلع مطاليع الحرار اللي على الضلع المكين=وتقلط على صفر الدلال اللي لها صبيتها
وانا معودها على الجزلات والقاف السمين=ولاّ الهزيلة ماتجي عندي وانا ماجيتها
وان كان لامن جبتها ماسرت المتذوقين=نذر علي اني لموت ولابعد غنيتها
لكن انا ادري انها كفو يطرب لها القلب الحزين=ولو كان ماادري انها كفو ارتحت ماسويتها
ماجبتها لجل الغرام ولجل صافية الجبين=ولاهمني لجنة ولا ناس ابي تصويتها
كله لعينك يارفيع القدر ياطلق اليمين=دعوتك من باب المحبة والغلا لبيتها
لنك كسبت الاولة مع الرجال الغانمين=ومدات جودك تخجل المعطين لامديتها
يشهد لك التاريخ وزحول القبايل خابرين=كم حاجة شحوبها اللي يكنزون اموالهم واعطيتها
تعطي لوجه الله وتقدير الرجال الطيبن=هذي تبينها والاخرى للحساب اخفيتها
وانا مدحتك وامدحك وابامدحك في كل حين=وشلون ماامدح وانت رجلك سقتها واحفيتها
على دروب المرجلة بالعزم والعقل الرزين=وصعب العقد باللين واسلوب سهل حليتها
وان قلت عبدالله تجي كلمة نعم في كل حين=وان قلت ابوفهاد جبت المرجلة من بيتها
تدري وش اللي ميزك ؟ اخذ الخير علم يقين= انك صبي قدام وعيون الحسود اعميتها
وباقول مادامي وقفت ووقفة الرجال دين=وانا ليامني تدينت الديون اوفيتها
يامرحبا ترحيبة تشمل جميع الحاضرين=قد قلتها قبلي وانا بسمك هنا ثنيتها
ترحيبة ماتذكر الا للرجال الوافيين=عد النجوم اللي يقدي فالغداري ليتها
يامرحبا باللي حضر يقلط على سمن وسمين =من فعل شيخ قدّر رجال يذعذع صيتها
قبيلة الاشراف تعرف من قديمات السنين=وافعالهم يكفل لهم مجد العرب تثبيتها
يوم العجم ترطن على جثة معاديها رطين=افعالهم ياليت من هو شافها ياليتها
قامو بعون الله صبر والله وكيل الصابرين= لين اختلط حمر الجنايز حيها مع ميتها
يردون حوض الموت والمشروب من ماء معين=ومن دون بيت الله هلا بالحرب لادنيتها
وان جيت ابكمل يعجز التعبير يملي الكاتبين = وتجف محبرة الكتابة مابعد وفيتها
وحنا على نفس السجية لا يسار ولا يمين = قبيلة تخضع صناديد العرب لطريتها
دواسرٍ لا وقفو لابد للقاسي يلين=وليا غزو قوم كتب رب الملا تشتيتها
اللي هرب وانحاش واللي مات بالسيف السنين= واللي جلس يجبر كسور مانفع توتيتها
هذا قبل يوم العرب متناحرين وتايهين=تلعب بهم بقعا بفرحتها على تنهيتها
واليوم فضل الله جعلنا تحت قايدنا الامين=القايد اللي صورته لاشفتها حييتها
حييت يابومتعب وحياك رب العالمين=كمٍ جروح غايرة ياسيدي داويتها
وحنا معك وامر وتلقانا جنود مخلصين= نقلط على حمر المنايا لاقدح كبريتها
ماهمنا هرجة مضل ولا صياح الضايعين=اللي تفجر في المرة والطفل ديناميتها
يبغون عز الدين في ذبح العباد المسلمين؟=للد درك يامليك العز يوم انهيتها
وقبل النهاية ودي انصح دام لي عقل فطين=وبقول اربع من ملكت العقل ماخليتها
افدى الوطن والدار واصلي وابر الوالدين=هذي هي اللي تبعد الضيقة ليا سويتها

اللي يلوم اهل الولع في هوى نجد=ماحط له في وسط نجـدٍ تواجـد
نجد العروبة ديرة العز والمجـد=فيها مراابينا وضحـك النواجـد
دارٍ غلاها حط له فالحشـا بجـد=مابيـن جبنـون المعاليـق باجـد
هي دارنا يوم الرمك جالها سجد=يوم الحروب ويوم ملي المناجـد
من دونها نهجد كبار العرب هجد=وكم شيخ قوم عن مناويه ساجـد
لاجيتها وعديت في عالي الرجـد=وهموم قلبي فوق صدري تراجـد
اجر صوتي وانظر التختخ البجد=واسلى عن همومي ولوكان واجد
واخير من ذكر المحبين والوجـد=دعوتك لامن صـرت لله ساجـد

ياحسين يـوم انـك تنشدنـي عليـك الاستمـاع=مع ان بعض الاسئلـة ياحسيـن توجعنـي بهـا
اخذ الاجابة جعلهـا ترضيـك قـدر المستطـاع=وانـا اتظاهـر كنـي ابيهـا وانــا ماليبـهـا
والضيقة اللي تذبـح المشتـاق والدنيـا وسـاع=من فعل دورات الزمن في العاشقـة وصحيبهـا
الله ياشين الفـراق اللـي بعـد طـول اجتمـاع=انـا اشهـد انهـا عـلـة مافـادهـا طبيبـهـا
ولا يذبح الرجـال ويهـزه سـوى لحظـة وداع=لا طاحـت الدمعـة علـى خـده ولا يدريبهـا
دمعة وفا ماهي تنقص مـن مواقيـف الشجـاع=لكن في بعض المواقـف دمعتـك تصخيبهـا
ماهو بخوف من العرب خوفٍ من دروب الضياع=اللي يحـدك حزنـك وجـور الزمـن تمشيبهـا
وان طعت شـوري لا تعنـا فالهجـوم فالدفـاع=الحاجـة الـلـي تـاخـذ الايــام ماتاتيبـهـا