ياونة ونيتها من خوا الراس= من لاهب بالكبد مثل السعيره
ونين من رجله غدت تقل مقواس =ويون تالي الليل يشكي الجبيره
ويامل قلب مثل بن بمحماس =وياهشم حالي هشمها بالنقيره
ويا وجد حالي ياملا وجد غراس =يوم أثمرت وأشفا صفا عنه بيره
من ثمر قلبي سرى هجعة الناس=متنحر درب عسى فيه خيره
الله يفكه من بلا سو الأتعاس =ومن شر عبثات الليالي يجيره
في ديرة تقطعت عنه الأرماس =سبعين يوم للركايب مسيره
لا والله الا حال من دونه اليأس =حط البحر والبر دون الجزيره
يا الله يا اللي رد من عقب مايأس =يوسف على يعقوب وابصر نظيره
ترد علي دباس يا محصي الناس =يا عالم ما بالخفا والسريره
يا دباس بأوصيك صن درب الأدناس =ترى الذي مثلك يناظر مسيره
عليك بالتقوى ترى العز يا دباس =في طاعة اللي ما ينجيك غيره
هاذي ثمان سنين من رحت يا دباس=لا رسالة جتني ولا من بريره
يا دباس عقبك ترى البال محتاس =وعليك دمع العين حرق نظيره
وعليك كني في دجا الليل حراس =أصبح على حيلي وعيني سهيره
أصبح أنا ما بين طاري وهوجاس =وطواري تطري علينا كثيره
مثل الوحش قلبي على كف حباس=يكفخ كما طير سبوقه قصيره
متحر من علية البيت يا دباس =أرجي ثواب الله وأخشى المعيره
أخاف من حكي العدا ثم الأنجاس=أهل الحكايا الطايله والقصيره
ويقال خلا عيلته عنز الرأس =أقفى وخلا عيلة له صغيره
والا فأنا يابوك قطاع الأرماس =ما نيب مثبور أو رجلي كسيره
آصلك لو دونك نبا حمر الأطعاس=الصلب والصمان ماهي عسيره
مهالك مدارك ما بها أوناس =الا الثعل والبوم تسمع صفيره
لأركب على وجنا من الهجن عرماس =فجا النحر يا دباس حمرا ظهيره
متروسة الفخذين مزيوعة الرأس =كن الخلاص عيونها يوم اديره
أو شبه ربدا تخفق للأوناس =وان رفعت جنحانها مسذيره
تنشر من العوده على نور الأنفاس =عند الفجر والليل مقفي مريره
والعصر با لصمان تسمع لها اضراس =حبل الرسن خطر تبتر جريره
نهار ثالث بين حما والأوراس =واره يمينك جعلها لك سفيره
ثم على ساجية تقلب الرأس =تمشي بأهلها في البحور الغزيره
فيها الطبيخ وراهي الخبز يا دباس =يقعد خوا الرأس خنة خميره
هي ديرة اللي باغي كيفة الرأس =ولا له أحد همه من الناس غيره
هيس ولد هيس للمواعين لحاس =يفرح ليا نيدي لذبح النحيره
وما قفك ذا يا دباس ما فيه نوماس =يصلح لقين مهنته طق زيره
ترى الفداوي دون وانشد الناس =راعية ما يذكر بمدح او غيره
ما له سوى طق الحنك منه والياس=وليا انقطع خرجه فلا له ذخيره
طلب المعيشه بالحراثه والأ جناس =المشترى والبيع يوصف وغيره
قم انهض العيرات مع كل فراس =يا دباس دور خير تستشيره
جدك وعمانك هل العزم والبأس =أهل المواجيب مكملين القصيره
يا دباس ما يصبر على البق والحاس=الا الذي ماله بنجد عشيره
واليوم يا مروي شبا كل عباس =أنت الرجا يا كعام وجه المغيره
عشرين عام كلها ارجيك يا دباس =مثل الغرير اللي تولع بطيره
عدل المناكب هليع فرخ قرناس =يمناه في لطم الحباري شطيره
عانق خلوج روحت عقب مرواس =عند العصير لبيضها مستذيره
والليل جاها وحال من دونها الياس =روحها عل فرقاه فرت فريره
يا دباس أنا يا بوك ما نيب بلاس =مير ان عيلات الرفاقه كثيره
جنبت وسط السوق وامشي مع الساس =واخذ شوي الحق وأترك كثيره
يا دباس لو جبت من دحب الأكياس =مختلفة ما بين رز ونيره
ما لي بها يا جعلها بألف قباس =او جعلها تذهب ولو هي كثيره
يا دباس قلبي كل ماهب نسناس=شرقية هبت بقلبي سعيره
والحال يافرز الوغى مسها الباس =عليك يا ناطح وجيه المغيره
وغصون قلبي يا فتى الجود يباس =غاد أنا يابوك كني هشيره
من شافني يقول ذا فيه لساس =واللي برا حالي الهي خبيره
لا وعلا من قبل غوال الأنفاس =ومفارق الدنيا يجينا بشيره
عسى يطق الباب والناس غطاس=يا والي القدرة عليك تعبيره
وصلاة ربي عد ماهب نسناس =على النبي عدة حقوق المطيره

حي الجواب اللي لفانا من الرأس=جابه غلام ما توانا مسيره
أهلا هلا به عد ما حبك قرطاس=او ما كتب فوقه بيوت شطيره
جواب من هو لي مود من الناس=ابوي ما يوصف حلي لغيره
فرزا الوغى كنه على الوكر قرناس=قروم ربعه كلها تستشيره
دليل عيرات لياهب نسناس=ثم ادلهم الجو ومابه ذخيره
مهفي الغنم لأهل الركايب والأفراس=لا روحوا له لا عليهم قصيره
راعي معاميل بها العبد جلاس=للبن يشري بالسنين العسيره
هاذي بمركاها وهاذي بمحماس=وهاذي يصبه للوجيه السفيره
وخلاف ذا يا راكب فوق عرماس=مأمونة من نقوة الهجن عيره
حمرا وهي في سنها وقم الأسداس=متوسط لا فاطر ولا هي صغيره
ماهي لحوج راكبه بالعصا قاس=حرم عليها غير شيل النقيره
والخرج هو وبيوت قيل بقرطاس=مع مزهب الأيام ما هي كثيره
وفوقه غلام منوته قطع الأرماس=لو هو بليل ما تغير نظيره
وليا لفيت الدار فا جهر با لأحساس=وبلغ سلامي كل ذيك العشيره
واختص أبوي اللي نفل جملة الناس=وخصه بعلم وقل تراني بشيره
لا يا نجي العرض يا بوي لاباس=كان تشتكي الضيم فأنا أسيره
وان سايلك عني تراني بنوماس=وانا أحمد اللي ما توسلت غيره
المدح لو يشرى شريناه بأكياس=بأموالنا نرخص ندور الستيره
مطرق افرنجي مضاريبه الراس=ومصلبخ جبته عساني ذخيره
من صنع نصراني مشروبه الكأس=يذكر ورى جاوه بعيد مسيره
أبغيه للي حادينك على الساس=أهل النمايم والحكايا الكثيره
ربع نووا فيك الردا والتخساس=مهبول يا اللي قال غايب عشيره
علي دين لودع الجمع ينحاس=لطين العشير يقوم يلعن عشيره
ان ما سكنا الدار من غير هوجاس=والا نعاف الدار ونور غيره
كله لعينا كلمة قلت يا دباس=تشكي وانا دوني بحور غزيره
خذلك يمين الشرع قطاع الأنفاس=انه فلا جتني علوم بصيره
لا نيب جاني منك حبر بقرطاس=لأيضا ولا جتني علوم سفيره
وان كان تشكي الضيق يا بوي لاباس=جاك الفرج يا بوي هو والبريره
يا بوي أنا مارحت لكيفة الرأس=مع ذا ولاني في سفاه او غيره
يا مسندي يا بوي شوف اوكد الناس=ثم انشد قل ويش هو في مسيره
ان كان ما يفرح صديقك بنوماس=تحرم علينا اللي نهوده صغيره
مدلول مجهول زها زين الألباس=بنت الذي يثني ليا جت كسيره
طار يقول اظهر وطار بجلاس=قمت أشرب التنباك واثره نكيره
أبغي عسى الله يبرد القلب يا ناس=من لا هب شبت بقلبي سعيره
و الا فانا يابوي قطاع الأرماس=أصبر على الشده لو هي عسيره
ومن كان له غايب فلا يقطع الياس=ان قدر الله جاب علمه بشيره

المشاركة الأصلية كتبت بواسطة وسام العصا ابن العم الكريم / فالح الشكره لا هنت على النقل وعلها تسلم يمبنك تسلم تسلم ياراعي الجزل وابودباس دوسري قيل انه من (البدارين او الوداعين) ولم يكن في مدينة الخرج على الاطلاق حيث ان كان من سكان منطقة سدير من اهل (عودة سدير) وقصته مع ابنه والاشعار التي بينهما يحفظهما اغلب سكان المنطقه لشهرة القصه والقصيده واسمه الاول /محمد وسبب القصيده هو ذهاب ابنه لطلب الرزق وتاخره بالعوده وتعرضه للاهانه من بعض الناس والقصيده تعد من اجمل القصائد الى الان برائ نقاد ومتذوقي الشعر النبطي لما عليه ابياتها من الجزاله وقوة المعاني وصدق العاطفه وسلاسة التراكيب والبعد عن التكلف وقيل ان له قصائد عده ولكن ضاعت من غير ان تدون. تقبل تحيات اخوك / وسام العصا

المشاركة الأصلية كتبت بواسطة أباسليمان الودعاني ابن العم الكريم / فالح الشكره لا هنت على النقل وعلها تسلم يمبنك تسلم تسلم ياراعي الجزل والله لايهين الأخ صالح على المداخله

المشاركة الأصلية كتبت بواسطة الأشعف السلام عليكم ورحمة الله وبركاتة لا هنت اخوي فالح الشكره على الموضوع يعطيك العافية .. وحبيت أضيف قصيدة أبو دباس في ملف صوتي مسموع.

المشاركة الأصلية كتبت بواسطة ابومشاري. لاهنت ياخوي تسلم يمينك

المشاركة الأصلية كتبت بواسطة رسمي لاهنتوا يالنشاما على ذالمشاركات اطيبه وما قصرتوا وهذي القصيده كل ما أقراها يكش علي جسمي وشعر راسي يوقف وتبقى دمعتي في وسط عيني حايره والله لا يهيييينكم

المشاركة الأصلية كتبت بواسطة دغش البطي السلام عليكم ورحمة الله وبركاته ابن العم الكريم / فالح الشكره لا هنت على النقل وعلها تسلم يمبنك تسلم تسلم ياراعي الجزل والله لايهين الأخ صالح على الأضافات الجميلة تحياتي العطره محب الجميع : دغش البطي

المشاركة الأصلية كتبت بواسطة ابوشجاع لاهنت يافالح الشكره على القصه والقصيده المعروفه لدى ابناء الجزيره العربيه لما تحمله من احداث وعبر وقصايد جزله بين الابن وابيه والله يعطيك العافيه ==تم تثبيت الموضوع== تحياتي للجميع--

المشاركة الأصلية كتبت بواسطة يحيى الودعاني تسلم يمينك أخوي فالح الشكره قصة رائعة وقصائد جزلة أبو دباس على ما أعرف أن أسمه محمد بن راشد الودعاني الدوسري

المشاركة الأصلية كتبت بواسطة المحايد المستقل اخوي فالح الشكرة ربي يحييك ويطول عمرك علي هذه القصيدة والقصة المميزة وشكرا جزيلا لك وياهلا

المشاركة الأصلية كتبت بواسطة أخو من طاع الله لاهنت يالقرم على القصة الجزلة وبيض الله وجهك.

السلام عليكم ورحمة الله وبركاته

اذا كان اقتتال البادية عند البل وكسبها وتوفير اطيب المراعي وموارد الماء لها في أغلب الاحوال فإن إقتتال الحضر في الغالب على النخل للحصول على مياه السيول وتحويلها لنخلهم حيث أن أغلب القرى الزراعية تكون على ضفاف الاودية لتوفير الماء منها عند هطول الامطار وقد ينشب النزاع بين اشخاص لتوفير الماء للنخل وقد تنشب بين القرى وبعضها بسبب وقوع القريتين أو الثلاث على مجرى وادى واحد .

واما قصة دباس فيقال ان امه توفت وهو صغير وتزوج ابوه زوجة كانت تعامله بقسوة وابوه مشغول بالنخل ولم يكن يلتفت له وبعد ما ضاق دباس من الوضع اللي هو فيه رحل مع ركب رايحين للعراق للتجارة وكان رحيله سرا لان ابوه ما يرضى روحته فتسلل ليلا ورحل مع الركب وكان دباس جذع ونزل في البصرة وهي كثيرة الخيرات في الوقت الغابر والناس في نجد يرحلون للعراق وخاصة للبصرة والزبير لوجود عوائل نجديه فيها فكل ينصى ابن آخيه يضيف عنده ويدور له شغل .

اما ابو دباس فإنه لم يعلم عن رحيل ابنه إلا في الصباح وفاختته الحيله ولم يستتطع يعمل شي ولم يتكلف كثيرا في البحث عنه فالمنفعة من دباس وان لم تعدم فهي قليله لصغره وكون ابوه بين اخوته ومستكفي بهم .

وبعد أن استقر دباس في البصرة ووجد له مصدر رزق وبدأ يجمع النقود أخذ عادة على نفسه أن يرسل لابيه بعض ما يكسب ورساله يخبره فيها عن أحواله وفي بعض الاحيان حين يقل دخله يرسل لابيه رساله للاطمأنان على حاله واخذ على هذه الحال 12 سنة وهو مداوم عليها واما آخر 8 سنين فإنه لم يرسل شيء لان ابيه لم يكن يرسل له ليخبره عن أحواله وكان يظن ان ابنه سيأتيه لا محاله وكان غيابه عن العودة 20 سنة حيث يقول في احد ابياته

عشرين عام كلها ارجيك يـا دبـاس *** مثل الغريـر اللـي تولـع بطيـره

رزق خلالها ابو دباس ابنتين من زوجته ثم بدأ يفقد قوته لكبر سنه وعدم وجود المعين لموت اخوته وعدم وجود من يسانده وكان له هيبه ومجلس رجاجيل حيث انه كريم هذا في قوته اما بعد ان ضعف فإن ابناء عمه بدأو يضايقونه في قسمة السيل وخصوصا عندما يكون قليلا فإنهم يحرمونه من السيل مما سبب ضعف النخل وقل انتاجه فلم تعد نخيله تدخل عليه ما كانت تدخله في السابق ايضا كان ابنه يرسل له بعض النقود ولكن في الثمان سنين الاخيرة فيقول في احد ابياته

هاذي ثمان سنين من رحت يا دبـاس *** لا رسالـة جتنـي ولا مـن بريـره

وابنتيه صغيرات لايستطعن شيء من الحيله وزاد ذلك من مصيبته فاصبح يعيل زوجته وابنتيه ولا يستطيع تركهما لعدم وجود عائل لهما بعد الله الا هو وكان يتمنى أن يذهب لابنه بنفسه من العوده على الصمان الى ان يجعل قارة واره يمينه حتى يصل للبصره ويجتاز النهر كي يعيده ولن يعجزه ذلك مع كبر سنه الا أن هذا السبب جعله يغير رأيه مما قد يقوله حساده عنه لو رحل وترك من يعيلهم حيث يقول في بعض أبياته

أخاف من حكي العدا ثـم الأنجـاس *** أهـل الحكايـا الطايلـه والقصيـره
ويقال خـلا عيلتـه عنـز الـرأس *** أقفـى وخـلا عيلـة لـه صغيـره
والا فأنا يابـوك قطـاع الأرمـاس *** ما نيب مثبـور أو رجلـي كسيـره
آصلك لو دونك نبا حمر الأطعـاس *** الصلب والصمـان ماهـي عسيـره
لأركب على وجنا من الهجن عرماس *** فجا النحر يا دبـاس حمـرا ظهيـره
تنشر من العوده على نـور الأنفـاس *** عند الفجـر والليـل مقفـي مريـره
والعصر با لصمان تسمع لها اضراس *** حبل الرسـن خطـر تبتـر جريـره
نهـار ثالـث بيـن حمـا والأوراس *** واره يمينـك جعلهـا لـك سفيـره
ثـم علـى ساجيـة تقلـب الـرأس *** تمشي بأهلها فـي البحـور الغزيـره

وبعد التفكير لم يجد الا ان يرسل له رساله يخبره فيها عن أحواله من ضيق ذات اليد وقلة المال وتكالب الاعداء عليه حتى انه اصبح يترك حقوقه لهم خوفا منهم وكيف انهم يضايقونه في رزقه وهذا حل الضعيف في نجد في الزمن الغابر حيث يقول

يا دباس ما يصبر على البق والحاس *** الا الـذي مالـه بنـجـد عشـيـره
يا دباس أنا يا بوك ما نيـب بـلاس *** ميـر ان عيـلات الرفاقـه كثيـره
جنبت وسط السوق وامشي مع الساس *** واخذ شوي الحـق وأتـرك كثيـره

ويطلبه فيها ان يأتي الى العوده ليرد له حقوقه المسلوبه ويذكره بماضي اعمامه واجداده المجيد وينقد عليه جلسته في تلك الديار التي رافق رغد العيش فيها بعض الفساد من تنباك وخمر وغيره حيث ان نجد على العموم من أكثر الديار تمسكا بالدين ونبذا للمحرمات والعراق كان به بعض هذه الامور في الجمله فلا يقبل العيش بها إلا من لا يهمه إلا نفسه ولا يتطلع إلى المعالي حيث يقول

فيها الطبيخ وراهي الخبز يـا دبـاس *** يقعـد خـوا الـرأس خنـة خميـره
هي ديرة اللي باغـي كيفـة الـرأس *** ولا له أحد همه مـن النـاس غيـره
هيس ولد هيـس للمواعيـن لحـاس *** يفـرح ليـا نيـدي لذبـح النحيـره
وما قفك ذا يا دباس ما فيه نومـاس *** يصلـح لقيـن مهنتـه طـق زيـره
طلب المعيشه بالحراثـه والأ جنـاس *** المشترى والبيـع يوصـف وغيـره
قم انهض العيرات مـع كـل فـراس *** يـا دبـاس دور خيـر تستشـيـره
جدك وعمانك هـل العـزم والبـأس *** أهل المواجيـب مكمليـن القصيـره
واليوم يا مروي شبـا كـل عبـاس *** أنت الرجا يا كعـام وجـه المغيـره

فكتب هذه الابيات ثم بحث عمن يوصلها فلم يجد الا صلبي لانه شرط شرط انه مايعطيه فلوس لين يوصل الرساله ويرد له خبر دباس وشد الصلبي من عنده ولا وقف الا في البصرة وبدأ يسأل في أماكن تجمع اهل نجد حتى دلوه ولما وصله سلم عليه وقال انا مرسول من ابوك ومعي لك خط منه فجلس دباس وقرا المرسول فلما قرأ محتواه أخذ يبكي فلم يكن يعلم عن ظروف ابيه ولم يصله خبر عنه حيث يقول في احد ابياته

خذلك يمين الشرع قطـاع الأنفـاس *** انـه فـلا جتنـي علـوم بصـيـره
لا نيب جاني منـك حبـر بقرطـاس *** إيضـا ولا جتنـي علـوم سفيـره

واخذ وهلة ثم قال للصلبي باكر تجي في نفس هالمكان واعطيك الرد ويوم جاء من باكر والصللبي ينتظر إلا ودباس جاي وعليه ثوب قديم متشقق ومعه عصا متينه مختومه مع اسفلها واعلاها برصاص وقال له دباس علم ابوي ان حالي مثل ما تشوف من الضيق ماعندي إلا هالثوب وثوب امس وهالعصا عطها ابوي هاذي كل ما املك ومشى من عنده الصلبي رايح لابو دباس ويوم وصله قاله بشر قال الصلبي والله يابو دباس ولدك حالته حاله وعليه ثوب لو يعضه الكلب كان ينغلث وعطاني هالعصى وقال هاذي كل ما املك واخذها ابودباس وقلبها ثم ضربها على الارض وانكسرت وانتثر منها نقود كثيرة ومعها خط فانبهر الصلبي من العصى كيف كانت معه كل هالوقت وما درى عنها وعطاه ابو دباس دراهمه وقرا خط يدباس حيث سلم على ابوه وفيه البشاره من دباس انه في ماقف زين وانه جاي وبياخذ حقه من اللي عالوا عليه حيث يقول

واختص أبوي اللي نفل جملة النـاس *** وخصه بعلـم وقـل ترانـي بشيـره
لا يا نجي العرض يا بـوي لابـاس *** كان تشتكـي الضيـم فأنـا أسيـره
وان سايلك عنـي ترانـي بنومـاس *** وانا أحمد اللي مـا توسلـت غيـره
المدح لو يشـرى شرينـاه بأكيـاس *** بأموالنـا نرخـص نـدور الستيـره
مطرق افرنجـي مضاريبـه الـراس *** ومصلبـخ جبتـه عسانـي ذخيـره
من صنع نصراني مشروبـه الكـأس *** يذكـر ورى جـاوه بعيـد مسيـره
أبغيه للـي حادينـك علـى السـاس *** أهـل النمايـم والحكايـا الكثـيـره
ربع نووا فيـك الـردا والتخسـاس *** مهبول يا اللي قال غايـب عشيـره
علي ديـن لـودع الجمـع ينحـاس *** لطين العشير يقـوم يلعـن عشيـره
ان ما سكنا الدار من غير هوجـاس *** والا نعـاف الـدار ونـور غـيـره
كله لعينـا كلمـة قلـت يـا دبـاس *** تشكي وانا دونـي بحـور غزيـره

اما دباس فبعد رحيل الصلبي شرى له ذلول واخذ ما يملك ورحل عن البصره راجع للعوده ويوم وصل للعوده وقبل لايدخل على ابوه وهو يقوم ويعدل الوضيمه على نخل ابوه ثم قام وصلى ركعتين ودعا ربه ان كان جيته برا في ابوه انه يسيل شعيب العوده ويامر الله السحاب ويهل هاك المطر ويسيل الشعيب الا ان اهل النخل اللي مانعين ابوه عن السيل تباطو السيل فذهب واحد منهم يشوف الوضايم لياها جايها شي ويوم اقبل ولا هذا دباس وهو يعبطه بالسيف ويتبعه الثاني والثالث وكل ما جا واحد يبي يعدل السيل ذبحه دباس

وابودباس في نخيله مادرا الا وبنته تبشره بان السيل دخل على النخيل وقال ابو دباس مايصير حنا ممنوعين عن السيل وما توقع ان ولده يجيه بالسرعة ذي ثم قال للبنت شوفي الما هو مخالطه دم لان نظره قد ضعف ويوم ناظرت وهي تصيح ايه مخالطه دم قالها ابشري بدباس .

هذا ما حبيت اضيفه وآمل انه يضاف في أول القصة

الاخوان
بدران البدران
رعاد
عبدالرحمن الشرافي
العديم وشكرا لك على الاضافه والتفصيل
طيناني 1
شاكر لكم مروركم الكريم على الموضوع والله يبيض وجيهكم ويرحمكم ووالديكم