نفحة الطيب وهيل الشاذليه = تساق تقدير لوجيه العشيره
( الواسمين العصا ) سلم وحميه = موسّعة حدها أسود الجزيره
لابةٍ "زايديه" ~ "تغلبيه" = "أزد" "ووايل" مناسبنا الشهيره
يوم رزوا حروف الابجديه = روس الاقلام مجدي تستثيره
سيف ولا قلم حقٍ عليه = دام انا دوسري وقفة وغيره
1>> اندبتني مع ربعي الحميه = وقلت يالحرف لاتذخر ذخيره
2>> هلها دوسريه ~ دوسريه = لين تلغيبها سيره وسيره
محميّة بني عمي محميّه = علموا الاوله تنبي الاخيره
المكارم لنا ثيابٍ نقيه = وشايعتنا مثل شمس الظهيره
اوسع حدود حد الدوسريه = قيّظ بديره وربع بديره
من ثرى الوادي لاالخرج النديه = لاالحسا وفل تاريخ ومسيره
جات بعراك وفرس بوارديه = ماخذيناها بمقاصر وجيره
مناوخٍ في ثراه الفين هيه = بكل حرٍ مواريده خطيره
راسخينٍ على شوف البريه = بالسيوف المحاديب الشطيره
مدرعينٍ على خيل ومطيه = ملحقين السرايا بكل ديره
ياحرارٍ على الباغي عصيه = ياحصون الذرى زبن الكسيره
مادفعنا لمخلوقٍ جزيه = غير رب الملا مانستجيره
عزة النفس فينا نار حيه = وعندنا اذلالها اكبر نكيره
تجزع انفوسنا ورد الرديه = تنفر من السفاله مستذيره
ودون الاسلام مانعطي الدنيه = سلمنا صلب والسيرة عطيره
نصرة الدين فينا اكبر وصيه = اسد الاسلام بالنصره جديره
ناهجينٍ على سنة نبيه = يشهد الغربي المنهج وسيره
من الخيانه مواقفنا جليه = ولا غدرنا البعيده والقصيره
طولة وجيه وكفوفٍ نديه = نعطي الجود ومدتنا كبيره
ياوجيه الندى البيض الوفيه = ياهل الوقفة كعام المغيره
بندق الترب ماهي بندقيه = نقلها عار ورميتها معيره
هوزة الدوسري تحرم عليه = قبل ماتهوزهم تعطى الجبيره
ولو لحقني من ادناهم رزيه = باحتملها ولحفها حصيره
واعتبر فزعتي مثل الوصيه = سيف يمناك سله من جفيره
وحطني في نحر خصمك ضحيه = وخل عيني على نومك سهيره
وخل بيني وبينك قابليه = ولا نهدف على اللابه جريره
وهسّة الهزل تضرب جرهديه = الكبيره يابن دوسر صغيره
التجارب دروس ومقدريه = والجهل تيه والحكمة بصيره
والضلاله سراب ومهمهيه = والمحبه لوجه الله سفيره
والموارد على حوض المنيه = والنوايا العلام السريره
والتواضع ادب والكبر غيه = والضغينه حطب نارٍ سعيره
والعداوه طبوع الجاهليه = نبتها مر ونظرتها قصيره
والمواقف حكم والقصد نيه = والتشدد جهل والجهل حيره
والكرم بذل وترحيب وعطيه = وبشّة حجاج من صافي السريره
يطولها صاحب النفس الغنيه = جامع الناس في ماله خشيره
والحسد تهمة النفس البريه = الحسد ذنب مالك ذنب غيره
والزعامة صفاة وعبقريه = ماهي كتاب تقدر تستعيره
ولا درّس ولا تعطى هديه = العسيره مطالبها عسيره