ودك من الدنيا تعيش وخاطرك ماهو عليل = لا ارتاح بالك ماغبطت الناس والاّ مالها
ودك كلام الناس قول الحق بالشي القليل = وعند العرب ماغاب كلمة حق واللي قالها
وانا تحلويت القصايد حزةٍ من كل ليل = لا جاتني انسى هلي وانسى البشر وابقالها
يوم القوافي تتجه كنها كما سيلٍ يسيل = حلفت ما عوّد ورى مادام صرت اقبالها
بنات فكري لا حصل بالسالفه قالٍ وقيل = جنّي وانا هذبتها ولبستها موالها
ومحلا شبوب النار والدله على جمر المليل = رسلان صفرا مزعفره والهيل هو يعبالها
في يّد قرمٍ لا عتزا راغة عيونك يالذليل = خفيف جانب دلته مايشبعك فنجالها
اسري وآسري هاجسي كني عشيقٍ لرحيل = والليل لامنه سرى الالغاز ؟ من حلالها
وآسج فكري في البحر ميلٍ بعد ميلٍ وميل = وامر بأمواجٍ تلاطم ينهبل من جالها
كني غريبٍ ضيّع دروبه ولا فيده دليل = اعمى بصر والا البصيره ميزته بـلحالها
وين الفهيم ابن الحمايل صاحب الهرج الجزيل = يفهم معي كلمة عتب والنفس من علالها
اخاوي الطيّب ولا لي في الردي قسم وحصيل = ومقرد الخلق آتعوذ من غثا جهالها
وانزه النفس العزيزه في سما جوٍ عليل = والحر لـشقر لا كفخ وكره بروس جبالها
بشكي على اهل العرف واهل الحق من واقع هزيل = مشاكلٍ من كل صوب وحالةٍ يرثالها
قلبت درج الطاوله ولعّت في ناري فتيل = ونارٍ تشعلل بالسواد اشحاجتي بشعالها
شبوها بياعة ضمايرهم وجحادة جميل = باعوا امم لاجل المصالح قصّر الله حبالها
ولو جاتك الحيّه تهز الراس تتمايل بـذيل = ماظنها ترقص طرب والسم يسري بحالها
عرب نعم حنا عرب احرار يزبنا الدخيل = اطهر واشرف امة تسمو بـفعل الرجالها
عرب يشوفون الجبال بعينهم حبات هيل = وشافوا النجوم انفوسهم هيهات من يرقالها
عرب تعلو واعتلو ثم اعدلو دربٍ يميل = الحق مبدأ بينهم والصدق رمز اقولها
عرب طلع منهم نبي الله يهدي بالدليل = الهاشمي المصطفى زال المناكر زالها
عمر وابو بكر وصلاح وخالد السيف السليل = اهنا العرب يوم العرب تفخر بأفعل ابطالها
الله وكبـر صارت امجاد الله عابر سبيل = ذكرى تسطر مجدها صعب الزمن يشتالها
كنا ثلاث حروف ؟ صارن كالخيال المستحيل = واليوم صرنا عالةٍ بين الامم واحوالها
ياجيل ياجيل الزمن اصحى ونافس كل جيل = وقلها وقل ان الامم تزها بكفاح اجيالها
عسى ونرجع للكتاب ويرجع السيف الصقيل = والسيف وطى روس كانت بالسما لذيالها
ويالله تعز شيوخنا يالله يالظل الظليل = اللي علينا فضلهم اسودها واشبالها
وانا قلبت الطاوله وريتها صاحي وهبيل = يوم المهبل غارقه في نومها ومقايالها

لك وجه تسألني عسى عندي أخبــار= يـامـدور دروب الهـجـر والقـطـاعـه
أتشوفني مسجون وارموشك أسوار= فـي وسـط عينـك اتحـرى الشفـاعـه
تايـه وادور بيـن الاضـلاع لـــــي دار= الـحـب واحــد والخـطـايـا جـمـاعـه
محتـار فـي قربـك وفالبـعـد محـتـــار= مثل الرضيع اللي احرموه الرضاعه
ماعاد باقي لـك مـن اعـذارك اعـذار= عـذرك ضعيـف ومايسـر استمـاعـه
كـنـك تـقـول بتطـفـي الـنـار بالـنــــار= يالضايـع اللـي منخـدع فـي ضياعـه
ياما فرشت القاع مـن تحتـك ازهـار= الــورد تحـتـك قــال سـمـع وطـاعـه
خليتنـي اتـرجـم احسـاسـي اشـعـــار= مـحـلا غــلاك ونشـوتـه وانـدفـاعـه
احلى من الجلسـه علـى شبـة النـار= فـي وسـط روض( ن) زيــن الله قـاعـه
الصمت مايمشـي علـى درب ثرثــار = والصـدق ماتبـنـي علـيـه الاشـاعـه
خلـك علـى ماقيـل مـاضـي وتـذكـــار= بـيـاع مثـلـك قـلـبـي الـيــوم بـاعــه
لاجيت ابرجع لك وكن شـي ماصــار= قـمـت اتـشـوق للـقـمـر وارتـفـاعـه
انـا كـذا مخلـوق مـن خمسـة انهــار= حـزن والـم شعـر وخيـال وشجاعـه
بيني وبيـن الحـظ ممشـى ومشــــوار= همـي سـنـه وافــراح قلـبـي سـاعـه

الصبح شعشع واقبل النور بـ النور = والليل الاسود مايجيب الصراحه
ماني بضايق لكن القلب مقهور = مثلي تساوت ضيقته وإنشراحه
آمنت باللي ثبّت اطويق والطور = عساه يلهمني ثبوت وفصاحه
واضح واحب اقابل الناس مسرور = مخلوق من بين الرضا والسماحه
اكتب قصيدي همي إسعاد جمهور = ماهمني فوضه وصوره وساحه
موجٍ تلاطم من ورى سبعة ابحور = حروف شعـري للمخاليق راحــه
يامبتليني ؟ بالحكي اسمع الشور = لا تحسبنّك عايش بوسط واحــه
اللي خلقنا ميّز الحق والزور = الفرق واضح كالسما والبراحــه
الطـب يبغاله من الناس دكتور = والهندسه تبغى ارتفاع ومساحــه
ياللي تقول اني من الناس مغرور = ميّز هماج الما وميّز قراحــه
لامن كبـر راسي مع الطيــش معذور = لكن غرور الشخص سبة مطاحه
نسعى بـ هالدنيا نبي الحال مستور = والمجتهد همـه وغمـه نجاحـه
ياصاحبي ؟ لا تقعد اتلّف واتدور = الطيـر وشهـو ؟ لو كسرنا جناحـه
منت بمعي يابن الاجاويـد مجبور = من راح مني سمّح الله مراحه